ଦିନକୁ ଦିନ ଛାଡପତ୍ର ମାମଲା ବଢିବାରେ ଲାଗିଛି। ନିକଟରେ ସୁପ୍ରିମକୋର୍ଟ ଛାଡପତ୍ର ପ୍ରକ୍ରିୟା ଦେଇ ଯାଉଥିବା ଦମ୍ପତିମାନଙ୍କୁ ଏପରି ପରାମର୍ଶ ଦେଇଛନ୍ତି, ଯାହା ସମସ୍ତଙ୍କ ହୃଦୟକୁ ଛୁଇଁବ। କୋର୍ଟ ଛାଡପତ୍ର ପାଇଁ ଆବେଦନ କରିଥିବା ଦମ୍ପତିଙ୍କୁ ପରାମର୍ଶ ଦେଇ କହିଛନ୍ତି, ‘କୋର୍ଟରୁମ ବାହାରେ ଏକ ଶାନ୍ତ ପରିବେଶରେ ମନାନ୍ତର ମତାନ୍ତର ବିଷୟରେ ଆଲୋଚନା କରି ମାମଲାର ସମାଧାନ କରିବାକୁ ଚେଷ୍ଟା କରନ୍ତୁ। ଏକାଠି ରାତ୍ରୀ ଭୋଜନ କରିବାକୁ ଯାଆନ୍ତୁ। କାରଣ ଦମ୍ପତିମାନଙ୍କ ମତଭେଦ ସେମାନଙ୍କର ପିଲାଙ୍କ ଉପରେ ମଧ୍ୟ ପ୍ରଭାବ ପକାଇଥାଏ। ତେଣୁ ଏହାକୁ ଯଥାସମ୍ଭବ ଅତୁଟ ରଖିବା ପାଇଁ ଆମେ ସର୍ବଦା ଚେଷ୍ଟା କରିଥାଉ।

ଏହି ମାମଲା ବିଚାରପତି ବିଭି ନାଗାରତନା ଏବଂ ବିଚାରପତି ସତୀଶ ଚନ୍ଦ୍ର ଶର୍ମାଙ୍କ ଖଣ୍ଡପୀଠ ସମ୍ମୁଖରେ ଥିଲା। ପତ୍ନୀ ଜଣେ ଫ୍ୟାଶନ ଉଦ୍ୟୋଗୀ, ତାଙ୍କ ତିନି ବର୍ଷର ପୁଅକୁ ବିଦେଶ ଯାତ୍ରାରେ ନେବା ପାଇଁ ଅନୁମତି ମାଗିଥିଲେ। ସେମାନଙ୍କର ଛାଡପତ୍ର ମାମଲା ପୂର୍ବରୁ ଚାଲିଛି ଏବଂ ଦୁହେଁ ସେମାନଙ୍କ ପୁଅର ହେପାଜତ ପାଇଁ ଆଇନଗତ ଲଢ଼େଇ ମଧ୍ୟ ଲଢ଼ୁଛନ୍ତି। ଦମ୍ପତିଙ୍କ ମଧ୍ୟରେ ଚାଲିଥିବା ବିବାଦ ପିଲା ଉପରେ ମଧ୍ୟ ପ୍ରଭାବ ପକାଇବ ବୋଲି କୋର୍ଟ ଚିନ୍ତା ପ୍ରକାଶ କରିଛନ୍ତି। ଏହା ପିଲାର ଭବିଷ୍ୟତ ପାଇଁ ଭଲ ନୁହେଁ, ତେଣୁ କୋର୍ଟ ଦମ୍ପତିଙ୍କୁ ଏଥିପ୍ରତି ଧ୍ୟାନ ଦେବାକୁ ମଧ୍ୟ କହିଛନ୍ତି।

କୋର୍ଟ ଦମ୍ପତିଙ୍କୁ କହିଥିଲେ, ଅତୀତକୁ ଏକ ତିକ୍ତ ବଟିକା ପରି ଗିଳିଦିଅ ଏବଂ ଭବିଷ୍ୟତ ବିଷୟରେ ଚିନ୍ତା କର। ସୁପ୍ରିମକୋର୍ଟ ସକାରାତ୍ମକ ଫଳାଫଳ ପାଇଁ ଆଶା ପ୍ରକାଶ କରି ମାମଲାର ଶୁଣାଣି ମଙ୍ଗଳବାର ପର୍ଯ୍ୟନ୍ତ ସ୍ଥଗିତ ରଖିଛନ୍ତି।

Powered by Froala Editor