୬ ବର୍ଷ ପରେ ପୁଣିଥରେ ପରଦାରେ ନଜର ଆସିବେ ଅଭିନେତ୍ରୀ ଜାହ୍ନବୀ କପୁର ଓ ଅଭିନେତା ଇଶାନ ଖଟ୍ଟର । ଏକ ବଡ଼ ପ୍ରୋଜେକ୍ଟରେ ଉଭୟଙ୍କୁ ଏକାଠି ଅଭିନୟ କରୁଥିବାର ଦେଖିବାକୁ ମିଳିବ ବୋଲି ଏକ ରିପୋର୍ଟ ପ୍ରକାଶ ପାଇଛି। କରନ୍‌ ଜୋହରଙ୍କ ଧର୍ମା ପ୍ରଡକ୍ସନର ବ୍ୟାନରରେ ଏହି ଫିଲ୍ମର ନିର୍ମାଣ ହେବାକୁ ଥିବାବେଳେ ନୀରଜ ଘେୱାନ ଏହାର ନିର୍ଦ୍ଦେଶନା ଦେବେ।

ଫିଲ୍ମଟି ଆସନ୍ତାବର୍ଷ ଶେଷ ଆଡ଼କୁ ମୁକ୍ତିଲାଭ କରିପାରେ । ଇଶାନ୍ଙ୍କ ବ୍ୟତୀତ ସେଥିରେ ଆଉ ଜଣେ ଅଭିନେତାଙ୍କୁ ପ୍ରମୁଖ ଭୂମିକାରେ ଦେଖିବାକୁ ମିଳିବ । ସେଥିଲାଗି ଜଣେ ନବାଗତଙ୍କ ସହିତ ଆଲୋଚନା ଚାଲିଛି । ୱାର୍କଫ୍ରଣ୍ଟ କଥା କହିବାକୁ ଗଲେ ଜାହ୍ନବୀଙ୍କୁ ଆଗକୁ 'ସନି ସଂସ୍କାରୀ କୀ ତୁଲସୀ କୁମାରୀ'ରେ ମଧ୍ୟ ଦେଖିବାକୁ ମିଳିବ । ସେଥିରେ ତାଙ୍କ ସହିତ ଅଭିନେତା ବରୁଣ ଧୱନ ନଜର ଆସିବେ । ଶଶାଙ୍କ ଖୈତାନ୍ ଫିଲ୍ମର ନିର୍ଦ୍ଦେଶନାରେ ଅଛନ୍ତ।

ସୂତ୍ର ଅନୁଯାୟୀ, ଯେତେବେଳେ କରନ୍‌ ଏବଂ ନୀରଜ ଜାହ୍ନବୀଙ୍କୁ ଏହି ଫିଲ୍ମରେ ଅଭିନୟ କରିବାକୁ ଅଫର ଦେଇଥିଲେ, ସେ ତୁରନ୍ତ ଏହାକୁ ଗ୍ରହଣ କରିଥିଲେ। ଜାହ୍ନବୀ ତାଙ୍କର ପ୍ରଥମ ସହତାରକା ଇଶାନଙ୍କ ସହ ପୁନର୍ବାର କାମ କରିବାକୁ ବେଶ୍‌ ଉତ୍ସାହିତ ଥିବା ନେଇ ରିପୋର୍ଟରେ କୁହାଯାଇଛି। ଅଭିନେତ୍ରୀ ଜାହ୍ନବୀ କପୁର ଓ ଅଭିନେତା ଇଶାନ ଖଟ୍ଟର ଶେଷ ଥର ପାଇଁ ୨୦୧୮ରେ ଫିଲ୍ମ ନିର୍ମାତା କରଣ ଜୋହରଙ୍କ 'ଧଡକ୍‌' ଫିଲ୍ମରେ ନଜରକୁ ଆସିଥିଲେ।

Powered by Froala Editor