ଭୁବନେଶ୍ବର: ଚଳିତ ବର୍ଷ ଶେଷସୁଦ୍ଧା ନୂଆ ଯାତ୍ରୀ ସଂରକ୍ଷଣ ବ୍ୟବସ୍ଥା ଲାଗୁ କରିବ ଭାରତୀୟ ରେଳପଥ। ନୂଆ ବ୍ୟବସ୍ଥାରେ ଗୋଟିଏ ମିନିଟ୍‌ରେ ଦେଢ଼ ଲକ୍ଷ ଟିକଟ ବୁକିଂ ହୋଇପାରିବ। ପୁରୁଣା ବ୍ୟବସ୍ଥାରେ ଗୋଟିଏ ମିନିଟ୍‌ରେ ୩୨ହଜାର ଟିକଟ ବୁକିଂ ହେଉଥିଲା। ନୂଆ ବ୍ୟବସ୍ଥାରେ ଏହାଠାରୁ ପାଞ୍ଚ ଗୁଣ ଅଧିକ ଟିକଟ ବୁକିଂ କରାଯାଇ ପାରିବ। ଯାତ୍ରୀ ସୁବିଧା ଏବଂ ସ୍ମାର୍ଟ ଟିକଟିଂ ଉପରେ ଧ୍ୟାନ ଦେଇ ଭାରତୀୟ ରେଳପଥ ଯାତ୍ରୀ ସଂରକ୍ଷଣ ବ୍ୟବସ୍ଥାକୁ ବହୁଭାଷୀ କରିବ। ରେଳଯାତ୍ରୀଙ୍କ ଯାତ୍ରା ଅନିଶ୍ଚିତତାକୁ ଦୂର କରିବା ପାଇଁ ରେଳ ମନ୍ତ୍ରଣାଳୟ ଆଗୁଆ ସଂରକ୍ଷିତ ଟିକଟ ତାଲିକା ପ୍ରକାଶ କରିବ। ନିର୍ଦିଷ୍ଟ ଦିନର ଅପରାହ୍ଣ ୨ଟା ପୂର୍ବରୁ ଛାଡ଼ୁଥିବା ରେଳ ପାଇଁ ପୂର୍ବଦିନ ରାତି ୯ଟା ସୁଦ୍ଧା ଟିକଟଧାରୀଙ୍କ ତାଲିକା ପ୍ରସ୍ତୁତ କରାଯିବ। ତତ୍କାଳ ଟିକଟ ବୁକିଂକୁ ଅଧିକ ସ୍ୱଚ୍ଛ ଓ ସୁରକ୍ଷିତ କରିବା ଲାଗି ଆଧାର କିମ୍ବା ଡିଜି ଲକର ସଂଯୁକ୍ତ ସରକାରୀ ପରିଚୟପତ୍ର ଜରିଆରେ ପ୍ରମାଣୀକରଣ କରାଯିବ। ଟିକଟ ଅନୁସନ୍ଧାନ କ୍ଷମତାକୁ ଦଶଗୁଣ ବୃଦ୍ଧି କରାଯିବ। ନୂଆ ପିଆରଏସ ବ୍ୟବସ୍ଥାରେ ପ୍ରତି ମିନିଟ୍‌ରେ ୪ଲକ୍ଷରୁ ୪୦ ଲକ୍ଷ ଟିକଟ ସମ୍ପର୍କରେ ଅନୁସନ୍ଧାନ କରିବା ସମ୍ଭବ ହେବ ବୋଲି ଭାରତୀୟ ରେଳପଥ ପକ୍ଷରୁ ସୂଚନା ଦିଆଯାଇଛି।

