ଇନ୍ଫ୍ଲୁଏନ୍ସରଙ୍କୁ ବିବାହ ପାଇଁ ଜିଦ୍, ପରିବାର ଓ ପଡ଼ୋଶୀଙ୍କ ମାଡ଼ରେ ଯୁବକଙ୍କ ମୃତ୍ୟୁ
ବିବାହ ପାଇଁ ଜିଦ୍ ଧରି ଜଣେ ଇନ୍ଫ୍ଲୁଏନ୍ସରଙ୍କ ଘରେ ଜବରଦସ୍ତି ପଶିଗଲେ ଯୁବକ। ଏହାକୁ ନେଇ ପରିବାର ଲୋକେ ଓ ପଡ଼ୋଶୀ ତାଙ୍କୁ ନିର୍ଧୂମ ମାଡ଼ ମାରିଥିଲେ। ଗୁରୁତର ଅବସ୍ଥାରେ ହସ୍ପିଟାଲରେ ଭର୍ତ୍ତି ଅଭିନବ ନାମକ ଯୁବକଙ୍କ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଛି। ଏଭଳି ଘଟଣା ଘଟିଛି ଦିଲ୍ଲୀର ମଧୁ ବିହାର ଅଞ୍ଚଳରେ। ଘଟଣାରେ ଇନ୍ଫ୍ଲୁଏନ୍ସରଙ୍କ ବାପାଙ୍କ ସମେତ ଦୁଇ ଜଣଙ୍କୁ ପୋଲିସ ଗିରଫ କରିଛି।
ଅଭିନବ ଉତ୍ତରପ୍ରଦେଶର ଗାଜିପୁର ଅଞ୍ଚଳର ବାସିନ୍ଦା। ସେ ଚେନ୍ନାଇର ଏକ ଘରୋଇ କମ୍ପାନୀରେ କାମ କରୁଥିଲେ। ନଭେମ୍ବର ୭ ତାରିଖରେ ସେ ଦିଲ୍ଲୀରେ ଥିବା ନେହାଙ୍କ ଘରେ ଜବରଦସ୍ତି ପଶିଯାଇଥିଲେ। ଅଭିନବ ତାଙ୍କୁ ବିବାହ କରିବାକୁ ଜିଦ୍ ଧରିଥିଲେ। ଏପରିକି ସେ ମଦ୍ୟପାନ କରିଥିବା ନେଇ ଏଫ୍ଆଇଆର୍ରେ ଉଲ୍ଲେଖ ରହିଛି।
ଇନ୍ଫ୍ଲୁଏନ୍ସର ନେହା ବିଷ୍ଟଙ୍କ ସୋସିଆଲ ମିଡିଆରେ ୬ ଲକ୍ଷରୁ ଅଧିକ ଫଲୋଅର୍ସ ଅଛନ୍ତି। ସେ ନିକଟରେ ନିଜର ନିର୍ବନ୍ଧ ଏବଂ ଆଗାମୀ ବିବାହକୁ ନେଇ ଇନ୍ଷ୍ଟାଗ୍ରାମ୍ ଓ ୟୁଟ୍ୟୁବ୍ରେ ଅନେକ ଭିଡିଓ ପୋଷ୍ଟ କରୁଥିଲେ। ଅଭିନବ ନିୟମିତ ଭାବେ ନେହାଙ୍କ ସୋସିଆଲ ମିଡିଆ କଣ୍ଟେଣ୍ଟ ଦେଖୁଥିଲେ। ଧୀରେ ଧୀରେ ସେ ନେହାଙ୍କ ପ୍ରତି ଏକତରଫା ଆକର୍ଷଣ ଅନୁଭବ କରିଥିଲେ। ଏପରିକି କିଛି ମାସ ପୂର୍ବରୁ ଜଣେ ପ୍ରଶଂସକ ଭାବେ ତାଙ୍କ ଘରକୁ ମଧ୍ୟ ଯାଇଥିଲେ। ନେହାଙ୍କ ଅନ୍ୟ ଜଣଙ୍କ ସହ ବିବାହ ଠିକ୍ ହୋଇଥିବାରୁ ସେ ଅସନ୍ତୁଷ୍ଟ ଥିବା ପୋଲିସ କହିଛି। ତେବେ ନେହା ଅଭିନବଙ୍କୁ ଜାଣି ନଥିଲେ।
Powered by Froala Editor