ଭୁବନେଶ୍ବର : ଆସନ୍ତା ୨୬ ତାରିଖ ମଧ୍ୟରେ ସରକାର ଆୟୁଷ ଡାକ୍ତରଙ୍କ ଦାବି ପୂରଣ ନକଲେ ୨୭ରୁ ରାଜ୍ୟବ୍ୟାପୀ ସମ୍ପୂର୍ଣ୍ଣ କାର୍ଯ୍ୟବନ୍ଦ ଆନ୍ଦୋଳନ କରିବେ ୧୪୮୫ ଆୟୁଷ ଡାକ୍ତର। ଏହି ପରିପ୍ରେକ୍ଷୀରେ ଆଜିଠୁ ୨୬ ତାରିଖ ପର୍ଯ୍ୟନ୍ତ ସମସ୍ତ ଡାକ୍ତର କଳାବ୍ୟାଜ୍‌ ପିନ୍ଧି କାର୍ଯ୍ୟ କରିବେ। ଏ ସମ୍ବନ୍ଧରେ ସଂଘ ପକ୍ଷରୁ ଗତ ୧୧ରୁ ମୁଖ୍ୟମନ୍ତ୍ରୀ, ସ୍ବାସ୍ଥ୍ୟମନ୍ତ୍ରୀ, ସ୍ବାସ୍ଥ୍ୟ ସଚିବ, ଜାତୀୟ ସ୍ବାସ୍ଥ୍ୟ ମିଶନ ନିର୍ଦେଶିକା ଓ ଆୟୁଷ ନିର୍ଦେଶକଙ୍କୁ ଅବଗତ କରି ଦାବିପତ୍ର ପ୍ରଦାନ କରିଛନ୍ତି। ସ୍ଥାୟୀ ନିଯୁକ୍ତି, ଆୟୁର୍ବେଦ ଓ ହୋମିଓପାଥି ଚିକିତ୍ସାଧିକାରୀଙ୍କ ସହିତ ଚାକିରି ଅବଧି ଆଧାରରେ ସମାନ ଦରମା ପ୍ରଦାନ, ଆୟୁଷ ବହିର୍ବିଭାଗକୁ ନିୟମିତ ଆୟୁର୍ବେଦ ଓ ହୋମିଓପାଥି ଔଷଧ ଯୋଗାଣ, ଚାକିରି ଭିତରେ ଉଚ୍ଚଶିକ୍ଷା ନିମନ୍ତେ ବ୍ୟବସ୍ଥା, ନିଜକୁ ଓ ନିର୍ଭରଶୀଳ ପରିବାର ସଦସ୍ୟଙ୍କୁ ବାର୍ଷିକ ୨୦ ଲକ୍ଷ ସ୍ବାସ୍ଥ୍ୟ ବୀମା ଅନ୍ତର୍ଭୁକ୍ତ କରିବା, ଚାକିରି ଅବଧି ଭିତରେ ମୃତ୍ୟୁ ଘଟୁଥିବା ଆୟୁଷ ଡାକ୍ତରଙ୍କ ପରିବାରକୁ ୪୦ ଲକ୍ଷ ଏକ କାଳୀନ ରାଶି ପ୍ରଦାନ ଆଦି ୬ ଦାବିକୁ ନେ଼ଇ ଆୟୁଷ ଡାକ୍ତର ଆନ୍ଦୋଳନ କରୁଥିବା ସଭାପତି ଡା. ପ୍ରଶାନ୍ତ କୁମାର ପାଢ଼ୀ କହିଛନ୍ତି। ଦାବି ପୂରଣ ନ ହେଲେ ୨୭ରୁ ରାଜ୍ୟର ସମସ୍ତ ଆୟୁଷ ଡାକ୍ତର ଲୋୟର ପିଏମଜିଠାରେ ଆପ୍ରୋନ ଓ ଷ୍ଟେଥୋ ପରିଧାନ କରି ଶାନ୍ତିପୂର୍ଣ୍ଣ ଧାରଣା ଦେବେ ବୋଲି ସାଧାରଣ ସମ୍ପାଦକ ଡା. ପ୍ରଭାସ ଚନ୍ଦ୍ର ସ୍ବାଇଁ କହିଛନ୍ତି।

Powered by Froala Editor