ସୁନା ଓ ରୁପା ଦର ଅପହଞ୍ଚ ସ୍ତରରେ ପହଞ୍ଚିଛି । ୧୦ ଗ୍ରାମ ପିଛା ସୁନା ଦର ଲକ୍ଷେ ୨୫ ହଜାର ଟଙ୍କା ଉପରକୁ ଚାଲିଯାଇଥିବାବେଳେ କିଲୋଗ୍ରାମ ପିଛା ରୁପା ଦର ୨ ଲକ୍ଷ ଆଡ଼କୁ ମୁହାଁଇଲାଣି । ମୂଲ୍ୟବାନ ଧାତୁରେ ନିବେଶ କରିବାକୁ ଚାହୁଁଥିବା ନିବେଶକମାନେ ସୁନାକୁ ଛାଡ଼ି ରୂପାକୁ ଅଧିକ ପସନ୍ଦ କରୁଛନ୍ତି। ରୂପାର ମୂଲ୍ୟ ସୁନାଠାରୁ ଦ୍ରୁତଗତିରେ ବୃଦ୍ଧି ପାଇ ଅଧିକ ଲାଭ ଦେଉଛି। 

ଆଜି ଅର୍ଥାତ୍‌ ସୋମବାର ରୁପା ଦରରେ ଦେଖାଦେଇଛି ସର୍ବବୃହତ୍‌ ରେକର୍ଡ । ଦିନକରେ ୭,୦୦୦ ଟଙ୍କା ଉପରକୁ ଉଠିଯାଇଛି ଦର । ଭୁବନେଶ୍ୱରରେ କିଲୋଗ୍ରାମ ପିଛା ରୁପା ଦର ୧.୯୭ ଲକ୍ଷ ଟଙ୍କାରେ ପହଞ୍ଚିଛି ।

ଅନ୍ୟପକ୍ଷରେ, ଜାତୀୟ ରାଜଧାନୀ ଦିଲ୍ଲୀରେ ରୁପା ଦରରେ ୧୦,୦୦୦ ଟଙ୍କାରୁ  ଅଧିକ ବୃଦ୍ଧି ଘଟିଥିବା ଇଣ୍ଡିଆ ବୁଲିୟନ ଆଣ୍ଡ୍‌  ଜୁଏଲର୍ସ ଆସୋସିଏସନ୍‌ (ଆଇବିଜେଏ)  ରିପୋର୍ଟରୁ ଜଣାପଡ଼ିଛି । ସେହିଭଳି ରାଜଧାନୀ ଭୁବନେଶ୍ୱରରେ ୧୦ ଗ୍ରାମ ପିଛା ୨୪ ଏବଂ ୨୨ କ୍ୟାରେଟ୍‌ ସୁନା ଦରରେ ଯଥାକ୍ରମେ ୩୨୦ ଏବଂ ୩୦୦ ଟଙ୍କା ବୃଦ୍ଧି  ଘଟିଛି । ଉଭୟର ଦର ଯଥାକ୍ରମେ ୧,୨୫,୪୦୦ ଟଙ୍କା ଏବଂ ୧,୧୪,୯୫୦ ଟଙ୍କା ହୋଇଛି ।

ସୁନା ଏବଂ ରୁପା ଦର ବଢ଼ିବାର ଅନେକ  କାରଣ ରହିଛି । ଆମେରିକା ରାଷ୍ଟ୍ରପତି ଡୋନାଲ୍ଡ  ଟ୍ରମ୍ପଙ୍କ ଟାରିଫ୍‌ ନୀତି ବିଶ୍ୱ ବଜାରରେ ସୃଷ୍ଟି  କରିଛି ଅସ୍ଥିରତା । ଏହାର ସିଧାସଳଖ ପ୍ରଭାବ  ଅନୁଭବ ହୋଇଛି ବିଶ୍ୱ ପୁଞ୍ଜି ବଜାର ଉପରେ ।  ପୁଞ୍ଜି ବଜାରର ଅସ୍ଥିରତା ମଧ୍ୟରେ ସୁନାରେ  ନିବେଶକୁ ସୁରକ୍ଷିତ ମଣୁଛନ୍ତି ନିବେଶକ ।

ବିଶେଷଜ୍ଞମାନେ କହୁଛନ୍ତି, ଭାରତୀୟ ତାଙ୍କର ମୂଲ୍ୟ ଡଲାର ତୁଳନାରେ ଦୁର୍ବଳତା, ଆମଦାନୀ ମହଙ୍ଗା ହେବା, ବିଶ୍ୱ ବଜାରରେ ଅନିଶ୍ଚିତତା, ରାଜନୈତିକ ସଂଘର୍ଷ ଓ ଆମେରିକୀୟ ଟାରିଫ୍ ନୀତି ଏହାର କାରଣ। ରୂପାର ଶିଳ୍ପ ପ୍ରୟୋଗରେ ବ୍ୟାପକ ବ୍ୟବହାର ମଧ୍ୟ ଚାହିଦା ବଢ଼ାଉଛି।

ଏହି ଟ୍ରେଣ୍ଡରେ ନିବେଶକମାନେ ରୂପାକୁ ସୁନାଠାରୁ ଅଧିକ ଆକର୍ଷଣୀୟ ବିଚାର କରୁଛନ୍ତି, କାରଣ ଏହା ଦ୍ରୁତ ମୂଲ୍ୟ ବୃଦ୍ଧି ଓ ଭଲ ଲାଭ ଦେଉଛି।

Powered by Froala Editor