ନନ୍ଦନକାନନ: କଟକଣା ମଧ୍ୟରେ ନନ୍ଦନକାନନ ପ୍ରାଣୀଉଦ୍ୟାନ ଖୋଲା ଯିବାକୁ ରାଜ୍ୟ ସରକାର ଶନିବାର ଘୋଷଣା କରିଛନ୍ତି। ସରକାରଙ୍କ ଘୋଷଣା ପରେ ନନ୍ଦନକାନନ ବନ୍ୟପ୍ରାଣୀ ବିଭାଗ ଅଧିକାରୀଙ୍କର ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଛି। ଏଥିରେ ଜଙ୍ଗଲ ବିଭାଗ ସଚିବ,ପିସିସିଏଫ୍ ସହିତ ବରିଷ୍ଠ ଅଧିକାରୀମାନେ ଯୋଗଦେଇଥିଲେ। ନନ୍ଦନକାନନ ଆସନ୍ତା ସୋମବାର ଓ ମଙ୍ଗଳବାର ଖୋଲା ଯିବା ପାଇଁ ଆପାତଃ କୌଣସି ନିଷ୍ପତ୍ତି ହୋଇପାରି ନାହିଁ ବୋଲି ଉପନିର୍ଦେଶକ ଡ.ସଞ୍ଜିତ୍ କୁମାର ସୂଚନା ଦେଇଛନ୍ତି। ନନ୍ଦନକାନନ ଖୋଲିବା ପୂର୍ବରୁ ଉଦ୍ୟାନର ସମସ୍ତ ପ୍ରାକ୍ ପ୍ରସ୍ତୁତି ସାରିବା ପାଇଁ ମଧ୍ୟ ସମସ୍ତ କର୍ମଚାରୀଙ୍କୁ ନିର୍ଦେଶ ଦିଆଯାଇଛି। ତା’ସହ ପର୍ଯ୍ୟଟକଙ୍କ ପାଇଁ ତୁଣ୍ଡି,ବିଶୋଧନ ବାଧ୍ୟତାମୂଳକ କରାଯିବ। ସାମାଜିକ ଦୂରତା ସହ ମୁଖ୍ୟ ପ୍ରବେଶ ଫାଟକରେ ସମସ୍ତଙ୍କର ଥର୍ମାଲ ସ୍କ୍ରିନିଂ କରାଯିବ। କାଶ,ଥଣ୍ଡା,ଜ୍ବର ହେଉଥିଲେ ନନ୍ଦନକାନନ ଭିତରକୁ ପ୍ରବେଶ ମନା। ପର୍ଯ୍ୟଟକଙ୍କୁ ପଶୁପକ୍ଷୀଙ୍କ ଖୁଆଡର ସୁରକ୍ଷା ବାଡକୁ ସ୍ପର୍ଶ କରିବାକୁ ଦିଆଯିବ ନାହିଁ। ପର୍ଯ୍ୟଟକମାନେ ପଶୁପକ୍ଷୀ ବୁଲି ଦେଖିବା ସହ ବୋଟିଂ ଓ ବାଘ,ସିଂହ,ଭାଲୁ ଓ ତୃଣଭୋଜି ସଫାରୀର ମଜା ନେଇପାରିବେ ବୋଲି କର୍ତ୍ତୃପକ୍ଷ ସୂଚନା ଦେଇଛନ୍ତି।

ଭିତରକନିକା ଜାତୀୟ ଉଦ୍ୟାନ ପର୍ଯ୍ୟଟକଙ୍କ ପାଇଁ ଆସନ୍ତା ଅଗଷ୍ଟ ୫ ତାରିଖରୁ ଖୋଲିବ। ପୂର୍ବବର୍ଷ ଭଳି କୋଭିଡ କଟକଣା ମଧ୍ୟରେ କେବଳ ଦିନରେ ଆସୁଥିବା ପର୍ଯ୍ୟଟକମାନେ ଭିତରକନିକା ବୁଲି ସନ୍ଧ୍ୟା ପୂର୍ବରୁ ଫେରିବାକୁ ହେବ। ଏଠାରେ ରାତ୍ରିଯାପନ ପାଇଁ ପର୍ଯ୍ୟଟକଙ୍କୁ ସୁଯୋଗ ମିଳିବ ନାହିଁ। ପର୍ଯ୍ୟଟକମାନେ କୋଭିଡ କଟକଣା ମଧ୍ୟରେ ବୁଲି ଏହାର ପ୍ରାକୃତିକ ଶୋଭାରାଜିକୁ ଉପଭୋଗ କରିପାରିବେ। ମାସ୍କ ପରିଧାନ କରିବା ସହିତ ବିଶୋଧକ ବ୍ୟବହାର କରିବେ। ପ୍ରତିବର୍ଷ କୁମ୍ଭୀର ପ୍ରଜନନ ଋତୁ ପାଇଁ ମେ’ ପହିଲାରୁ ଜୁଲାଇ ୩୧ ତାରିଖ ପର୍ଯ୍ୟନ୍ତ ପର୍ଯ୍ୟଟକଙ୍କ ପାଇଁ ଭିତରକନିକା ବନ୍ଦ ରଖାଯାଇଥାଏ। ତେବେ ଚଳିତବର୍ଷ ୧ ତାରିଖ ପରିବର୍ତ୍ତେ ୫ତାରିଖରୁ ଏହା ଖୋଲିବ।

Powered by Froala Editor