ତାମିଲ ଫିଲ୍ମ ଇଣ୍ଡଷ୍ଟ୍ରିର ଲୋକପ୍ରିୟ ଅଭିନେତ୍ରୀ ତଥା ଜଣେ ଆଇପିଏସ ଅଧିକାରୀଙ୍କ ଝିଅ ରାନ୍ୟା ରାଓ ଚୋରା ଚାଲାଣରେ ଗିରଫ ହେବା ପରଠାରୁ ନୂଆନୂଆ ତଥ୍ୟ ସାମ୍ନାକୁ ଆସୁଛି। ନିଜ ବୟାନରେ ରାନ୍ୟା କହିଛନ୍ତି କି, ସେ ଫଟୋଗ୍ରାଫି  ଏବଂ ରିୟଲ ଷ୍ଟେଟ୍ ବ୍ୟବସାୟ ପାଇଁ ବିଦେଶ ଯାତ୍ରା କରୁଥିଲେ । ଦୁବାଇ ଯାତ୍ରା ବିଷୟରେ ପଚାରାଯିବାରୁ ସେ ଉତ୍ତର ରଖିଥିଲେ କି, ସେ ୟୁରୋପ, ଆମେରିକା ଏବଂ ମିଡଲ୍ ଇଷ୍ଟକୁ ବହୁ ବାର ଯାତ୍ରା କରିଛନ୍ତି । କିନ୍ତୁ ଗତ ୨ ସପ୍ତାହ ଧରି ଏକ ଅଜ୍ଞାତ ବିଦେଶୀ ନମ୍ୱରରୁ ତାଙ୍କୁ କଲ୍ ଆସୁଥିଲା । ମାର୍ଚ୍ଚ ୧ରେ ଶେଷ ଥର ତାଙ୍କୁ ବିଦେଶୀ ନମ୍ୱରୁ କଲ୍ ଆସିଥିଲା ।

ରାନ୍ୟା କହିଛନ୍ତି, କଲ କରିଥିବା ବ୍ୟକ୍ତି ଜଣକ ଆଫିକୀ-ଆମେରିକୀୟ ଥିଲା । ସେ ମୋତେ ଦୁବାଇରେ ଧଳା ପୋଷାକରେ ଏୟାରପୋର୍ଟରେ ଭେଟ ହେବ ବୋଲି କହିଥିଲା । ସୁରକ୍ଷା ଯାଞ୍ଚ ପରେ ସେ ମୋତେ ସୁନା ବାଡ଼ି ଦେବା ପରେ ସେଠାରୁ ସଙ୍ଗେ ସଙ୍ଗେ ଚାଲିଯାଇଥିଲା । ଲୋକଟି ଗୋରା ଏବଂ ୬ ଫୁଟ୍ ଉଚ୍ଚର ଥିଲା। ଏହା ପରେ ତାକୁ ମୁଁ କେବେ ଆଉ ଭେଟିନାହିଁ କି ଦେଖିନାହିଁ ।

ଏହି ଘଟଣାକୁ ନେଇ ରାନ୍ୟା ଯାଞ୍ଚ କରୁଥିବା ଅଧିକାରୀମାନଙ୍କ ସାମ୍ନାରେ କହିଛନ୍ତି, ‘ମୁଁ ଅଜାଣତରେ ଏହି କାର୍ଯ୍ୟକଳାପରେ ସାମିଲ ହୋଇଯାଇଥିଲି। ଦୁବାଇରୁ ଏହା ମୋର ପ୍ରଥମଥର ପାଇଁ ସୁନା ଚୋରା ଚାଲାଣ ଥିଲା । ସୁନା ଚାଲାଣ ପାଇଁ ମୁଁ ୟୁଟ୍ୟୁବରୁ କିଛି ପଦ୍ଧତି ଶିକ୍ଷା କରିଥିଲି। ସୁନାକୁ ଯାତ୍ରା ସମୟରେ କିପରି ଲୁଚାଇ ହେବ ସେ ବିଷୟରେ ଶିକ୍ଷା ନେଇଥିଲି।’

କର୍ଣ୍ଣାଟକର ବେଙ୍ଗାଲୁରୁର କେମ୍ପେଗୌଡା ଅନ୍ତର୍ଜାତୀୟ ବିମାନବନ୍ଦରରେ କନ୍ନଡ ଅଭିନେତ୍ରୀ ରାନ୍ୟା ରାଓଙ୍କ ଉପରେ ଚଢ଼ାଉ କରି ତାଙ୍କ ଠାରୁ ୧୪.୨ କିଲୋଗ୍ରାମ ସୁନା ଜବତ କରାଯାଇଥିଲା, ଯାହାର ଆନୁମାନିକ ମୂଲ୍ୟ ୧୨.୫୬ କୋଟି ଟଙ୍କା ହେବ ବୋଲି ରାଜସ୍ୱ ଗୁଇନ୍ଦା ନିର୍ଦ୍ଦେଶାଳୟ (ଡିଆରଆଇ) ସୂଚନା ଦେଇଛି।

Powered by Froala Editor