ଘରୋଇ କ୍ଷେତ୍ର କର୍ମଚାରୀଙ୍କ ଦରମା ବୃଦ୍ଧି ନେଇ ଶିଳ୍ପସଂସ୍ଥାଗୁଡ଼ିକୁ ପରାମର୍ଶ
ଫେଡେରେସନ୍ ଅଫ୍ ଇଣ୍ଡିଆନ୍ ଚାମ୍ବର୍ସ ଅଫ୍ କମର୍ସ ଆଣ୍ଡ୍ ଇଣ୍ଡଷ୍ଟ୍ରି ବା FICCIର ବାର୍ଷିକ ସାଧାରଣ ବୈଠକ ଓ ସମ୍ମିଳନୀରେ ଯୋଗଦେଇ କେନ୍ଦ୍ର ଅର୍ଥନୈତିକ ବ୍ୟାପାର ବିଭାଗର ସଚିବ ଅନୁରାଧା ଠାକୁର ଘରୋଇ କ୍ଷେତ୍ରର କର୍ମଚାରୀଙ୍କ ଦରମା ବୃଦ୍ଧିକୁ ନେଇ ବଡ଼ ବୟାନ ଦେଇଛନ୍ତି । ସେ କର୍ମଚାରୀଙ୍କ ଦରମାରେ ଦୀର୍ଘଦିନ ଧରି ରହିଥିବା ସ୍ଥିରତା ଦୂର କରିବାକୁ ଶିଳ୍ପସଂସ୍ଥାଗୁଡ଼ିକୁ ପରାମର୍ଶ ଦେଇଛନ୍ତି। ଅନୁରାଧା ଠାକୁରଙ୍କ କହିବା ଅନୁସାରେ, ଦେଶର ଅର୍ଥନୀତିକୁ ଅଧିକ ମଜବୁତ କରିବାକୁ ହେଲେ ସାଧାରଣ ଲୋକଙ୍କ କ୍ରୟଶକ୍ତି ବଢ଼ିବା ଜରୁରୀ। କର୍ମଚାରୀଙ୍କ ଦରମା ବଢ଼ିଲେ ସେମାନେ ଅଧିକ ସାମଗ୍ରୀ ଓ ସେବା କିଣିପାରିବେ। ଏହାଦ୍ୱାରା ବଜାରରେ ଚାହିଦା ବଢ଼ିବ ଏବଂ କମ୍ପାନୀଗୁଡ଼ିକର ବିକ୍ରି ମଧ୍ୟ ବୃଦ୍ଧି ପାଇବ।
ସେ କହିଛନ୍ତି, ଦେଶକୁ ପୁଣି ବିଦେଶୀ ପୁଞ୍ଜି ଫେରୁଛି। ଏହାସହ ଅଶୋଧିତ ତୈଳ ଦରରେ ହ୍ରାସ ଭାରତୀୟ ଶିଳ୍ପସଂସ୍ଥାଗୁଡ଼ିକ ପାଇଁ ଏକ ବଡ଼ ଆଶ୍ୱସ୍ତି। ଏହି ସମୟରେ ଘରୋଇ କମ୍ପାନୀଗୁଡ଼ିକ ଅଧିକ ନିବେଶ କରିବା ସହ କର୍ମଚାରୀଙ୍କ ଆୟ ବୃଦ୍ଧି ଉପରେ ମଧ୍ୟ ଗୁରୁତ୍ୱ ଦେବା ଆବଶ୍ୟକ।
ଚଳିତ ବର୍ଷ ଏପ୍ରିଲ ମାସରୁ ଦେଶରେ ଘରୋଇ ନିବେଶର ନୂଆ ଚକ୍ର ଆରମ୍ଭ ହେବାର ସଙ୍କେତ ମିଳୁଛି। ପୂର୍ବରୁ ନିବେଶରେ ସୁଧାର କେବଳ କେତେକ ନିର୍ଦ୍ଦିଷ୍ଟ କ୍ଷେତ୍ରରେ ସୀମିତ ରହିଥିଲା। କିନ୍ତୁ ପ୍ରତିମାସ ଆସୁଥିବା ନୂଆ ଆର୍ଥିକ ତଥ୍ୟରୁ ଏହି ସୁଧାର ଧୀରେଧୀରେ ଅଧିକ କ୍ଷେତ୍ରକୁ ବ୍ୟାପୁଥିବା ଜଣାପଡ଼ୁଛି।
Powered by Froala Editor