ଅନ୍ଦାଜ୍ ଏମିତି, ଯେମିତି ଜଣେ ବରିଷ୍ଠ ରିପୋର୍ଟର । ଲୋକଙ୍କୁ ବୁଝାଇ ପାରିଲା ଭଳି କଥାବାର୍ତ୍ତାର ଢଙ୍ଗ । ମଣିପୁରର ଜଣେ ନାବାଳକର ଏଭଳି ରିପୋର୍ଟିଂ ଦେଖି ମୁଖ୍ୟମନ୍ତ୍ରୀ ଖୁବ୍ ପ୍ରଶଂସା କରିଛନ୍ତି । ଏହି କୁନି ରିପୋର୍ଟରଙ୍କ ଭିଡିଓ ଏବେ ଭାଇରାଲ ହେଉଛି । ମୁଖ୍ୟମନ୍ତ୍ରୀ ନିଜେ ଏହି ରିପୋର୍ଟିଂ ଭିଡିଓର ଏକ ଶର୍ଟ କ୍ଲିପ୍‌କୁ ଟୁଇଟ୍‌ କରି ପିଲାଟିକୁ ପ୍ରଶଂସା କରିଛନ୍ତି। 

କରୋନା ମହାମାରୀ ସମୟରେ ମୁଖ୍ୟମନ୍ତ୍ରୀ ସେନାପତି ଜିଲାରେ ଅକ୍ସିଜେନ ପ୍ଲାଣ୍ଟର ଉଦ୍‌ଘାଟନ କରିବା ପାଇଁ ପହଞ୍ଚିଥିଲେ। ଏହି ସମୟରେ ଶିଶୁଟି ଏକ କୋଠା ଛାତରେ ଠିଆ ହୋଇ ମୁଖ୍ୟମନ୍ତ୍ରୀଙ୍କ ଗସ୍ତ ସମୟର ଟିକ୍‌ନିକ୍‌ ରିପୋର୍ଟିଂ କରୁଥିବା ଦେଖିବାକୁ ମିଳିଛି। ଭିଡିଓଟିକୁ ସୋସିଆଲ ମିଡିଆରେ ବର୍ତ୍ତମାନ ସୁଦ୍ଧା ୫୦ ହଜାରରୁ ଅଧିକ ଲୋକ ଦେଖିସାରିଲେଣି। ୟୁଜରମାନେ ମଧ୍ୟ ବେଶ୍‌ ଭଲ କମେଣ୍ଟ ସବୁ ଦେଇଛନ୍ତି। କେହି କେହି ଶିଶୁଟିକୁ ଜଣେ ବଡ଼ ରିପୋର୍ଟର କହିଥିବା ବେଳେ ଆଉ କେହି ତାଙ୍କର ଆତ୍ମବିଶ୍ୱାସକୁ ପ୍ରଶଂସା କରୁଛନ୍ତି।

ମୁଖ୍ୟମନ୍ତ୍ରୀ ନିଜର ଟୁଇଟର ଆକାଉଣ୍ଟରେ ଏହି କୁନି ଶିଶୁର ଭିଡିଓ ଶେୟାର କରିଛନ୍ତି। ମୁଖ୍ୟମନ୍ତ୍ରୀ ଏଥିରେ କ୍ୟାପଶନ ଲେଖିଛନ୍ତି, ସେନାପତିରେ ମୋର ଯୁବ ବନ୍ଧୁଙ୍କୁ ଦେଖନ୍ତୁ। ଯିଏ ସେନାପତି ଜିଲା ଡାକ୍ତରଖାନାରେ ପିଏସ୍‌ଏ ଅମ୍ଳଜାନ କାରଖାନାର ଉଦ୍‌ଘାଟନ ପାଇଁ ଜିଲା ଗସ୍ତ ବିଷୟରେ ସୂଚନା ଦେଉଥିଲେ।

Powered by Froala Editor