ଭାରତୀୟ ରେଳବିଭାଗ ଯାତ୍ରୀଙ୍କ ଉପରେ ଲଗାମ ଲଗାଇବାକୁ ଯୋଜନା ପ୍ରସ୍ତୁତ କରିଛି। ଟ୍ରେନରେ ଟ୍ରଲି ବ୍ୟାଗ, ଶସ୍ୟ ବସ୍ତା, ବଡ଼ ବାକ୍ସ ଓ ଘରୋଇ ସାମଗ୍ରୀ ନେଇ ଚଢ଼ୁଥିବା ଯାତ୍ରୀଙ୍କୁ ଏବେ ସତର୍କ ରହିବାକୁ ପଡ଼ିବ। ରେଲୱେ ନିର୍ଦ୍ଧାରିତ ମାଗଣା ସାମଗ୍ରୀ ସୀମା (ଫ୍ରି ଆଲାଉନ୍ସ) ଅପେକ୍ଷା ଅଧିକ ସାମଗ୍ରୀ ନେଇ ଯାତ୍ରା କରୁଥିବା ଯାତ୍ରୀଙ୍କ ଉପରେ ଲଗେଜ ବୁକିଂ ହାରର ୬ ଗୁଣ ଜରିମାନା ଲଗାଇବାକୁ ଯୋଜନା କରୁଛି।

ଏଥିପାଇଁ, ଉତ୍ତର କେନ୍ଦ୍ରୀୟ ରେଳବାଇର ପ୍ରୟାଗରାଜ ଡିଭିଜନ ଜଙ୍କସନ ସମେତ ପ୍ରମୁଖ ଷ୍ଟେସନଗୁଡ଼ିକରେ ଇଲେକ୍ଟ୍ରୋନିକ୍ ଓଜନ ମେସିନ୍ ସ୍ଥାପନ କରିବାକୁ ଯାଉଛି। ଯାତ୍ରୀମାନେ ଏହି ମେସିନ୍ ମାଧ୍ୟମରେ ସେମାନଙ୍କର ଲଗେଜ ଓଜନ କରିବେ।

ଯଦି ଓଜନ ସମୟରେ ଲଗେଜ୍ ନିର୍ଦ୍ଧାରିତ ସୀମାଠାରୁ ଅଧିକ ହୁଏ, ତେବେ ଯାତ୍ରୀଙ୍କୁ ଏଥିପାଇଁ ଅତିରିକ୍ତ ଶୁଳ୍କ ଦେବାକୁ ପଡିବ। ସୂଚନା ଅନୁଯାୟୀ, ଯଦି ଜଣେ ଯାତ୍ରୀ ନିର୍ଦ୍ଧାରିତ ସୀମାଠାରୁ ଅଧିକ ଲଗେଜ୍ ସହିତ ଯାତ୍ରା କରିବାକୁ ଚାହାଁନ୍ତି, ତେବେ ସେ ଆଗୁଆ ବୁକିଂରେ ଶୁଳ୍କ ଦେଇପାରିବେ। ଯଦି ସେ ନିର୍ଦ୍ଧାରିତ ସୀମାଠାରୁ ଅଧିକ ଲଗେଜ୍ ପାଇଁ ଶୁଳ୍କ ଦେଇନାହାଁନ୍ତି, ତେବେ ତାଙ୍କୁ ଜରିମାନା ଦେବାକୁ ପଡିବ।

ବର୍ତ୍ତମାନ ରେଳ ଯାତ୍ରା ଆରାମ ଓ ସୁବିଧା ପରିବର୍ତ୍ତେ ବୋଝବୁହା ଭଳି ହୋଇଯାଉଛି। କାରଣ ଯାତ୍ରୀମାନେ କେବଳ ୨-୩ଟି ବଡ଼ ଟ୍ରଲି ବ୍ୟାଗ ନେଇ ନ ଥାନ୍ତି, ବରଂ ଅନେକ ସମୟରେ ଶସ୍ୟ ବସ୍ତା, ଘରୋଇ ଫର୍ନିଚର, ଏଲ୍‌ଇଡି, ବାସନକୁସନ ଏବଂ ଦୋକାନର ସାମଗ୍ରୀ ମଧ୍ୟ ଟ୍ରେନରେ ଭର୍ତ୍ତି କରି ନେବା ନଜିର ରହିଛି। ଏହା ଦ୍ୱାରା ଅନ୍ୟ ଯାତ୍ରୀଙ୍କୁ ଅସୁବିଧା ହେବା ସହ ସୁରକ୍ଷା ଓ ଜାଗା ଅଭାବର ସମସ୍ୟା ଦେଖାଦେଉଛି। ରେଳବାଇ ଅନୁଯାୟୀ ସମସ୍ତ ଯାତ୍ରୀଙ୍କ ସୁରକ୍ଷା ଏବଂ ସୁବିଧାକୁ ଧ୍ୟାନରେ ରଖି ଏହି ନିୟମ କରାଯାଇଛି।

Powered by Froala Editor