ତିନିଜଣ ଇନ୍‌ଫ୍ଲୁଏନ୍ସର୍ ଭଉଣୀ ଜଣେ ଯୁବକଙ୍କୁ ବିବାହ କରିଛନ୍ତି। ବିବାହର ଭିଡିଓ ସାମ୍ନାକୁ ଆସିବା ପରେ ସୋସିଆଲ୍ ମିଡିଆରେ ଏହାକୁ ନେଇ ଜୋରଦାର ଚର୍ଚ୍ଚା ଆରମ୍ଭ ହୋଇଛି। ଉତ୍ତର ପ୍ରଦେଶ ଅମରୋହା ଜିଲ୍ଲାର ହସନପୁର କୋତୱାଲି ଅଞ୍ଚଳର ଧୌରିଆ ଗାଁର ଏହି ତିନି ଭଉଣୀଙ୍କ ମଧ୍ୟରୁ ଦୁଇଜଣ ନିଜ ଭଉଣୀ ଏବଂ ଜଣେ ମାଉସୀ ଝିଅ ଭଉଣୀ। ସେମାନେ ନିଜ ୟୁଟ୍ୟୁବ୍ ଚ୍ୟାନେଲ୍ "AK 1990" ମାଧ୍ୟମରେ ଭିଡିଓ ପୋଷ୍ଟ କରି ଲୋକପ୍ରିୟ ହୋଇଥିଲେ। ସେମାନଙ୍କ ଭିଡିଓ ସୁଟ୍ କରୁଥିବା  କ୍ୟାମେରାମ୍ୟାନ ବିକାଶକୁ ବିବାହ କରିଛନ୍ତି।

ଏହି ବିବାହକୁ ନେଇ ପରିବାର ସଦସ୍ୟ ଓ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଘଟଣା ସମ୍ପର୍କରେ ସୂଚନା ପାଇବା ପରେ ପୁଲିସ ସରୋଜ, ସାବିତ୍ରୀ, ସନ୍ତୋଷ ଏବଂ ବିକାଶଙ୍କୁ ଥାନାକୁ ଡାକି ପଚରାଉଚରା କରିଥିଲା। ସେମାନଙ୍କ ବୟସ ସମ୍ବନ୍ଧୀୟ ଦସ୍ତାବିଜ ମଧ୍ୟ ଯାଞ୍ଚ କରାଯାଇଥିଲା।ପୁଲିସ ସମ୍ମୁଖରେ ଚାରିଜଣ କହିଥିଲେ ଯେ, ସେମାନେ ପରସ୍ପର ସମ୍ମତିରେ ବିବାହ କରିଛନ୍ତି ଏବଂ ଏହି ସମ୍ପର୍କରେ ଖୁସି ଅଛନ୍ତି। 

ଗତ ଜୁଲାଇ ୧୭ ତାରିଖରେ ଗାଁର ଏକ ମନ୍ଦିରରେ ବିବାହ କରିଛନ୍ତି। ବୁଧବାର ଏହି ବିବାହର ଫଟୋ ଓ ଭିଡିଓ ସୋସିଆଲ୍ ମିଡିଆରେ ଭାଇରାଲ ହେଉଛି। ଭିଡିଓରେ ବିକାଶଙ୍କୁ ତିନିଜଣ ଯୁବତୀଙ୍କ ସହ ବିବାହ ଫେରା ନେଉଥିବା ଓ ସେମାନଙ୍କ ସିନ୍ଥିରେ ସିନ୍ଦୂର ପିନ୍ଧାଉଥିବା ଦେଖିବାକୁ ମିଳିଛି।

ତିନିଜଣ ଭଉଣୀ କହିଛନ୍ତି, ସେମାନେ ପିଲାଦିନରୁ କେବେ ବି ଅଲଗା ନ ହେବାକୁ ଶପଥ ନେଇଥିଲେ। ସେଥିପାଇଁ ଜଣେ ବ୍ୟକ୍ତିଙ୍କୁ ବିବାହ କରି ସମସ୍ତେ ଏକାଠି ରହିବାକୁ ନିଷ୍ପତ୍ତି ନେଇଛନ୍ତି।

Powered by Froala Editor