ଡିମାଣ୍ଡ କରୁଥିଲେ ମଦ, ସିଗାରେଟ୍, ବିରିୟାନୀ, ନମିଳିଲେ ସ୍ୱାମୀଙ୍କୁ ଦେଉଥିଲେ ଚେଙ୍କ
ସ୍ତ୍ରୀ ନିର୍ଯାତନା କେସ୍ ତ ବହୁତ ଶୁଣିଥିବେ । ହେଲେ ଏଠି ଜଣେ ସ୍ୱାମୀ ସ୍ତ୍ରୀଙ୍କ ନିର୍ଯାତନା ସହିନପାରି ଥାନାର ଦ୍ୱାରସ୍ଥ ହୋଇଛନ୍ତି । ସ୍ତ୍ରୀ ସିଗାରେଟ, ଗୁଟଖା ଓ ବିରିୟାନୀ ପାଇଁ ଏମିତି ପାଗଳ ହୋଇଯାଇଥିଲେ ଯେ, ସ୍ୱାମୀଙ୍କୁ ଖଟରେ ବାନ୍ଧି ସିଗାରେଟ୍ ଚେଙ୍କ ଦେବାକୁ ପଛାଇନଥିଲେ ।
ସିସିଟିଭି ଫୁଟେଜ ଆଧାରରେ ପୁଲିସ୍ ଅଭିଯୁକ୍ତ ପତ୍ନୀଙ୍କୁ ଗିରଫ କରିଛି। ଏ ଅଭାବନୀୟ ଘଟଣା ଉତ୍ତରପ୍ରଦେଶର ବିଜନୌରରେ ଘଟିଛି। ଏହି ଘଟଣାର ପୀଡ଼ିତ ବ୍ୟକ୍ତିଜଣକ ମନନ ଜୈଦି ବୋଲି ଜଣାଯାଇଥିବା ବେଳେ ପୁଲିସ୍ ପତ୍ନୀ ମେହର ଜହାଁଙ୍କୁ ଗିରଫ କରିଛି।
ବିବାହ ବେଳେ ମେହର ନିଶାସକ୍ତ ବୋଲି ବି ଜାଣି ପାରି ନ ଥିଲେ ମନନ । ମାତ୍ର ସମୟ ଗଡ଼ିବା ସହ ପତ୍ନୀ ବିଅର ବିରିୟାନୀ, ସିଗାରେଟ ଓ ଗୁଟଖା ପାଇଁ ସ୍ୱାମୀଙ୍କ ନିକଟରେ ଜିଦ୍ କଲେ। ଆଉ ଏହି ସବୁ ଜିନିଷ ନ ମିଳିଲେ ସେ ହିଂସ୍ର ପାଲଟି ଯାଉଥିଲେ ।
ସେ ମନନଙ୍କ ଖାଦ୍ୟରେ ନିଶା ପଦାର୍ଥ ମିଶାଇ ଦେଉଥିଲେ। ମନନ ଅଚେତ ହେବା ପରେ ସେ ତାଙ୍କ ହାତଗୋଡ଼ ବାନ୍ଧି ଶରୀରର ବିଭିନ୍ନ ସ୍ଥାନରେ ସିଗାରେଟର ଚେଙ୍କ ଦେଉଥିଲେ। ଏପରିକି ଛାଡ଼ି ଦେବାକୁ କାକୁତିମିନତି ହେଲେ ବି ତରଳୁ ନ ଥିଲେ । ଏପରିକି ସ୍ୱାମୀଙ୍କ ତଣ୍ଟି ଚିପି ହତ୍ୟା ଉଦ୍ୟମ ବି କରୁଥିଲେ। ଏକଥା ବାହାରେ ପ୍ରଘଟ କଲେ ମିଥ୍ୟା ନିର୍ଯାତନା କେସ୍ରେ ଫସାଇ ଜେଲ୍ ପଠାଇ ଦେବାକୁ ଧମକ ଦେଉଥିଲେ।
ମନନ ନିଜ ଘରେ ସିସିଟିଭି ଲଗାଇଥିବା ବେଳେ ମେହର ଏହା ଜାଣି ପାରି ନଥିଲେ। ନିର୍ଯାତନା ଅତିଷ୍ଠ ହେବାରୁ ସେ ଥାନାର ଦ୍ୱାରସ୍ଥ ହେଲେ।
Powered by Froala Editor
