ଦୀପାବଳି ପୂର୍ବରୁ ଭେରିଏବଲ୍ ଡିଅରନେସ୍ ଆଲାଉନ୍ସ (VDA)କୁ ବୃଦ୍ଧି କରିଛନ୍ତି ସରକାର। Code on Wages, ୨୦୧୯ର ଧାରା ୬୯(୨) ଅନୁଯାୟୀ ଏହି ସଂଶୋଧନ କରାଯାଇଛି। ମହଙ୍ଗା ସ୍ଥିତିକୁ ଦେଖି ଭିଡିଏରେ ପରିବର୍ତ୍ତନ ହେଉଥିବାରୁ ଏହାର ସିଧାସଳଖ ପ୍ରଭାବ କେନ୍ଦ୍ରୀୟ କ୍ଷେତ୍ରରେ କାମ କରୁଥିବା ଶ୍ରମିକଙ୍କ ସର୍ବନିମ୍ନ ମଜୁରି ଉପରେ ପଡ଼ିବ। ଏହି ବୃଦ୍ଧି ୨୦୨୬ ଅକ୍ଟୋବର ୧ରୁ ଲାଗୁ ହେବ ବୋଲି ଶ୍ରମ ଓ ନିଯୁକ୍ତି ମନ୍ତ୍ରଣାଳୟ ଘୋଷଣା କରିଛି। ଯାହା ଅସଂଗଠିତ ଏବଂ ସର୍ବନିମ୍ନ ମଜୁରୀ ପାଉଥିବା ଶ୍ରମିକମାନଙ୍କୁ ମୁଦ୍ରାସ୍ଫୀତିର ପ୍ରଭାବକୁ କମାଇବାରେ ସାହାଯ୍ୟ କରିବା ପାଇଁ ଡିଜାଇନ୍ କରାଯାଇଛି।

ମହଙ୍ଗା ସ୍ଥିତିର ପରିବର୍ତ୍ତନକୁ ଧ୍ୟାନରେ ରଖି ବର୍ଷକୁ ଦୁଇଥର VDA ସଂଶୋଧନ କରାଯାଏ। ସାଧାରଣତଃ ଏହା ଏପ୍ରିଲ ୧ ଓ ଅକ୍ଟୋବର ୧ରୁ ଲାଗୁ ହୁଏ। ଶ୍ରମ ମନ୍ତ୍ରଣାଳୟ ଅଧୀନସ୍ଥ ଲେବର ବ୍ୟୁରୋ CPI-IWର ଗତ ୬ ମାସର ହାରାହାରି ପରିବର୍ତ୍ତନକୁ ଆଧାର କରି VDA ସଂଶୋଧନ କରେ। ଏହି ବ୍ୟବସ୍ଥାର ଉଦ୍ଦେଶ୍ୟ ହେଉଛି ମହଙ୍ଗା ସ୍ଥିତି ସହିତ ଶ୍ରମିକଙ୍କ ମଜୁରିକୁ ସମନ୍ୱୟ କରିବା। VDA ବୃଦ୍ଧି ଫଳରେ କେନ୍ଦ୍ରୀୟ କ୍ଷେତ୍ରର ସର୍ବନିମ୍ନ ମଜୁରି ହାରରେ ପରିବର୍ତ୍ତନ ହେବ। 

କେନ୍ଦ୍ରୀୟ କ୍ଷେତ୍ର ଅଧୀନରେ ଥିବା ବିଭିନ୍ନ କାମରେ ନିୟୋଜିତ ଶ୍ରମିକ ଏହି ସଂଶୋଧନରୁ ଲାଭ ପାଇପାରିବେ। ଏଥିରେ କୃଷି, ନିର୍ମାଣ ଓ ରକ୍ଷଣାବେକ୍ଷଣ, ଲୋଡିଂ-ଅନଲୋଡିଂ, ସଫେଇ, ଚୌକିଦାରୀ ଏବଂ ନିର୍ଦ୍ଦିଷ୍ଟ ଖଣି କାର୍ଯ୍ୟ ସାମିଲ ରହିଛି।

ବିଭିନ୍ନ ଖଣିରେ କାମ କରୁଥିବା ଶ୍ରମିକମାନେ ମଧ୍ୟ ଏହି ଭିଡିଏ ସଂଶୋଧନର ଅଧୀନରେ ଆସନ୍ତି। ଏଥିରେ ଜିପସମ୍, ବାରାଇଟ୍ସ, ବକ୍ସାଇଟ୍, ମାଙ୍ଗାନିଜ୍, ଚାଇନା କ୍ଲେ, କପର, କୋଇଲା ସମ୍ପର୍କିତ ଖଣି ସହିତ ଷ୍ଟୋନ୍, ଗ୍ରାନାଇଟ୍, ମାର୍ବଲ, ଲୌହ ଧାତୁ, ମାଇକା, ଲିଗ୍ନାଇଟ୍, ୟୁରାନିୟମ୍ ଏବଂ ଅନ୍ୟାନ୍ୟ ଖଣିରେ ନିୟୋଜିତ କର୍ମଚାରୀ ରହିଛନ୍ତି।

Powered by Froala Editor