କଟକ: ବାରବାଟୀରେ ୮ ତାରିଖରେ ଟି-୨୦ କ୍ରିକେଟ୍ ଅଭ୍ୟାସ ମ୍ୟାଚ୍ ଓ ୯ ତାରିଖ ଦିନ ମ୍ୟାଚ୍ ହେବ । ଏହି ଦୁଇ ଦିନ ଖେଳ ଓ ଖେଳାଳିମାନଙ୍କୁ ଦେଖିବାକୁ ବାରବାଟୀ ଷ୍ଟାଡିୟମ୍ ଓ ଏହାର ଆଖପାଖରେ ପ୍ରବଳ ଜନସମାଗମ ହେବ । ଏଣୁ କଟକ କମିସନରେଟ୍ ପୁଲିସ ପକ୍ଷରୁ କିଛି ରାସ୍ତାରେ କଟକଣା ଜାରି କରାଯାଇଛି । ୮ ତାରିଖ ଦିନ ଅଭ୍ୟାସ ପାଇଁ ମଧ୍ୟାହ୍ନ ୧୨ଟାରୁ ରାତି ୯ଟା ପର୍ୟ୍ୟନ୍ତ ଓ ୯ ତାରିଖ ସକାଳ ୮ଟାରୁ ମଧ୍ୟରାତ୍ରି ୧୨ଟା କିମ୍ବା ଭିଡ଼ ଭାଙ୍ଗିବା ପର୍ୟ୍ୟନ୍ତ ଏହି କଟକଣା ଜାରି ରହିବ ।

ମାତାମଠ ପଟୁ ମହାନଦୀ ରିଂ ରୋଡ୍‌ରେ ଆସୁଥିବା ସମସ୍ତ ଯାନବାହନ ତଳ ବାଲିଯାତ୍ରା ପଡ଼ିଆରେ ପାର୍କିଂ କରିବେ । କେବଳ ପାସ୍ ଥିବା ଗାଡ଼ି ବାଉଁଶ ଗଡ଼ାରେ ଯାଇ ଉପର ବାଲିଯାତ୍ରା ପଡ଼ିଆରେ ଗାଡ଼ି ରଖିବେ । ହାୱଡ଼ା ମୋଟର ଛକ ଏବଂ ମଣିସାହୁ ଛକ ଆଡୁ ଆସୁଥିବା ଗାଡ଼ି ଗୀର୍ନାର ହୋଟେଲ୍ ଛକରୁ ସିଧା ମଧୁସୂଦନ ଛକ ଆଡ଼କୁ ଯାଇ ପାରିବେ ନାହିଁ । ସେହି ଗାଡ଼ି ପୁରୁଣା ଲ’ ହଷ୍ଟେଲ୍ ଛକ ଦେଇ ମହାନଦୀ ରିଂ ରୋଡ଼ରେ ଯାଇ ତଳ ବାଲିଯାତ୍ରା ପଡ଼ିଆରେ ରଖିବେ । କେବଳ ପାସ୍ ଥିବା ଗାଡ଼ି ବ୍ୟତୀତ ଅନ୍ୟ କୌଣସି ଗାଡ଼ି ବିଜୁ ପଟ୍ଟନାୟକ ଛକ କିମ୍ୱା ଚଣ୍ଡୀ ଛକ ଆଡୁ ବାରବାଟୀ ଷ୍ଟାଡିୟମ୍ ଆଡ଼କୁ ଯାଇପାରିବେ ନାହିଁ । ସେମାନେ ତଳ ବାଲିଯାତ୍ରା ପଡ଼ିଆରେ ଗାଡ଼ି ପାର୍କିଂ କରିବେ । କୌଣସି ଗାଡ଼ି ଆନନ୍ଦ ଭବନ ଛକରୁ ବାରବାଟୀ ଦୁର୍ଗ ଦେଇ ବାଲିଯାତ୍ରା ପଡ଼ିଆ ଆଡ଼କୁ ଯାଇପାରିବେନି । ସେମାନେ କ୍ୟାଣ୍ଟନମେଣ୍ଟ୍ ଥାନା ଛକ ଦେଇ ତଳ ବାଲିଯାତ୍ରା ପଡ଼ିଆରେ ଗାଡ଼ି ରଖିବେ । ସମାଜ ଅଫିସ୍ ଛକ ଆଡୁ ଆସୁଥିବା ଗାଡ଼ି ମଧ୍ୟରୁ ପାସ୍ ଥିବା ଗାଡ଼ି ବ୍ୟତୀତ ଅନ୍ୟ କୌଣସି ଗାଡ଼ି ହନୁମାନ ମନ୍ଦିର ଛକରୁ ସିଧା ମଧୁସୂଦନ ଷ୍ଟାଚ୍ୟୁ ଆଡ଼କୁ ଯାଇ ପାରିବେନି ।

ଓଡ଼ିଶା କ୍ରିକେଟ୍ ଏକାଡ଼େମୀ ପଡ଼ିଆରେ ଗାଡ଼ି ପାର୍କିଂ କରିବାକୁ ପାସ୍ ଥିଲେ ସେମାନେ ୱାଇଏମ୍‌ସିଏ ରାସ୍ତା ଓ ଲାୟନ୍ସ ଚକ୍ଷୁ ଚିକିତ୍ସାଳୟ ଦେଇ ଗାଡ଼ିକୁ ପାର୍କିଂ କରି ପାରିବେ । ରିଜର୍ଭ ପୁଲିସ୍ ଲାଇନ୍ ଆଡୁ ଆସୁଥିବା ଗାଡ଼ି ଓଡ଼ିଶା ପୁଲିସ ସଂଘ କାର୍ୟ୍ୟାଳୟରୁ ବାରବାଟୀ ଷ୍ଟାଡିୟମ୍ ଆଡ଼କୁ ଯାଇ ପାରିବେ ନାହିଁ । ପାସ୍ ଥିବା ଯାନ ବ୍ୟତୀତ କୌଣସି ଗାଡ଼ି ମଧୁସୂଦନ ଷ୍ଟାଚ୍ୟୁ ଛକରୁ ଓ ଲାୟନ୍ସ ଆଇ ହସ୍ପିଟାଲ୍ ଛକରୁ କିଲ୍‌ଖାନା ରାସ୍ତା ଦେଇ ବାରବାଟୀ ଷ୍ଟାଡିୟମ୍ ଆଡ଼କୁ ଯାଇ ପାରିବେ ନାହିଁ । ସେମାନେ ମହାନଦୀ ରିଂ ରୋଡ଼ରେ ଯାଇ ତଳ ବାଲିଯାତ୍ରା ପଡ଼ିଆରେ ପାର୍କିଂ କରିବେ ।

Powered by Froala Editor