ଦେଶର ସମସ୍ତ ମୁଖ୍ୟମନ୍ତ୍ରୀମାନଙ୍କ ସମ୍ପତ୍ତି ମିଶି ଯେତିକି ହେବ, ତା’ଠାରୁ ବି ଅଧିକ ହେବ ଏହି ଜ‌ଣେ ମୁଖ୍ୟମନ୍ତ୍ରୀଙ୍କ ସମ୍ପତ୍ତିର ପରିମାଣ। ଏହି ବ୍ୟକ୍ତି ଜଣକ ହେଉଛନ୍ତି ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ। ୯୩୧ କୋଟି ଟଙ୍କାରୁ ଅଧିକ ସମ୍ପତ୍ତିର ଅଧିକାରୀ ହେଉଛନ୍ତି ଚନ୍ଦ୍ରବାବୁ।

ରିପୋର୍ଟ ଅନୁଯାୟୀ, ୧୫ ଲକ୍ଷ ଟଙ୍କାରୁ କିଛି ଅଧିକ ସମ୍ପତ୍ତି ଥିବା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ସମସ୍ତ ୩୧ ମୁଖ୍ୟମନ୍ତ୍ରୀଙ୍କ ମଧ୍ୟରେ ସବୁଠାରୁ ଗରିବ। ଗତ ବିଧାନସଭା ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀମାନେ ଦାଖଲ କରିଥିବା ସତ୍ୟପାଠରେ ଉଲ୍ଲେଖ କରାଯାଇଥିବା ତଥ୍ୟରୁ ଏହି ତାଲିକା ପ୍ରସ୍ତୁତ କରାଯାଇଛି।

ସମ୍ପତି ତାଲିକାରେ ୩୦ ଜଣ ମୁଖ୍ୟମନ୍ତ୍ରୀଙ୍କ ଭିତରୁ ଶତକଡା ୧୦୦ ଭାଗରୁ ୫୭ ଭାଗ କେବଳ ଚନ୍ଦ୍ରବାବୁ ନାଇଡୁଙ୍କ ପାଖରେ ରହିଛି। ୩୦ ମୁଖ୍ୟମନ୍ତ୍ରୀଙ୍କ ମୋଟ ସମ୍ପତ୍ତିର ପରିମାଣ ହେଉଛି ୧୬୩୨ କୋଟି। ତାହା ମଧ୍ୟରୁ ୫୭ ପ୍ରତିଶତ ହେଉଛି ଚନ୍ଦ୍ରବାବୁଙ୍କର। ୯୩୧ କୋଟିର ସମ୍ପତ୍ତି ମଧ୍ୟରୁ ୮୧୦ କୋଟି ସ୍ଥାବର ଏବଂ ୧୨୧ କୋଟିର ଅସ୍ଥାବର ସମ୍ପତ୍ତିର ଅଧିକାରୀ ଚନ୍ଦ୍ରବାବୁ ନାଇଡୁ।

ମମତାଙ୍କ ପାଖରେ ମାତ୍ର ୧୫ ଲକ୍ଷ ଟଙ୍କାର ସମ୍ପତ୍ତି ରହିଛି। ଯାହା ଅନ୍ୟ ମୁଖ୍ୟମନ୍ତ୍ରୀମାନଙ୍କ ତୁଳନାରେ ସବୁଠୁ କମ୍‌। ଏଡିଆର ଏବଂ ଜାତୀୟ ନିର୍ବାଚନ ବେଞ୍ଚର ଏକ ରିପୋର୍ଟରୁ ଏହି ସୂଚନା ମିଳିଛି।

ରିପୋର୍ଟ ଅନୁସାରେ, ଅରୁଣାଚଳ ପ୍ରଦେଶ ମୁଖ୍ୟମନ୍ତ୍ରୀ ପେମା ଖଣ୍ଡୁଙ୍କ ସମ୍ପତ୍ତି ପରିମାଣ ୩୨୨ କୋଟି ହୋଇଥିବାବେଳେ କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଦରମେୟାଙ୍କ ସମ୍ପତ୍ତି ୫୧ କୋଟି ବୋଲି ଜଣାପଡ଼ିଛି। ଓଡ଼ିଶାର ମୁଖ୍ୟମନ୍ତ୍ରୀ ମୋହନ ମାଝୀଙ୍କର ୧ କୋଟି ୯୭ ଲକ୍ଷ ଟଙ୍କାର ସମ୍ପତ୍ତି ରହିଛି।

ସେପ୍ଟେମ୍ବର ୩୦, ୨୦୨୧ରେ ଭବାନୀପୁର ବିଧାନସଭା ଆସନ ପାଇଁ ହୋଇଥିବା ଉପନିର୍ବାଚନ ପୂର୍ବରୁ ମମତା ବାନାର୍ଜୀ  ସତ୍ୟପାଠ ଦାଖଲ କରିଥିଲେ। ୨୦୨୦-୨୧ରେ ସେ ଦାଖଲ କରିଥିବା ଆୟକର ରିଟର୍ଣ୍ଣରେ ତାଙ୍କ ସମ୍ପତ୍ତିର ମୂଲ୍ୟ ୧୫.୪ ଲକ୍ଷ ଟଙ୍କା ଥିଲା। ୨୦୧୬ ବିଧାନସଭା ନିର୍ବାଚନ ସମୟରେ ତାଙ୍କ ସମ୍ପତ୍ତିର ମୂଲ୍ୟ ୩୦.୪ ଲକ୍ଷ ଟଙ୍କା ଥିଲା। ସତ୍ୟପାଠରେ ସେ ଦର୍ଶାଇଛନ୍ତି ଯେ ତାଙ୍କ ପାଖରେ ନଗଦ ଟଙ୍କା ୬୯,୨୫୫ ଟଙ୍କା ଥିବା ବେଳେ ୧୩.୫ ଲକ୍ଷ ଟଙ୍କାର ବ୍ୟାଙ୍କ ବାଲାନ୍ସ ରହିଛି, ଯେଉଁଥିରେ ତାଙ୍କ ନିର୍ବାଚନ ଖର୍ଚ୍ଚ ଖାତାରେ ଦେଢ଼ ଲକ୍ଷ ଟଙ୍କା ରହିଛି।

Powered by Froala Editor