ଧନୁ ସଂକ୍ରାନ୍ତି ଠାରୁ ସଅଳ ଉଠି ସଅଳ ଖାଇବେ ଏକାମ୍ର ଆରାଧ୍ୟ ମହାପ୍ରଭୁ ଶ୍ରୀଲିଙ୍ଗରାଜ
ଭୁବନେଶ୍ୱର: ଆସନ୍ତା ୧୬ ତାରିଖ ତଥା ଧନୁ ସଂକ୍ରାନ୍ତି ଠାରୁ ନିତି ମାସକ ଯାଏ ସଅଳ ଉଠି ସଅଳ ଖାଇବେ ଏକାମ୍ର ଆରାଧ୍ୟ ମହାପ୍ରଭୁ ଶ୍ରୀଲିଙ୍ଗରାଜ । ନିର୍ଦ୍ଧାରିତ ନୀତି ନିର୍ଘଣ୍ଟ ମୁତାବକ ଭୋର ୫ଟାରେ ଶ୍ରୀଜିଉଙ୍କ ମଙ୍ଗଳ ଆଳତୀ ଓ ଅବକାଶ ନୀତି ବଢି ସକାଳ ୭ଟାରେ ପହିଲି ଧୂପ ଲାଗି ହେବ । ଏଥିରେ ଖିର ଗଇଁଠା ଭୋଗ ଲାଗି ହେବ।
ସେହିପରି ସାଢେ୮ଟା ସୁଦ୍ଧା ଠାକୁରାଣୀ ଧୂପ ଓ ଭୋଗ ମଣ୍ଡପ ନୀତି ବଢି ୯ଟାରେ ସାହାଣ ମେଲା ଦର୍ଶନ ଆରମ୍ଭ ହେବ । ଦ୍ୱିପହର ଧୂପ ଏବଂ ସଂନ୍ଧ୍ୟା ଧୂପରେ ବିଷୋୟୀ ସେବାୟତଙ୍କ ପ୍ରଦତ୍ତ ମୁଆଁ ଭୋଗ ସମର୍ପଣ ହେବ। ସନ୍ଧ୍ୟା ସାଢେ ୭ରେ ଅନ୍ତିମ ନୀତି ଅର୍ଥାତ ବଡ ସିଂହାର ନୀତି ବଢି ପହୁଡ ପଡିବ । ଅନୁରୂପ ଭାବେ କପିଳେଶ୍ୱର ମନ୍ଦିରରେ ମଧ୍ୟ ପହିଲି ଭୋଗ ନୀତି ପାଳନ କରାଯିବ ।
Powered by Froala Editor
