ତିରୁଅନନ୍ତପୁରମ : କେରଳର ୱାୟନାଡ୍‌ରେ ମଙ୍ଗଳବାର ପ୍ରବଳ ବର୍ଷା ଯୋଗୁଁ ଚାରି ଘଣ୍ଟା ବ୍ୟବଧାନରେ ତିନି ଥର ଭୂସ୍ଖଳନ ଘଟିଛି। ଏଥିରେ ମୃତ୍ୟୁ ସଂଖ୍ୟା ୧୪୩କୁ ବୃଦ୍ଧି ପାଇଛି। ୧୧୬ରୁ ଅଧିକ ଲୋକ ଆହତ ହୋଇଛନ୍ତି। ସମସ୍ତ ଆହତଙ୍କୁ ଜିଲାର ବିଭିନ୍ନ ଡାକ୍ତରଖାନାରେ ଭର୍ତ୍ତି କରାଯାଇଛି। ଧ୍ବଂସସ୍ତୂପ ତଳେ ଆଉ କେତେକ ପୋତି ହୋଇପଡିଥିବା ଆଶଙ୍କା କରାଯାଉଛି। ଆକୁ ଆହୁରି ମୃତ୍ୟୁସଂଖ୍ୟା ବୃଦ୍ଧି ପାଇପାରେ । ନିଖୋଜ ବ୍ୟକ୍ତିଙ୍କ ମଧ୍ୟରେ ଓଡ଼ିଶାର ଦୁଇ ଜଣ ଡାକ୍ତର ଥିବା ଜଣାପଡିଛି। ଭୂସ୍ଖଳନରେ ୱାୟନାଡ୍‌ ଜିଲାର ମୁନ୍ଦାକାଇ, ଚୁରାଲମାଲା, ଆଟ୍ଟାମାଲ ଏବଂ ନୁଲପୁଜା ଗ୍ରାମ କ୍ଷତିଗ୍ରସ୍ତ ହୋଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଇତିମଧ୍ୟରେ କେରଳ ମୁଖ୍ୟମନ୍ତ୍ରୀ ପିନାରାଇ ବିଜୟନଙ୍କ ସହ ଆଲୋଚନା କରିଥିବାବେଳେ କେନ୍ଦ୍ର ସରକାରଙ୍କ ତରଫରୁ ସମସ୍ତ ସହାୟତା ଯୋଗାଇ ଦିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି। ଏହାବ୍ୟତୀତ ପ୍ରଧାନମନ୍ତ୍ରୀଙ୍କ ରିଲିଫ୍‌ ପାଣ୍ଠିରୁ ପ୍ରତ୍ୟେକ ମୃତକଙ୍କ ପରିବାରକୁ ୨ ଲକ୍ଷ ଏବଂ ପ୍ରତ୍ୟେକ ଆହତଙ୍କୁ ୫୦ ହଜାର ଟଙ୍କାର ଅନୁକମ୍ପା ରାଶି ଘୋଷଣା କରାଯାଇଛି। ଅପରପକ୍ଷରେ ୱାୟନାଡ୍‌ ସାଂସଦ ରାହୁଲ ଗାନ୍ଧୀ ଏହି ଘଟଣାରେ ଗଭୀର ଦୁଃଖପ୍ରକାଶ କରିବା ସହ ମୁଖ୍ୟମନ୍ତ୍ରୀ ବିଜୟନ ଏବଂ ୱାୟନାଡ୍‌ ଜିଲାପାଳଙ୍କ ସହ ଫୋନ୍‌ରେ କଥା ହୋଇ ସ୍ଥିତି ସମ୍ପର୍କରେ ଅବଗତ ହୋଇଛନ୍ତି। ରାଜ୍ୟ ସରକାରଙ୍କ ପକ୍ଷରୁ ମଙ୍ଗଳବାର ଓ ବୁଧବାର ଦୁଇଦିନ ରାଜ୍ୟସ୍ତରୀୟ ଶୋକ ଘୋଷଣା କରାଯାଇଛି। ଅପରପକ୍ଷରେ କେରଳ ଭୂସ୍ଖଳନ ପ୍ରଭାବିତଙ୍କ ନିମନ୍ତେ ତାମିଲନାଡୁ ସରକାର ୫ କୋଟି ଟଙ୍କାର ସହାୟତା ରାଶି ଘୋଷଣା କରିଛନ୍ତି। ପ୍ରଧାନମନ୍ତ୍ରୀଙ୍କ ନିର୍ଦେଶକ୍ରମେ କେନ୍ଦ୍ରମନ୍ତ୍ରୀ ଜର୍ଜ କୁରିଆନ୍‌ ଘଟଣାସ୍ଥଳ ଅଭିମୁଖେ ଯାତ୍ରା କରିଛନ୍ତି। ଏନଡିଆରଏଫ୍‌, ଅର୍ଦ୍ଧସାମରିକ ବାହିନୀ, ରାଜ୍ୟ ସରକାରଙ୍କ ପଦାଧିକାରୀ ଏବଂ ଅନ୍ୟ ସଂସ୍ଥା ସହ ସମନ୍ବୟ ରକ୍ଷା କରି ଉଦ୍ଧାର ଓ ରିଲିଫ୍‌ କାର୍ୟ୍ୟ ତଦାରଖ କରିବାକୁ କୁରିଆନ୍‌ଙ୍କୁ ନିର୍ଦେଶ ଦିଆଯାଇଛି। କନ୍ନୁରସ୍ଥିତ ଡିଏସ୍‌ସି ସେଣ୍ଟର ଏବଂ କୋଝିକୋଡ୍‌ସ୍ଥିତ ୧୨୨ ବାଟାଲିୟନର ପ୍ରାୟ ୨୦୦ ଯବାନଙ୍କୁ ଘଟଣାସ୍ଥଳକୁ ପଠାଯାଇଛି। ଉଦ୍ଧାର କାର୍ୟ୍ୟରେ ଏନ୍‌ଡିଆରଏଫ୍‌ ଓ ଏସଡିଆରଏଫ୍‌ ଯବାନଙ୍କୁ ନିୟୋଜିତ କରାଯାଇଛି।

Powered by Froala Editor