ଜମ୍ମୁ-କାଶ୍ମୀରରେ ପ୍ରବଳ ବର୍ଷା ଯୋଗୁଁ ଭୟଙ୍କର ବିପର୍ଯ୍ୟୟ ସୃଷ୍ଟି ହୋଇଛି। ବୈଷ୍ଣୋ ଦେବୀ ଯାତ୍ରା ମାର୍ଗରେ ଏକ ବଡ଼ ଭୂସ୍ଖଳନ ଘଟିଛି। ଏହି ଦୁର୍ଘଟଣାରେ ୫ ଜଣ ଶ୍ରଦ୍ଧାଳୁଙ୍କର ମୃତ୍ୟୁ ହୋଇଛି ଏବଂ ୧୪ ଜଣ ଯାତ୍ରୀ ଆହତ ହୋଇଥିବା ଜଣାପଡ଼ିଛି। ଭୂସ୍ଖଳନ ଯୋଗୁଁ ବୈଷ୍ଣୋ ଦେବୀ ଯାତ୍ରାକୁ ବନ୍ଦ କରାଯାଇଛି।

ସୋମବାର ବିଳମ୍ବିତ ରାତିରୁ ପ୍ରବଳ ଏବଂ ନିରନ୍ତର ବର୍ଷା ହେବା ପରେ ମାତା ବୈଷ୍ଣୋ ଦେବୀଙ୍କ ପବିତ୍ର ମନ୍ଦିର ଯାତ୍ରାକୁ ଅସ୍ଥାୟୀ ଭାବରେ ସ୍ଥଗିତ ରଖାଯାଇଛି। ଶ୍ରୀ ମାତା ବୈଷ୍ଣୋ ଦେବୀ ମନ୍ଦିର ବୋର୍ଡର ଅଧିକାରୀଙ୍କ ଅନୁଯାୟୀ, ପ୍ରବଳ ବର୍ଷା ପରେ ହିମକୋଟୀ ମାର୍ଗକୁ ପ୍ରଥମେ ବନ୍ଦ କରାଯାଇଥିଲା। ପାଗରେ ଉନ୍ନତି ନ ଘଟିବାରୁ, ବୋର୍ଡ ସମ୍ପୂର୍ଣ୍ଣ ଯାତ୍ରାକୁ କିଛି ଘଣ୍ଟା ପାଇଁ ସ୍ଥଗିତ ରଖିବାକୁ ନିଷ୍ପତ୍ତି ନେଇଥିଲା। ଅଧକୁଆଁରୀ ନିକଟରେ ଭୂସ୍ଖଳନରେ ଅନେକ ଲୋକ ଆହତ ହୋଇଛନ୍ତି। ସେଠାରେ ଉଦ୍ଧାର କାର୍ଯ୍ୟ ଜାରି ରହିଛି।

ଅଧକୁଆଁରୀ ସ୍ଥିତ ଇନ୍ଦ୍ରପ୍ରସ୍ଥ ଭୋଜନାଳୟ ନିକଟରେ ଅପରାହ୍ନ ପ୍ରାୟ ୩ଟା ସମୟରେ ଭୂସ୍ଖଳନ ଘଟିଛି। ଅଧିକାରୀମାନେ କହିଛନ୍ତି ଯେ ପାହାଡ଼ ଉପରେ ଅବସ୍ଥିତ ମନ୍ଦିରକୁ ଯାଇଥିବା ୧୨ କିଲୋମିଟର ବଙ୍କା ରାସ୍ତାର ପ୍ରାୟ ଅଧା ରାସ୍ତାରେ ଏହି ଘଟଣା ଘଟିଛି । ହିମକୋଟି ମାର୍ଗରେ ଯାତ୍ରା ସକାଳୁ ସ୍ଥଗିତ ରଖାଯାଇଥିଲା, କିନ୍ତୁ ଅପରାହ୍ନ ୧.୩୦ ପର୍ଯ୍ୟନ୍ତ ପୁରୁଣା ମାର୍ଗରେ ଯାତ୍ରା ଜାରି ରହିଥିଲା। ତେବେ ମୂଷଳଧାରା ବର୍ଷାକୁ ଦୃଷ୍ଟିରେ ରଖି ଅଧିକାରୀମାନେ ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ଏହି ମାର୍ଗରେ ମଧ୍ୟ ଯାତ୍ରା ସ୍ଥଗିତ ରଖିବାକୁ ନିଷ୍ପତ୍ତି ନେଇଛନ୍ତି।

ପ୍ରଶାସନ ଭକ୍ତମାନଙ୍କୁ କୌଣସି ପ୍ରକାରର ଗୁଜବରେ ଧ୍ୟାନ ନ ଦେବାକୁ କହିଛି। ଏହା ସହିତ, ଶ୍ରାଇନ ବୋର୍ଡର ସରକାରୀ ଚ୍ୟାନେଲ ମାଧ୍ୟମରେ ଜାରି କରାଯାଇଥିବା ଅପଡେଟ୍ ଅନୁସରଣ କରିବାକୁ ସେମାନଙ୍କୁ ଅନୁରୋଧ କରାଯାଇଛି।

Powered by Froala Editor