ହିମାଚଳ ପ୍ରଦେଶର ଲାହୌଲ ସ୍ପିତିର ପାଙ୍ଗୀ-ଉଦୟପୁର ରାସ୍ତାରେ ଏକ ବଡ଼ ଦୁର୍ଘଟଣା ଘଟିଛି। ଏଠାରେ ଏକ ଚଳନ୍ତା ଟାଟା ସୁମୋ ଗାଡ଼ି ଉପରେ ପାହାଡ଼ ଭୁଶୁଡ଼ି ପଡ଼ିବାରୁ ୧୩ ଜଣଙ୍କର ମୃତ୍ୟୁ ଘଟିଛି। ମୌସୁମୀ ବର୍ଷା ଜାରି ରହିଥିବା ବେଳେ ଏହି ଘଟଣା ଘଟିଛି ।

ଭରମୋର-ପାଙ୍ଗୀର ବିଧାୟକ ଜନକ ରାଜଙ୍କ ଅନୁସାରେ , ହିମାଚଳ ପ୍ରଦେଶର ଚମ୍ବା ଜିଲ୍ଲାରେ ଜନଜାତି ଅଧ୍ୟୁଷିତ ପାଙ୍ଗି ଉପତ୍ୟକାର କିଲାର–ଉଦୟପୁର ସଡ଼କର କାଡୁ ନାଲା ନିକଟରେ ଏହି ଅଘଟଣ ଘଟିଥିଲା। ପାହାଡ଼ର ଏକ ବଡ଼ ଅଂଶ ହଠାତ୍ ଧସିଯିବାରୁ ଟାଟା ସୁମୋ ଉପରେ ପଡ଼ିଯିବାରୁ ଗାଡ଼ିଟି ସମ୍ପୂର୍ଣ୍ଣ ଚୁନା ହୋଇଯାଇଛି। ଦୁର୍ଘଟଣାରେ ଗାଡ଼ିରେ ଯାତ୍ରା କରୁଥିବା ୧୫ ଜଣଙ୍କ ମଧ୍ୟରୁ ୧୩ ଜଣଙ୍କର ମୃତ୍ୟୁ ଘଟି ଥିବା ସୂଚନା ମିଳିଛି। ଏଥିରେ ମୃତକଙ୍କ ମଧ୍ୟରେ ଜଣେ ୬ ମାସର ଶିଶୁ ମଧ୍ୟ ସାମିଲ ଅଛି।  ଭଙ୍ଗା ପଥର ଖଣ୍ଡ ମଧ୍ୟରୁ ଜଣଙ୍କୁ ଆହତ ଅବସ୍ଥାରେ ଉଦ୍ଧାର କରାଯାଇଛି। ଦୁର୍ଘଟଣା ପରେ ଗାଡ଼ିର ପଛ ଭାଗରେ ନିଆଁ ମଧ୍ୟ ଲାଗି ଯାଇ ଥିଲା, ଯାହାର ଭିଡିଓ ସାମ୍ନାକୁ ଆସିଛି।

ଜୁଲାଇ ୨୩ରୁ ୨୬ ପର୍ଯ୍ୟନ୍ତ ରାଜ୍ୟର ବିଭିନ୍ନ ଜିଲ୍ଲା ପାଇଁ ପ୍ରବଳ ବର୍ଷାକୁ ନେଇ ୟେଲୋ ଆଲର୍ଟ ଜାରି କରାଯାଇଛି। ସେହିପରି ଜୁଲାଇ ୨୭ରୁ ୨୯ ମଧ୍ୟରେ ମୌସୁମୀ ବର୍ଷା ଆହୁରି ତୀବ୍ର ହେବା ସହ ରାଜ୍ୟର ଅନେକ ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି।

ଚଳିତ ମୌସୁମୀ ବର୍ଷା ଯୋଗୁଁ ରାଜ୍ୟର ବିଭିନ୍ନ ଅଞ୍ଚଳରେ ତାପମାତ୍ରା ପ୍ରାୟ ୪ରୁ ୫ ଡିଗ୍ରୀ ସେଲସିୟସ୍ କମିଛି। ଜୁଲାଇ ୨୬ ପର୍ଯ୍ୟନ୍ତ ତାପମାତ୍ରା ସାଧାରଣ ରହିବାର ସମ୍ଭାବନା ଥିବାବେଳେ ଜୁଲାଇ ୨୭ ପରେ ବର୍ଷା ବଢ଼ିବା ସହ ତାପମାତ୍ରା ଆହୁରି ହ୍ରାସ ପାଇପାରେ।

Powered by Froala Editor