ଆର୍ଟିଫିସିଆଲ୍ ଇଣ୍ଟେଲିଜେନ୍ସି (ଏଆଇ)ର ଗଡ୍‌ଫାଦର କୁହାଯାଉଥିବା ନୋବେଲ୍ ବିଜେତା ଜେଫ୍ରି ହିଣ୍ଟନ୍ ଏଆଇକୁ ଏଲିଅନ ସହ ତୁଳନା କରିଛନ୍ତି । ଏଆଇ ସିଷ୍ଟମକୁ କଣ୍ଟ୍ରୋଲରେ ରଖିବା ପାଇଁ ରିସର୍ଚ୍ଚ କରିବା ଦରକାର, ଫଳରେ ଦୁନିଆ ଉପରେ କବଜା କରିପାରିବେ ନାହିଁ ବୋଲି ସତର୍କ କରାଇଛନ୍ତି ।

ସେ ଏକ ୟୁଟ୍ୟୁବ ଚ୍ୟାନେଲରେ ବିଜନେସମ୍ୟାନ ଆଣ୍ଡ୍ରୁ କିନଙ୍କ ସହ ଆଲୋଚନା କରି ପୁଣି ଥରେ ଚେତାବନୀ ଦେଇଛନ୍ତି । ଏଆଇ ବିପଦକୁ ସେ ପରମାଣୁର ଘାତକତାଠାରୁ ଅଧିକ ବୋଲି କହିଛନ୍ତି । ପରମାଣୁ ହତିଆର କେବଳ ବିନାଶକାରୀ । ବୁଦ୍ଧିମାନ ନୁହେଁ । କିନ୍ତୁ ଏଆଇ ସିଷ୍ଟମ ନିଜେ ଯୋଜନା କରିପାରିବ । ହିଣ୍ଟନ କହିଛନ୍ତି, ଆମେ ଏପରି ସିଷ୍ଟମ ତିଆରି କରୁଛୁ, ଯାହା ମଣିଷଠାରୁ ମଧ୍ୟ ଅଧିକ ବୁଦ୍ଧିମାନ ହୋଇପାରେ । ଏହା ଏଲିଅନ୍ ପରି, ଯିଏ ବୁଝିବାର ଶକ୍ତି ରଖୁଛି । ହିଣ୍ଟନ ଏଥିପାଇଁ ସଦ୍ୟ ହୋଇଥିବା ରିସର୍ଚ୍ଚର ଉଦାହରଣ ଦେଇଛନ୍ତି ।

ଉଲ୍ଲେଖଯୋଗ୍ୟ ଯେ ଆନ୍ଥ୍ରୋପିକ୍ ନାମକ କମ୍ପାନି ନିଜ କ୍ଲାଉଡ୍ ଓପସ ୪ ମଡେଲରେ ଏକ ପ୍ରୟୋଗ କରିଥିଲା । ଏହି ପ୍ରୟୋଗରେ ମଡେଲ ଜଣେ ଇଞ୍ଜିନିୟରଙ୍କୁ ବ୍ଲାକମେଲ୍ କରିବା ପାଇଁ ଉଦ୍ୟମ କରୁଥିଲା । ମଡେଲ ଇଞ୍ଜିନିୟରଙ୍କୁ ତାଙ୍କ ଗୋପନୀୟ ତଥ୍ୟ ଦେବା ପାଇଁ ଧମକାଇଥିଲା, ଫଳରେ ନିଜକୁ ସେ ମୁକ୍ତ ରଖିପାରିବ । ଜେଫ୍ରି ହିଣ୍ଟନ ଏହି ଘଟଣାକୁ ଚିନ୍ତାଜନକ କହିଛନ୍ତି । 

ନୋବେଲ ପୁରସ୍କାର ବିଜେତା  କମ୍ପ୍ୟୁଟର ବୈଜ୍ଞାନୀ ହିଣ୍ଟନ ଏଆଇ ତିଆରିରେ ପ୍ରମୁଖ ଭୂମିକା ଗ୍ରହଣ  କରିଥିଲେ । ଏଥିପାଇଁ ସେ ନିଜକୁ ଗୌରବାନ୍ୱିତ ମନେ କରୁଥିଲେ ।  କିନ୍ତୁ ଆଜି ତାଙ୍କ ଆଭିମୁଖ୍ୟ ବଦଳି  ଯାଇଛି । ହିଣ୍ଟନ ଆହୁରି କହିଛନ୍ତି, ଯଦି ଜେମ୍ସ ୱେବ ଟେଲିସ୍କୋପରେ ଆଗାମୀ ୧୦ ବର୍ଷ ପରେ ଏଲିଅନ୍ ଆଟାକ୍ ଖବର ଜଣାପଡ଼ିବ, ତେବେ ଭୟଭୀତ ହେବା । କିନ୍ତୁ ଆମେ ନିଜେ ଏପରି ଏଲିଅନ୍ସ ତିଆରି କରୁଛି । ଏମାନେ କଥା ବୁଝୁଛନ୍ତି ଓ ଲୋକଙ୍କୁ ବ୍ଲାକମେଲ୍ କରିବା ପାଇଁ ଯୋଜନା ବି ତିଆରି କରିପାରନ୍ତି । ଏହାକୁ ଗମ୍ଭୀରତାର ସହ ନିଆଯିବା ଦରକାର । 

Powered by Froala Editor