ଭୁବନେଶ୍ୱର:ଦ୍ୱିତୀୟ ପର୍ଯ୍ୟାୟ ବିଧାନସଭା ଅଧିବେଶନର ଚତୁର୍ଥ ଦିନରେ ବିରୋଧୀ ବିଜେଡି ଗୃହରେ ଯେଭଳି ତୁମୁଳକାଣ୍ଡ ଭିଆଇଛନ୍ତି ତାହାକୁ କଡ଼ା ଭାଷାରେ ନିନ୍ଦା କରିଛନ୍ତି ବିଜେପି ବିଧାୟକ ଟଙ୍କଧର ତ୍ରିପାଠୀ । ଗୃହରେ ଅରାଜକତାକୁ ସେ ଲଜ୍ଜାଜନକ କହିଛନ୍ତି । ଏହାଛଡା ସେ କହିଛନ୍ତି ଯେ ମା’କୁ ସମ୍ମାନ ଓ ମହିଳାଙ୍କ ଦ୍ୱାହି ଦେଇ ବିଜେଡି ୨୪ ବର୍ଷ ଶାସନ କଲା । କିଭଳି ମହିଳାଙ୍କୁ ସମ୍ମାନ ଦିଅନ୍ତି ବିଜେଡି ବିଧାୟକମାନେ ତାହାର ଉଦାହରଣ ଆଜି ବିଧାନସଭାରେ ରଖିଛନ୍ତି । ମହିଳା ବାଚସ୍ପତିଙ୍କ ପୋଡ଼ିୟମକୁ ଚଢ଼ି ତାହା ଉପରେ ଗୋଡ଼ ଥୋଇବା କେତେ ଗ୍ରହଣୀୟ ବୋଲି ଶ୍ରୀ ତ୍ରିପାଠୀ ପ୍ରଶ୍ନ କରିଛନ୍ତି । ବିଜେଡି ଆଲୋଚନା ଚାହୁଁଥିବାବେଳେ ସରକାର ବି ଆଲୋଚନା କରିବାକୁ ପ୍ରସ୍ତୁତ । ନିଜେ ମୁଲତବୀ ପ୍ରସ୍ତାବ ଦେଉଛନ୍ତି ଆଉ ଗୃହକୁ ବନ୍ଦ କରୁଛନ୍ତି ବୋଲି ଶ୍ରୀ ତ୍ରିପାଠୀ କହିଛନ୍ତି ।
ପ୍ରକାଶ ଯେ ଦ୍ୱିତୀୟ ପର୍ଯ୍ୟାୟ ବିଧାନସଭା ଅଧିବେଶନର ଚତୁର୍ଥ ଦିନରେ ବି ବିରୋଧୀ ଗୃହକୁ ଚଲାଇ ଦେଇନାହାନ୍ତି । ଆଜି ଗୃହ କାର୍ଯ୍ୟ ଆରମ୍ଭ ହେଉ ହେଉ ବିରୋଧୀ ବିଜେଡି ଗୃହରେ ତୁମୁଳକାଣ୍ଡ ଭିଆଇଛନ୍ତି । ପ୍ରଶ୍ନକାଳରେ ବିଜେଡି ବିଧାୟକ ଗୃହରେ ଅରାଜକତା ଦେଖାଇବା ସହ ତୁମୁଳକାଣ୍ଡ ଭିଆଇଛନ୍ତି । ମହିଳା ବାଚସ୍ପତିଙ୍କ ଆଗରେ ବିଶୃଙ୍ଖଳିତ ଆଚରଣ ପ୍ରଦର୍ଶନ କରିଛନ୍ତି । ବାଚସ୍ପତିଙ୍କ ପୋଡ଼ିୟମ ଦଖଲ କରିବାକୁ ବିଜେଡି ବିଧାୟକ ଉଦ୍ୟମ କରିଛନ୍ତି । ଏପରିକି ୨ ବିରୋଧୀ ସଦସ୍ୟ ବାଚସ୍ପତିଙ୍କ ପୋଡିୟମ ଉପରକୁ ଚଢ଼ିଛନ୍ତି । ସେମାନେ ହେଲେ ସୋର ବିଧାୟକ ମାଧବ ଧଡ଼ା ଓ ଦେବଗଡ଼ ବିଧାୟକ ରୋମାଞ୍ଚ ବିଶ୍ୱାଳ । ଚିକିଟି ମଦ ମୃତୁ୍ୟ ମାମଲରେ ଅବକାରୀ ମନ୍ତ୍ରୀଙ୍କ ଇସ୍ତଫା ଦାବି କରି ସେମାନେ ଏଭଳି କାଣ୍ଡ ଭିଆଇଛନ୍ତି । ତେବେ ବାଚସ୍ପତି ସୁରମା ପାଢ଼ୀ ଗୃହକୁ ୧୧.୩୦ ଯାଏ ମୁଲତବୀ ଘୋଷଣା କରିଥିଲେ ।

Powered by Froala Editor