ଏଣିକି ନିୟମିତ ଯାଞ୍ଚ୍ ହେବ ସ୍କୁଲ୍ ବସ୍ର ଅଗ୍ନି ନିରାପତ୍ତା ବ୍ୟବସ୍ଥା
ବିଭିନ୍ନ ସମୟରେ ଦେଖିବାକୁ ମିଳୁଛି ଯେ, ସ୍କୁଲ୍ ବସ ଦୁର୍ଘଟଣା ହେଉଛି । ତେବେ ପିଲାଙ୍କ ଜୀବନକୁ ନେଇ ଆଉ ଖାମଖିଆଲି ନୀତି ଚଳିବନି । ଏଣିକି ସ୍କୁଲ୍ ବସ୍ରେ ଅଗ୍ନି ନିରାପତ୍ତା ବ୍ୟବସ୍ଥା ଅଛି କି ନାହିଁ ନିୟମିତ ଯାଞ୍ଚ୍ ହେବ । ଏନେଇ ବଡ଼ ନିଷ୍ପତ୍ତି ନେଇଛି ରାଜ୍ୟ ପରିବହନ ପ୍ରାଧିକରଣ (ଏସ୍ଟିଏ) । ଛାତ୍ରଛାତ୍ରୀଙ୍କ ସୁରକ୍ଷାକୁ ଦୃଷ୍ଟିରେ ରଖି ଏସ୍ଟିଏ ତରଫରୁ ଏଭଳି ପଦକ୍ଷେପ ନିଆଯାଇଛି । ସମସ୍ତ ଆର୍ଟିଓଙ୍କୁ ଚିଠି ଲେଖି ଏ ସଂକ୍ରାନ୍ତରେ ସୂଚନା ଦେଇଛନ୍ତି ରାଜ୍ୟ ପରିବହନ କମିସନର ।
କେନ୍ଦ୍ରୀୟ ମୋଟର ଯାନ ନିୟମ (ସିଏମ୍ଭିଆର୍) ୧୯୮୯ର ଧାରା ୧୨୫(ସି) ଅନୁସାରେ ସମସ୍ତ ସ୍କୁଲ୍ ବସ୍ରେ ଅଗ୍ନି ନିରାପତ୍ତା ବ୍ୟବସ୍ଥା ରହିବା ଜରୁରି । ସ୍କୁଲ୍ ବସ୍ରେ ଏଫ୍ଡିଏଏସ୍ (ଫାୟାର୍ ଡିଟେକ୍ସନ୍ ଆଲାର୍ମ୍ ସିଷ୍ଟମ୍), ଏଫ୍ଡିଏସ୍ଏସ୍ (ଫାୟାର୍ ଡିଟେକ୍ସନ୍ ସପ୍ରେସନ୍ ସିଷ୍ଟମ୍), ଏଫ୍ଏପିଏସ୍ (ଫାୟାର୍ ଆଲାର୍ମ୍ ପ୍ରୋଟେକସନ୍ ସିଷ୍ଟମ୍) ବ୍ୟବସ୍ଥା ଲାଗୁ କରିବାକୁ ବାଧ୍ୟତାମୂଳକ ନିୟମ ରହିଛି । ତେଣୁ ବସ୍ରେ ଛାତ୍ରଛାତ୍ରୀଙ୍କ ସୁରକ୍ଷା ଦୃଷ୍ଟିରୁ ଏହା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଛାତ୍ରଛାତ୍ରୀଙ୍କୁ ପରିବହନ କରୁଥିବା ବସ୍ ମାଲିକମାନେ ନିୟମର ଅନୁପାଳନ ନିମନ୍ତେ ବାଧ୍ୟତାମୂଳକ ରହିଛି ।
ତେଣୁ ସମସ୍ତ ଜୋନ୍ ପରିବହନ ଉପଆୟୁକ୍ତ ଓ ଆଞ୍ଚଳିକ ପରିବହନ ଅଧିକାରୀମାନେ ନିୟମିତ ଏହା ଯାଞ୍ଚ୍ କରିବେ । କୌଣସି ସ୍କୁଲ୍ ବସ୍ ଏହାର ଉଲ୍ଲଂଘନ କଲେ ଆଇନ୍ ଅନୁଯାୟୀ କାର୍ଯ୍ୟାନୁଷ୍ଠାନ ନେବାକୁ ପରିବହନ କମିସନର ନିର୍ଦ୍ଦେଶ ଦେଇଛନ୍ତି ।
Powered by Froala Editor
