ଭୁବନେଶ୍ବର: କୁଆଡ଼େ ଗଲେ ଦୀଘା ହୋଟେଲ ମାଲିକ ? ଓରାଙ୍ଗଉଟାନ ଉଦ୍ଧାର ଘଟଣାରେ ହୋଟେଲ ମାଲିକ ବାପପୁଅଙ୍କୁ ଖୋଜୁଛି ଏସଟିଏଫ୍ । ହୋଟେଲ ମ୍ୟାନେଜରଙ୍କ ସହିତ ତିନି ଜଣଙ୍କୁ ଧରି ଚାଲିଛି ନନଷ୍ଟପ୍ ପଚରାଉଚରା । ହୋଟେଲ ମାଲିକଙ୍କ ଫୋନ୍ ବନ୍ଦ ଥିବା ସହ ସେ ଏବଂ ତାଙ୍କ ପୁଅ ଫେରାର ଥିବା ଜଣାପଡ଼ିଛି । ସ୍କାନରରେ ରହିଛି ବ୍ଲାକ୍ SUV। ଏସଟିଏଫ୍ ହାତରେ ଲାଗିଛି ଆଉ ଏକ CCTV ଫୁଟେଜ୍। ଏଥିରେ ରାତି ପ୍ରାୟ ୧୦ଟା ୫୬ ମିନିଟ୍ ସମୟରେ ଦୀଘାର ଏକ ହୋଟେଲ ନିକଟ ଦେଇ ଯାଉଛି କଳା ରଙ୍ଗର SUV । ଗାଡ଼ିଟି ସେତେବେଳେ କେଉଁଆଡ଼େ ଯାଉଥିଲା ଏବଂ ସେଥିରେ କଣ ଥିଲା ସେନେଇ ଛାନଭିନ କରାଯାଉଛି ।
ଏହା ପୂର୍ବରୁ ବିଚିତ୍ରପୁର ନିକଟରୁ ମଧ୍ୟ ଏକ କଳା SUV CCTV ଫୁଟେଜ୍ ସାମ୍ନାକୁ ଆସିଥିଲା। ପ୍ରଥମ ଫୁଟେଜ୍ ରେ ବିଚିତ୍ରପୁର ନିକଟରେ ରାତି ପ୍ରାୟ ୧୧ଟା ୩୫ ମିନିଟ୍ ସମୟରେ ସମାନ ଧରଣର ଏକ କଳା SUV ଯାଉଥିବା ଦେଖାଯାଇଥିଲା। ଆଉ ଏବେ ଦୀଘାରୁ ପୁଣି ନୂଆ ଫୁଟେଜ୍ ମିଳିବା ସନ୍ଦେହକୁ ଆହୁରି ଦୃଢୀଭୂତ କରିଛି। ଦୁଇଟି CCTV ଫୁଟେଜ୍ ର ସମୟ ମଧ୍ୟରେ ରହିଛି ପ୍ରାୟ ୩୯ ମିନିଟ୍ ର ବ୍ୟବଧାନ।  ତେବେ ଏହି ୩୯ ମିନିଟ୍ ମଧ୍ୟରେ SUVଟି କେଉଁ ରାସ୍ତା ଦେଇ ଯାଇଥିଲା? ମଝିରେ କେଉଁଠି ଗାଡ଼ିଟି ଅଟକିଥିଲା କି ? ଗାଡ଼ିରେ କିଏ କିଏ ଥିଲେ ? ଓରାଙ୍ଗଉଟାନ ଚାଲାଣ ସହିତ ଏହାର କି ସମ୍ପର୍କ ? ତାହା ଏବେ ସବୁଠାରୁ ବଡ଼ ପ୍ରଶ୍ନ । ଏହି ପ୍ରଶ୍ନର ଉତ୍ତର ଖୋଜିବାକୁ ଏବେ CCTV ଫୁଟେଜ୍ କୁ ଯୋଡ଼ି ଯୋଡ଼ି ତଦନ୍ତ ଆଗକୁ ବଢ଼ାଉଛି ଏସଟିଏଫ୍।

Powered by Froala Editor