ରାଜସ୍ଥାନର ଶିକ୍ଷାର ସହର କୋଟାରେ ୪୮ ଘଣ୍ଟା ମଧ୍ୟରେ ପୁଣି ଜଣେ ଛାତ୍ର ଆତ୍ମହତ୍ୟା କରିଥିବା ଖବର ସାମ୍ନାକୁ ଆସିଛି। ନିଟ୍ ପରୀକ୍ଷା ପାଇଁ ପ୍ରସ୍ତୁତି କରୁଥିବା ଜଣେ ୨୦ ବର୍ଷୀୟ ଛାତ୍ର ହଷ୍ଟେଲରେ ଫାଶୀ ଲଗାଇ ଆତ୍ମହତ୍ୟା କରିଛନ୍ତି। ଦେଶର କୋଚିଂ ହବ୍‌ରେ ଚଳିତ ବର୍ଷ ଏହା ହେଉଛି ନବମ ଆତ୍ମହତ୍ୟା।

ହରିୟାଣାର ରୋହତକର ସୁମିତ ନାମକ ଏହି ଛାତ୍ର ଏକ ବର୍ଷ ହେବ କୋଟାର କୁନହାଡି ଲ୍ୟାଣ୍ଡମାର୍କ ସିଟିରେ ଥିବା ହଷ୍ଟେଲରେ ରହୁଥିଲେ। ନିଟ୍ ପରୀକ୍ଷା ପାଇଁ ସେ ଘରୋଇ କୋଚିଂ କ୍ଲାସରେ ଯୋଗ ଦେଉଥିଲେ। ରବିବାର ସନ୍ଧ୍ୟାରେ ତାଙ୍କ ପରିବାର ତାଙ୍କୁ ବାରମ୍ବାର ଫୋନ୍ କରିଥିଲେ ମଧ୍ୟ କୌଣସି ଉତ୍ତର ମିଳି ନ ଥିଲା। ତା’ପରେ ସେମାନେ ହଷ୍ଟେଲ ୱାର୍ଡେନଙ୍କୁ ଫୋନ୍ କରିଥିଲେ। ପୁଲିସକୁ ଖବର ଦିଆଯିବା ପରେ ଏକ ଟିମ୍ ତୁରନ୍ତ ହଷ୍ଟେଲରେ ପହଞ୍ଚିଥିଲା। ପୁଲିସ କବାଟ ଭାଙ୍ଗି ଛାତ୍ରଙ୍କୁ ଝୁଲନ୍ତା ଅବସ୍ଥାରେ ଦେଖିବାକୁ ପାଇଥିଲା। 'ସରି ପାପା! ଏଥର ମଧ୍ୟ ମୋର ସିଲେକ୍ସନ୍‌ ହେବନି।' ଏଭଳି କିଛି ଲେଖି ଝୁଲି ପଡିଛନ୍ତି ସୁମିତ।

ଗତବର୍ଷ କୋଟାରେ ନିଟ୍ ପାଇଁ ପ୍ରସ୍ତୁତି କରୁଥିବା ୨୯ ଜଣ ଛାତ୍ରଛାତ୍ରୀ ଆତ୍ମହତ୍ୟା କରିଥିଲେ। ୪୮ ଘଣ୍ଟା ମଧ୍ୟରେ ଦୁଇ ଜଣ NEET ପାଇଁ ପ୍ରସ୍ତୁତ ହେଉଥିବା ଛାତ୍ର ଆତ୍ମହତ୍ୟା କରିଛନ୍ତି। ପ୍ରଥମ ମାମଲା ରବିବାର ବିଳମ୍ବିତ ରାତିରେ ସାମ୍ନାକୁ ଆସିଥିବାବେଳେ ଦ୍ୱିତୀୟ ମାମଲା ମଙ୍ଗଳବାର ମଧ୍ୟାହ୍ଣ ୧ଟା ବେଳେ ସାମ୍ନାକୁ ଆସିଛି।

Powered by Froala Editor