କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧି ଭଦ୍ରାଙ୍କୁ ନେଇ ଆପତ୍ତିଜନକ ବୟାନ ଦେଇ ବିବାଦରେ ବିଜେପି ନେତା ରମେଶ ବିଧୁଡ଼ି। ସେ ପ୍ରିୟଙ୍କା ଗାନ୍ଧୀଙ୍କୁ ନେଇ ବିବାଦୀୟ ବୟାନ ଦେଇଛନ୍ତି। ନିର୍ବାଚନରେ ବିଜେତା ହେଲେ ସେ କାଲକାଜୀର ରାସ୍ତାଗୁଡ଼ିକୁ ପ୍ରିୟଙ୍କା ଗାନ୍ଧୀଙ୍କ ଗାଲ ଭଳି କରିଦେବେ ବୋଲି କହିଛନ୍ତି। ଏବେ ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି।

ପୂର୍ବତନ ସାଂସଦ ତଥା ବିଜେପି ପ୍ରାର୍ଥୀ ରମେଶ ବିଧୁଡ଼ି ଏକ ଜନସଭାରେ ଏଭଳି ଆପତ୍ତିଜନକ ବୟାନ ଦେଉଥିବା ସମୟର ଭିଡିଓ ମଧ୍ୟ ସୋଶାଲ ମିଡିଆରେ ଖୁବ ଭାଇରାଲ ହେଉଛି। ଯେଉଁଥିରେ ରମେଶ ଏକ ଜନସଭାକୁ ସମ୍ବୋନ୍ଧିତ କରି କହୁଛନ୍ତି ଯେ, ଲାଲୁ ଯାଦବ କଥା ଦେଇଥିଲେ ବିହାରର ସବୁ ରାସ୍ତାକୁ ହେମା ମାଳିନୀଙ୍କ ଗାଲ ଭଳି କରିଦେବେ। ହେଲେ କରିପାରିଲେନି। ମୁଁ ଆପଣଙ୍କୁ କଥା ଦେଉଛି, ଯେମିତି ଓଖଲା ଓ ସଂଗମ ବିହାର ରାସ୍ତା ଆମେ କରିଛୁ, ସେମିତି କାଲକାଜୀର ସମସ୍ତ ରାସ୍ତାକୁ ମଧ୍ୟ ମୁଁ ପ୍ରିୟଙ୍କା ଗାନ୍ଧିଙ୍କ ଗାଲ ଭଳି କରିଦେବି।

ବିଜେପି ବିଧାୟକ ପ୍ରାର୍ଥୀଙ୍କର ଏଭଳି ଆପତ୍ତିଜନକ ବୟାନକୁ ନିନ୍ଦା କରିଛି କଂଗ୍ରେସ। ଦଳର ରାଷ୍ଟ୍ରୀୟ ପ୍ରବକ୍ତା ସୁପ୍ରିୟା ଶ୍ରୀନେତ କହିଛନ୍ତି ଯେ ବିଜେପି ସଂପୂର୍ଣ୍ଣ ମହିଳା ବିରୋଧୀ ଦଳ। ପ୍ରିୟଙ୍କା ଗାନ୍ଧିଙ୍କୁ ନେଇ ଦେଇଥିବା ବୟାନ କେବଳ ଲଜ୍ଜ୍ୟାଜନକ ନୁହେଁ, ବରଂ ଏହି ମହିଳାଙ୍କ ପ୍ରତି ତାଙ୍କ ମନରେ ଥିବା କୁତ୍ସିତ ମାନସିକତାକୁ ମଧ୍ୟ ଦର୍ଶାଉଛି।

ତେବେ କେବଳ କଂଗ୍ରେସ ନୁହେଁ, ଅନ୍ୟ ବିରୋଧୀ ଦଳମାନେ ମଧ୍ୟ ଏହି ପ୍ରସଙ୍ଗରେ ବିଜେପି ନେତାଙ୍କୁ କଡ଼ା ଭାଷାରେ ସମାଲୋଚନା କରିଛନ୍ତି। ଚାରିଆଡ଼ୁ ସମାଲୋଚନା ପରେ ଏବେ କ୍ଷମା ପ୍ରାର୍ଥନା କରିଛନ୍ତି ରମେଶ।

Powered by Froala Editor