ଭୁବନେଶ୍ବର: ରାଜ୍ୟରେ ଗତ ୫ ବର୍ଷ ମଧ୍ୟରେ ପ୍ରାୟ ୫୬ ହଜାରରୁ ଊର୍ଦ୍ଧ୍ବ ସଡ଼କ ଦୁର୍ଘଟଣା ଘଟିଥିବା ବେଳେ ପ୍ରାୟ ୨୭ ହଜାରରୁ ଊର୍ଦ୍ଧ୍ବ ବ୍ୟକ୍ତିଙ୍କ ଜୀବନ ଯାଇଛି। ୨୦୨୦ରୁ ୨୦୨୪ ମଧ୍ୟରେ ରାଜ୍ୟରେ ମୋଟ ୫୬ ହଜାର ୮୩୧ ସଡ଼କ ଦୁର୍ଘଟଣା ଘଟିଥିବା ଏସ୍‌ଟିଏ ପକ୍ଷରୁ ପଞ୍ଜିକୃତ ହୋଇଛି। ୫ ବର୍ଷ ମଧ୍ୟରେ ୨୭ ହଜାର ୧୬୭ ଲୋକଙ୍କ ଜୀବନ ସଡ଼କ ଦୁର୍ଘଟଣାରେ ଯାଇଛି। ବିଭାଗ ପକ୍ଷରୁ ପଞ୍ଜିକୃତ ତଥ୍ୟରେ ୨୭ ହଜାରରୁ ଅଧିକ ଜୀବନ ଯାଇଥିବା ବେଳେ କେତେକ ଦୁର୍ଘଟଣା ପଞ୍ଜିକୃତ ହୋଇ ନାହିଁ। ରାତିରେ ଦ୍ରୁତଗତିରେ ଗାଡ଼ି ଚାଳନା, ମଦ୍ୟପାନ କରି ଗାଡ଼ି ଚାଳନା ସହ ଟ୍ରାଫିକ୍‌ ନିୟମ ଭାଙ୍ଗିବା ଯୋଗୁଁ ଦୁର୍ଘଟଣା ବଢୁଛି। ମୋଟ ଦୁର୍ଘଟଣାର ପ୍ରାୟ ୬୫ % ବୁଧବାର, ଶୁକ୍ରବାର ଏବଂ ରବିବାର ଘଟୁଛି। ବିଶେଷ କରି ଆମିଷ ବାରିରେ ମଦ୍ୟପାନ କରି ବେପରୁଆ ଗାଡ଼ି ଚାଳନା ଯୋଗୁଁ ଅଧିକ ଦୁର୍ଘଟଣା ଘଟୁଛି।
ସାରା ରାଜ୍ୟରେ ୨୦୨୦ରେ ମୋଟ ୯ ହଜାର ୮୧୭ ସଡ଼କ ଦୁର୍ଘଟଣା ଘଟିଥିବା ବେଳେ ଏଥିରେ ୪ ହଜାର ୭୩୮ ଲୋକଙ୍କ ଜୀବନ ଯାଇଛି। ୨୦୨୧ରେ ୧୦ ହଜାର ୯୮୪ ସଡ଼କ ଦୁର୍ଘଟଣାରେ ୫ ହଜାର ୮୧ ଜଣଙ୍କ ଜୀବନ ଯାଇଥିବାବେଳେ ୨୦୨୨ରେ ୧୧,୬୬୩ ସଡ଼କ ଦୁର୍ଘଟଣାରେ ୫୪୬୭ , ୨୦୨୩ରେ ୧୧,୯୯୨ ଦୁର୍ଘଟଣାରେ ୫,୭୩୯, ୨୦୨୪ରେ ସର୍ବାଧିକ ୧୨ ହଜାର ୩୭୫ ଦୁର୍ଘଟଣାରେ ୬, ୧୪୨ ଜଣ ପ୍ରାଣ ହରାଇଛନ୍ତି। ସଡ଼କ ଦୁର୍ଘଟଣା ରୋକିବା ପାଇଁ ପୁଲିସ ସହ ମିଳିତ ଭାବେ ସ୍ବତନ୍ତ୍ର ଯାଞ୍ଚ କରାଯାଇ ନିଶାସକ୍ତଙ୍କୁ ଗାଡ଼ି ଚାଳନାରୁ ନିବୃତ କରାଇବାକୁ ବାର୍ତ୍ତା ଦିଆଯାଉଛି। ଧରପଗଡ଼ ଅଭିଯାନରେ ନିଶାସକ୍ତ ଚାଳକଙ୍କୁ ଜୋରିମାନା କରାଯାଉଛି। ଗ୍ରାମାଞ୍ଚଳର ଯୁବବର୍ଗ ସଡ଼କ ଦୁର୍ଘଟଣାରେ ଅଧିକ କ୍ଷତିଗ୍ରସ୍ତ ହେଉଥିବା ଦେଖିବାକୁ ମିଳିଛି। ବୁଧବାର ସବୁଠାରୁ ଅଧିକ ଦୁର୍ଘଟଣା ଘଟୁଥିବାରୁ ଏହାକୁ ଦୃଷ୍ଟିରେ ରଖି ସବୁ ଜିଲା ପରିବହନ କାର୍ଯ୍ୟାଳୟ ପକ୍ଷରୁ ବୁଧବାରକୁ ଶୂନ୍ୟ ସହନଶୀଳ ଦିବସ ଭାବେ ଯାଞ୍ଚ କରାଯାଉଛି।

Powered by Froala Editor