୬ ଜଣ ମହିଳା କୁସ୍ତିଯୋଦ୍ଧାଙ୍କ ଦ୍ୱାରା ଦାଖଲ ହୋଇଥିବା ଯୌନ ନିର୍ଯାତନା ମାମଲାରେ ପୂର୍ବତନ ରେସଲିଂ ଫେଡେରେସନ୍ ଅଫ୍ ଇଣ୍ଡିଆ (WFI) ଅଧ୍ୟକ୍ଷ ବ୍ରିଜ ଭୂଷଣ ଶରଣ ସିଂହଙ୍କୁ ଦିଲ୍ଲୀର ଏକ କୋର୍ଟ ନିର୍ଦ୍ଦୋଷ ଘୋଷଣା କରିଛନ୍ତି।  ଅଦାଲତ ବ୍ରିଜ ଭୂଷଣ ଓ ତାଙ୍କ ସହଯୋଗୀ ବିନୋଦ ତୋମରଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି। ସ୍ପେଶାଲ ଜଜ ଅଶ୍ୱିନୀ ପାୱାର ଏହି ରାୟ ଶୁଣାଇଛନ୍ତି। ଏହି ମାମଲାରେ ଦୁଇ ବର୍ଷ ଧରି ଚାଲିଥିବା ବିଚାର ପ୍ରକ୍ରିୟା ପରେ କୋର୍ଟ ଏହି ରାୟ ଦେଇଛନ୍ତି।

ଛଅ ଜଣ ମହିଳା କୁସ୍ତିଯୋଦ୍ଧା ବ୍ରିଜ ଭୂଷଣ ସିଂହ ଏବଂ WFIର ପୂର୍ବତନ ସଚିବ ବିନୋଦ ତୋମରଙ୍କ ବିରୋଧରେ ଯୌନ ନିର୍ଯାତନା ଅଭିଯୋଗ ଆଣିଥିଲେ। ରାଉଜ୍ ଆଭେନ୍ୟୁ କୋର୍ଟର ଅତିରିକ୍ତ ମୁଖ୍ୟ ବିଚାର ବିଭାଗୀୟ ମାଜିଷ୍ଟ୍ରେଟ୍ (CJM) ଅଶ୍ୱିନୀ ପନୱାର ଏହି ମାମଲାରେ ବ୍ରିଜ ଭୂଷଣ ସିଂହ ଏବଂ ବିନୋଦ ତୋମରଙ୍କୁ ଦୋଷମୁକ୍ତ କରିଛନ୍ତି।

ଅଦାଲତଙ୍କ ରାୟ ପରେ ବ୍ରିଜ ଭୂଷଣ ଶରଣ ସିଂହ କହିଛନ୍ତି, ମୁଁ ଏବେ ଏହି ବିଷୟରେ ଅଧିକ କିଛି କହିବି ନାହିଁ। ତିନି ବର୍ଷ ପରେ ଅଦାଲତ ମୋତେ ନିର୍ଦ୍ଦୋଷ ଘୋଷଣା କରିଛନ୍ତି। ଯେଉଁଦିନ ମୋ ବିରୋଧରେ ଅଭିଯୋଗ ହୋଇଥିଲା, ସେହି ଦିନ ମୁଁ କହିଥିଲି ଏହା ଏକ ଷଡ଼ଯନ୍ତ୍ର। ଆଜି ସେହି କଥା ସତ ପ୍ରମାଣିତ ହୋଇଛି। ମୋର ନିଜ ଉପରେ ପୂର୍ଣ୍ଣ ବିଶ୍ୱାସ ଥିଲା। ମୁଁ କେବେ ନିଜକୁ ଅପରାଧୀ ବୋଲି ମାନିନଥିଲି। ଯେଉଁମାନଙ୍କ ଅଧିକାର ନଷ୍ଟ ହେଉଥିଲା, ସେମାନଙ୍କ ପାଇଁ ଆମେ ଲଢ଼ୁଥିଲୁ। ଆମର ଲଢ଼େଇ ଜାରି ରହିବ। ଖେଳାଳିମାନେ ଦେଶ ପାଇଁ ଗୌରବ ଆଣିବେ ବୋଲି ସେ କହିଛନ୍ତି।

ଜୁଲାଇ ୨ ତାରିଖରେ କୋର୍ଟ ରାୟ ସଂରକ୍ଷିତ ରଖିଥିଲେ। ଏହା ସହିତ ଉଭୟ ପକ୍ଷର ଓକିଲଙ୍କୁ ଦୁଇ ସପ୍ତାହ ମଧ୍ୟରେ ଲିଖିତ ଯୁକ୍ତି ଦାଖଲ କରିବାକୁ କୋର୍ଟ ନିର୍ଦ୍ଦେଶ ଦେଇଥିଲେ।

ବ୍ରିଜ ଭୂଷଣ ସିଂହଙ୍କ ବିରୋଧରେ ଭାରତୀୟ ଦଣ୍ଡ ସଂହିତା (IPC)ର ଧାରା ୩୫୪ (ମହିଳାଙ୍କ ମର୍ଯ୍ୟାଦା ଭଙ୍ଗ କରିବା ଉଦ୍ଦେଶ୍ୟରେ ଆକ୍ରମଣ କିମ୍ବା ବଳ ପ୍ରୟୋଗ), ୩୫୪A (ଯୌନ ନିର୍ଯାତନା) ଏବଂ ୫୦୬(୧) (ଅପରାଧିକ ଧମକ) ଅନୁସାରେ ଅଭିଯୋଗ ରହିଥିଲା। ଅଭିଯୁକ୍ତ ବିନୋଦ ତୋମରଙ୍କ ବିରୋଧରେ କେବଳ ଅପରାଧିକ ଧମକ ଦେବା ଅଭିଯୋଗ ରହିଥିଲା। ଏହି ଧାରାଗୁଡ଼ିକରେ ସର୍ବାଧିକ ୫ ବର୍ଷ ପର୍ଯ୍ୟନ୍ତ ଜେଲ୍ ଦଣ୍ଡର ବ୍ୟବସ୍ଥା ରହିଛି।

Powered by Froala Editor