ରେଳମନ୍ତ୍ରୀ ଅଶ୍ବିନୀ ବୈଷ୍ଣବ ଯାତ୍ରୀ ସଂରକ୍ଷଣ ବ୍ୟବସ୍ଥାର ଉନ୍ନତିକରଣ ସମୀକ୍ଷା କରିଥିଲେ। ଉନ୍ନତିକରଣ ହୋଇଥିବା ପିଆରଏସ୍‌ ଡିଜାଇନ ଦକ୍ଷ, ନମନୀୟ ଏବଂ ବର୍ତ୍ତମାନର ଚାହିଦାଠାରୁ ଦଶ ଗୁଣ ପରିଚାଳନା କରିବା ପାଇଁ ସୁବିଧା ଯୋଗାଇ ଦେବ। ଏହା ଟିକଟ ବୁକିଂ କ୍ଷମତାକୁ ଉଲ୍ଲେଖନୀୟ ଭାବରେ ବୃଦ୍ଧି କରିବ। ନୂତନ ପିଆରଏସ ପ୍ରତି ମିନିଟ୍‌ରେ ଦେଢ଼ ଲକ୍ଷରୁ ଅଧିକ ଟିକଟ ବୁକିଂ ସକ୍ଷମ କରିବ। ବର୍ତ୍ତମାନର ପିଆରଏସ୍‌ ବ୍ୟବସ୍ଥା ଅନୁଯାୟୀ ପ୍ରତି ମିନିଟ୍‌ରେ ୩୨ ହଜାର ଟିକଟଠାରୁ ପ୍ରାୟ ପାଞ୍ଚ ଗୁଣ ଅଧିକ ଟିକଟ ଅନୁସନ୍ଧାନ କ୍ଷମତା ଦଶ ଗୁଣ ବୃଦ୍ଧି ପାଇବ ଅର୍ଥାତ୍ ଗୋଟିଏ ମିନିଟ୍ ମଧ୍ୟରେ ଅନୁସନ୍ଧାନ କ୍ଷମତା ୪ ଲକ୍ଷରୁ ୪୦ ଲକ୍ଷରେ ପହଞ୍ଚିବ। ନୂଆ ପିଆରଏସ୍‌ ବ୍ୟବସ୍ଥାକୁ ବହୁଭାଷୀ, ବ୍ୟବହାରକାରୀ ଅନୁକୂଳ ଏବଂ ଅନୁସନ୍ଧାନ ଇଣ୍ଟରଫେସ୍ ସହିତ ଅଧିକ ସୁବିଧାଜନକ କରାଯିବ। ନୂତନ ପିଆରଏସ୍‌ରେ, ଉପଭୋକ୍ତାମାନେ ସେମାନଙ୍କର ସିଟ୍ ପସନ୍ଦ ଦାଖଲ କରିପାରିବେ ଏବଂ ଯାତ୍ରୀ ଭଡ଼ା ତାଲିକା ଦେଖିପାରିବେ। ଏଥିରେ ଦିବ୍ୟାଙ୍ଗ, ଛାତ୍ରଛାତ୍ରୀ, ରୋଗୀ ଇତ୍ୟାଦିଙ୍କ ପାଇଁ ସମନ୍ୱିତ ସୁବିଧା ମଧ୍ୟ ରହିଛି। ତତ୍କାଳ ଟିକଟ ବୁକିଂ ବ୍ୟବସ୍ଥାର ପ୍ରମାଣୀକରଣକୁ ଅଧିକ ବ୍ୟବସ୍ଥିତ କରାଯିବ। ଜୁଲାଇ ପହିଲାରୁ ଭାରତୀୟ ରେଳପଥ କେବଳ ପ୍ରମାଣିତ ବ୍ୟବହାରକାରୀଙ୍କୁ ଆଇଆରସିଟିସି ୱେବ୍‌ସାଇଟ୍‌ ଏବଂ ମୋବାଇଲ ଆପ୍ ଜରିଆରେ ତତ୍କାଳ ଟିକଟ ବୁକିଂର ଅନୁମତି ଦେବ। ଆହୁରି ୨୦୨୫ ଜୁଲାଇ ଶେଷଠାରୁ ତତ୍କାଳ ଟିକଟ ବୁକିଂ ପାଇଁ ଓଟିପି ଆଧାରିତ ପ୍ରମାଣୀକରଣ ବ୍ୟବସ୍ଥା କାର୍ଯ୍ୟକାରୀ କରାଯିବ।

Powered by Froala Editor