ରାଷ୍ଟ୍ରପତି ଦ୍ରୌପଦୀ ମୁର୍ମୁ ‘ସ୍ୱଚ୍ଛ ସର୍ଭେକ୍ଷଣ ୨୦୨୫’ ପୁରସ୍କାର ପ୍ରଦାନ କରିଛନ୍ତି। ଏଥର ‘ସୁପର ସ୍ୱଚ୍ଛ ଲିଗ୍‌’ରେ ନଭି ମୁମ୍ବାଇ ପ୍ରଥମ ସ୍ଥାନ ହାସଲ କରିଥିବାବେଳେ ସୁରଟ ଦ୍ୱିତୀୟ ଏବଂ ଆନ୍ଧ୍ରପ୍ରଦେଶର ବିଜୟୱାଡ଼ା ତୃତୀୟ ସ୍ଥାନରେ ରହିଛି। ଗତ ସର୍ଭେକ୍ଷଣରେ ଇନ୍ଦୋର ଏହି ବର୍ଗରେ ପ୍ରଥମ ସ୍ଥାନରେ ଥିବାବେଳେ ସୁରତ ଦ୍ୱିତୀୟ ଏବଂ ନଭି ମୁମ୍ବାଇ ତୃତୀୟ ସ୍ଥାନରେ ରହିଥିଲା। ଏଥର କିନ୍ତୁ ନଭି ମୁମ୍ବାଇ ନିଜର ପ୍ରଦର୍ଶନରେ ଉନ୍ନତି ଆଣି ପ୍ରଥମ ସ୍ଥାନ ହାସଲ କରିଛି। ଏହାସହ ରାଜସ୍ଥାନର ଜୟପୁର ଏବଂ ମଧ୍ୟପ୍ରଦେଶର ଗ୍ୱାଲିୟରକୁ ସବୁଠାରୁ ସ୍ୱଚ୍ଛ ସହର ଭାବେ ମାନ୍ୟତା ଦିଆଯାଇଛି।

ଏହି ସର୍ଭେକ୍ଷଣରେ ନୂଆଦିଲ୍ଲୀ ନଗରପାଳିକା ପରିଷଦ (NDMC) ମଧ୍ୟ ଉଲ୍ଲେଖନୀୟ ସଫଳତା ହାସଲ କରିଛି। ୫୦ ହଜାରରୁ ୩ ଲକ୍ଷ ଜନସଂଖ୍ୟା ଥିବା ସହରାଞ୍ଚଳ ସ୍ଥାନୀୟ ସଂସ୍ଥାଗୁଡ଼ିକର ବର୍ଗରେ NDMC ଦେଶର ଦ୍ୱିତୀୟ ସ୍ୱଚ୍ଛ ସହର ମାନ୍ୟତା ପାଇଛି। ଅନ୍ୟପଟେ ଓଡ଼ିଶା ପାଇଁ ମଧ୍ୟ ଖୁସି ଖବର। ସ୍ୱଚ୍ଛ ଉପକୂଳ ସହର ତାଲିକାରେ ପୁରୀ ସ୍ଥାନ ପାଇଛି। 

‘ସ୍ୱଚ୍ଛ ସିଟି ପେୟାର’ ପଦକ୍ଷେପ ଅଧୀନରେ ସାଣନ୍ଦ, ଦେପାଳପୁର ଏବଂ କୁପ୍ପମକୁ ଯଥାକ୍ରମେ ଅହମଦାବାଦ, ଇନ୍ଦୋର ଏବଂ ତିରୁପତିର ‘ମେଣ୍ଟର ସିଟି’ ଭାବେ ଚୟନ କରାଯାଇଛି। ଏହି ପଦକ୍ଷେପର ଉଦ୍ଦେଶ୍ୟ ହେଉଛି ସ୍ୱଚ୍ଛତା କ୍ଷେତ୍ରରେ ଭଲ ପ୍ରଦର୍ଶନ କରୁଥିବା ସହରଗୁଡ଼ିକର ଅଭିଜ୍ଞତା ଓ ପରିଚାଳନା ପଦ୍ଧତିକୁ ଅନ୍ୟ ସହରଗୁଡ଼ିକ ସହ ବାଣ୍ଟିବା। ଏହାଦ୍ୱାରା ଅନ୍ୟ ସହରଗୁଡ଼ିକ ମଧ୍ୟ ନିଜର ସ୍ୱଚ୍ଛତା ବ୍ୟବସ୍ଥାକୁ ଉନ୍ନତ କରିପାରିବେ।

Powered by Froala Editor