ଝାଡ଼ଖଣ୍ଡରେ ଜଣେ ବିଧବା ମହିଳା ଅଭାବ ଅସୁବିଧାକୁ ପଛରେ ପକାଇ ଶାଢ଼ି ପିନ୍ଧି ଖାଲି ପାଦରେ ହୋମଗାର୍ଡ ଦୌଡ଼ ପରୀକ୍ଷାରେ ଉତ୍ତୀର୍ଣ୍ଣ ହୋଇଛନ୍ତି। ରାମଗଡ଼ରେ ହୋମ ଗାର୍ଡ ନିଯୁକ୍ତି ପାଇଁ ଚାଲିଥିବା ଶାରୀରିକ ଦକ୍ଷତା ପରୀକ୍ଷା ମଧ୍ୟରେ ରାମଗଡ଼ର ଦୁଲ୍‌ମି ବ୍ଲକ ଅନ୍ତର୍ଗତ ସୋସୋ ଗ୍ରାମର କବିତା କୁମାରୀ ତାଙ୍କର ନିଷ୍ଠା ଏବଂ ସାହସ ସହିତ ଅନ୍ୟମାନଙ୍କ ପାଇଁ ପ୍ରେରଣା ସାଜିଛନ୍ତି। 

କବିତା ଜଣେ ବିଧବା। ସେ ନିଜର ଦୁଇ ପିଲା ଏବଂ ବୃଦ୍ଧ ଶାଶୁଶ୍ୱଶୂରଙ୍କ ଦେଖାଶୁଣା କରନ୍ତି। ଦୌଡ଼ିବା ପାଇଁ ଜୋତା କିମ୍ବା ଟ୍ରାକ୍‌ସୁଟ କିଣିବାକୁ ସକ୍ଷମ ନ ଥିଲେ ମଧ୍ୟ ସେ ନିଯୁକ୍ତି ପରୀକ୍ଷା ପାଇଁ ପ୍ରସ୍ତୁତି କରି ଆସୁଥିଲେ। ସେ ପ୍ରତିଦିନ ସକାଳ ୪ଟାରେ ଉଠି ଶାଢ଼ିରେ ହିଁ ଦୌଡ଼ ଅଭ୍ୟାସ କରନ୍ତି। କବିତାଙ୍କ କହିବାନୁଯାୟୀ, ସେ ତାଙ୍କ ପିଲାମାନଙ୍କ ଏକ ଭଲ ଭବିଷ୍ୟତ ସୁରକ୍ଷିତ କରିବା ପାଇଁ ହୋମ୍‌ଗାର୍ଡରେ ଯୋଗଦେବାକୁ ଚାହାନ୍ତି। 

ରାମଗଡ଼ ଜିଲାରେ ୨୮୪ଟି ହୋମ ଗାର୍ଡ ପଦବୀ ପାଇଁ ଏହି ନିଯୁକ୍ତି ଅଭିଯାନ ଚାଲିଛି। ଯେଉଁଥିରେ ୫୦% ପଦବୀ ମହିଳାମାନଙ୍କ ପାଇଁ ସଂରକ୍ଷିତ ରହିଛି। ବିଧବା ଏବଂ ଛାଡ଼ପତ୍ର ପାଇଥିବା ମହିଳାମାନଙ୍କ ପାଇଁ ଅତିରିକ୍ତ ୫% ସଂରକ୍ଷଣ ଯୋଗାଇ ଦିଆଯାଇଛି। 

ପ୍ରଚଣ୍ଡ ଖରାରେ ଶାଢ଼ି ପିନ୍ଧି ଖାଲି ପାଦରେ ୧,୬୦୦ ମିଟର ଟ୍ରାଏଲ ଦୌଡ଼ିବା ପରେ କବିତା ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ। ସେ ନିର୍ଦ୍ଧାରିତ ୧୦ ମିନିଟ ସମୟସୀମା ବଦଳରେ ମାତ୍ର ୬ ମିନିଟ ମଧ୍ୟରେ ଦୌଡ଼ ଶେଷ କରିଥିଲେ। ତାଙ୍କ ଦୌଡ଼ର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା, ଯାହା ପରେ ଏକ ସ୍ଥାନୀୟ ଦୌଡ଼ ଦଳ ତାଙ୍କୁ ସମ୍ମାନିତ କରିବାକୁ ନିଷ୍ପତ୍ତି ନେଇଥିଲା। ଏକାଡେମୀର ସଦସ୍ୟମାନେ ମଧ୍ୟ ତାଙ୍କ ଘରକୁ ଯାଇ ତାଙ୍କୁ ସମ୍ବର୍ଦ୍ଧିତ କରିଥିଲେ।

Powered by Froala Editor