କେନ୍ଦୁଝର ଜିଲ୍ଲା ଚମ୍ପୁଆ ଓ ବଡ଼ବିଲ ରେଞ୍ଜ ଅଞ୍ଚଳରେ ବେଆଇନ ଲୁହାପଥର ଓ ମାଙ୍ଗାନିଜ ଉତ୍ତୋଳନ କରି ଚୋରା ଚାଲାଣ ବେଳେ ବନ ବିଭାଗ ପକ୍ଷରୁ ଭିନ୍ନ ଭିନ୍ନ ସ୍ଥାନରେ ଚଢଉ କରାଯାଇଛି । ଚଢ଼ଉ ବେଳେ ୩ଟି ଖଣିଜ ବୋଝେଇ ଟ୍ରକ ସହିତ ଗୋଟିଏ ଜେସିବି ମେସିନ ଜବତ କରାଯାଇଛି । ଜବତ ଟ୍ରକ୍ (ଜେଏଚ ୦୨ବିପି୪୦୯୪, ବିଆର୦୧ ଜିଏଲ ୫୪୮୯, ଜେଏଚ୦୨ ଏଏନ୍ ୮୪୧୦ ଓ ଖଣିଜ ଉତ୍ତାଳନରେ ବ୍ୟବହୃତ ଏକ ଜେସିବି ମେସିନ ଜବତ ହୋଇଛି । ଏ ନେଇ ବନ ବିଭାଗ ଦୁଇଟି ପୃଥକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି । କେନ୍ଦୁଝର ଡିଏଫ୍‌ଓଙ୍କ ନିର୍ଦ୍ଦେଶ କ୍ରମେ ବନାଞ୍ଚଳରେ ହେଉଥିବା ଖଣିଜ ଚୋରା କାରବାରକୁ ରୋକିବା ପାଇଁ ବିଭାଗ ପକ୍ଷରୁ ଚଢ଼ାଉ ଜାରି ରଖାଯାଇଛି । ଆଗାମୀ ଦିନରେ ଏହି ଚଢାଉକୁ ଆହୁରି ଜୋରଦାର କରାଯିବ ବୋଲି ବନପାଳ ଶ୍ରୀ ଜେନା କହିଛନ୍ତି ।

 ସୂଚନା ଅନୁଯାୟୀ, ବଡ଼ବିଲ ରେଞ୍ଜ ଅନ୍ତର୍ଗତ ଠାକୁରାଣୀ ସଂରକ୍ଷିତ ଜଙ୍ଗଲର କଳାପାହାଡ଼ ଠାରେ ଚୋରା ଖଣିଜ  ଉତ୍ତୋଳନ ଓ ପରିବହନ  ଚାଲିଥିବା ବେଳେ ଚଢାଉ କରାଯାଇ ଗୋଟିଏ ୧୪ ଚକିଆ ଟ୍ରକ, ଗୋଟିଏ ୧୬ ଚକିଆ ଟ୍ରକ୍ ଓ ଖଣିଜ ଉତ୍ତାଳନ ଓ ପରିବହନ କାର୍ଯ୍ୟରେ ନିୟୋଜିତ ଥିବା ଗୋଟିଏ ଜେସିବି ମେସିନ ଜବତ ହୋଇଛି । ସେହିପରି ଚମ୍ପୁଆ ରେଞ୍ଜ ଯୋଡା ସେକ୍ସନର ବନପାଳ ତ୍ରିନାଥ ଜେନାଙ୍କ ନେତୃତ୍ୱରେ ଏକ ଟିମ୍ ଶନିବାର ଚଢଉ କରି କମାରଯୋଡା ଠାରୁ ଗୋଟିଏ ଲୁହାପଥର ବୋଝେଇ ୧୨ ଚକିଆ ଟ୍ରକ ଜବତ କରିଛନ୍ତି ।  

Powered by Froala Editor