ଭୁବନେଶ୍ୱର : ଅନୁଗୁଳର ଜଣେ ଲେଡି ହାବିଲଦାର ସୁମିତ୍ରା ବିଶ୍ୱାଳଙ୍କ କର୍ମକ୍ଷେତ୍ରରେ ନିର୍ଯାତନା ଅଭିଯୋଗ ପରେ ହଇଚଇ ସୃଷ୍ଟି କରିଛି।
ଲେଡି ହାବିଲଦାରଙ୍କ ଅଭିଯୋଗ ପରେ ଘଟଣାର ବିଭାଗୀୟ ଖୋଳତାଡ ଆରମ୍ଭ ହୋଇଛି। ଫୋର୍ସ ରାଇଟର ଦାୟିତ୍ୱରେ ଥିବା ହାବିଲଦାର ଶୁଭକାନ୍ତ ସାହୁ ଓ ରିଜର୍ଭ ଇନପେକ୍ଟର ତଥା ଆରଆଇ ଗୋବିନ୍ଦ ମାହାରା ଲେଡି ହାବିଲଦାରଙ୍କୁ ନିର୍ଯାତନା ଦେଉଥିବା ସେ ଅଭିଯୋଗ କରିଛନ୍ତି। ଏହାପରେ ସେ ଏସପିଙ୍କୁ ଏକ ପିଟିସନ ଦେଇ ଚାକିରି ଛାଡିବାକୁ ସ୍ଥିର କରିଛନ୍ତି ।
ଅଭିଯୋଗ ପାଇବା ପରେ ଏସପି ରାହୁଲ ଜୈନ ଜଣେ ସିନିୟର ଲେଡି ଡିଏସପି ଏବଂ ଏକ ସ୍ୱତନ୍ତ୍ର କମିଟିକୁ ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି। ଏସପି କହିଛନ୍ତି ରିପୋର୍ଟ ଆସିବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ସୂଚନାନୁଯାୟୀ, ଲେଡି ହାବିଲଦାର ଦୀର୍ଘ ଦିନ ହେବ ଅନୁଗୁଳ ପୁଲିସ ବିଭାଗରେ ହାବିଲଦାର ଭାବେ କାର୍ଯ୍ୟ କରୁଛନ୍ତି। ନିଜ ଝିଅ ସହ ସେ ଅନୁଗୁଳରେ ରୁହନ୍ତି। ସେ ଅଭିଯୋଗ କରିଛନ୍ତି ଯେ, ଜରୁରୀ କାମ ପାଇଁ ଛୁଟି ମାଗିଲେ ଆରଆଇ ଗୋବିନ୍ଦ ମାହାରା ଅନୁମତି ଦିଅନ୍ତିନି। ରାଇଟର ଶୁଭକାନ୍ତ କାମ ବାହାନାରେ ଘରୁ ଡକାଇ ଘଣ୍ଟା ଘଣ୍ଟା ଠିଆ କରି ରଖନ୍ତି। ଜାଣି ଶୁଣି ଦୂର ସ୍ଥାନକୁ ଡ୍ୟୁଟି ପକାନ୍ତି। ନୂଆ ନିଯୁକ୍ତି ପାଇଥିବା କର୍ମଚାରୀଙ୍କ ସାମ୍ନାରେ ଦୁର୍ବ୍ୟବହାର କରନ୍ତି। ଅନେକ ଅଭିଯୋଗ ପରେ କୌଣସି ପଦକ୍ଷେପ ନିଆଯାଇନଥିବାରୁ ସେ ବାଧ୍ୟ ହୋଇ ନିଜର ସୁରକ୍ଷା ଦୃଷ୍ଟିରୁ ଇସ୍ତଫା ପାଇଁ ଆବେଦନ କରିଛନ୍ତି। ସଠିକ୍ ତଦନ୍ତ ହେଲେ ନ୍ୟାୟ ମିଳିବ ବୋଲି ସେ କହିଛନ୍ତି।

Powered by Froala Editor