ପୁରୀ: ହଟିଲା ଦ୍ୱନ୍ଦ୍ୱ । ହଟିଲା ସଂଶୟ । ଶେଷରେ ପଣା ସଂକ୍ରାନ୍ତି କେଉଁ ଦିନ ପାଳନ ହେବ ସେନଇ ଦିନ ଧାର୍ଯ୍ୟ ହୋଇଛି । ମହାବିଷୁବ ପଣା ସଂକ୍ରାନ୍ତି ଶେଷରେ ଆସନ୍ତା ଏପ୍ରିଲ ୧୪ ତାରିଖ ଦିନ ପାଳନ ହେବ । ଉକ୍ତ ଦିନ ପାଳନ ନେଇ ମୁକ୍ତି ମଣ୍ଡପ ପଣ୍ଡିତ ସଭା ପକ୍ଷରୁ ନିଷ୍ପତ୍ତି ନିଆଯାଇଛି । ତେବେ ଅନ୍ୟ କିଛି ଗଣନାକାରୀ ୧୩ ତାରିଖ ସଂକ୍ରାନ୍ତି ନେଇ କହିଛନ୍ତି । 

 ପ୍ରକାଶ ଯେ କେବେ ପଣା ସଂକ୍ରାନ୍ତି  କେଉଁ ଦିନ ପାଳନ ହେବ ତାହାକୁ ନେଇ ଗତ କିଛି ଦିନ ଧରି ଦ୍ୱନ୍ଦ୍ୱ ଲାଗିରହିଥିଲା । ପଞ୍ଜିକା ଗଣନାରେ ଦିନ ଧାର୍ଯ୍ୟ ହୋଇପାରୁନଥିଲା । ପଣା ସଂକ୍ରାନ୍ତି ପାଳନ ତାରିଖକୁ ନେଇ ଭିନ୍ନ ଭିନ୍ନ ମତ ପ୍ରକାଶ ପାଉଥିଲା । ତେବେ ଶେଷରେ ମହାବିଷୁବ ପଣା ସଂକ୍ରାନ୍ତି ଆସନ୍ତା ଏପ୍ରିଲ ୧୪ ତାରିଖ ଦିନ ପାଳନ ନେଇ ନିଷ୍ପତ୍ତି ନିଆଯାଇଛି । 

 ଓଡ଼ିଆ ପଞ୍ଜିକାର ଗଣନା ଅନୁସାରେ ମହାବିଷୁବ ସଂକ୍ରାନ୍ତି ହିଁ ବର୍ଷର ପ୍ରଥମ ସଂକ୍ରାନ୍ତି ଭାବରେ ଗ୍ରହଣ କରାଯାଏ  । ଏହି ଦିନଟିକୁ ଓଡ଼ିଆ ନବବର୍ଷ ଭାବରେ ପାଳନ କରାଯାଏ  । ବର୍ଷଆରମ୍ଭ ହେଉଥିବାରୁ ଓଡ଼ିଆ ପରିବାରରେ ଦେବଦେବୀଙ୍କଠାରେ ସ୍ୱତନ୍ତ୍ର ପୂଜା, ଭୋଗ, ହୋମ ଆଦି କରାଯାଇଥାଏ  । ଏହି ସମୟରେ ସୂର୍ୟ୍ୟ କିରଣ ବୃଦ୍ଧି ପାଇବା ସହ ହଜମ ଶକ୍ତି ମଧ୍ୟ ବୃଦ୍ଧି ପାଇଥାଏ  । ଗରିଷ୍ଠ ଖାଦ୍ୟ ହଜମ ହେଉଥିବାରୁ ବୁଟଛତୁ ପରି ଗରିଷ୍ଠ ଖାଦ୍ୟପଦାର୍ଥ ଗ୍ରହଣ ପାଇଁ ଆୟୋଜନ ଥାଏ  । ଦେହର ଅତ୍ୟଧିକ ତାପ ଶକ୍ତି ସମ ଅବସ୍ଥାକୁ ଆଣିବା ପାଇଁ ପଣାପାନର ବ୍ୟବସ୍ଥା ମଧ୍ୟ ଅଛି  । ତେଣୁ ମହାବିଷୁବ ସଂକ୍ରାନ୍ତି ଦିନରେ ବିଭିନ୍ନ ଦେବାଦେବୀ ମନ୍ଦିରମାନଙ୍କରେ ଛତୁ ଓ ପଣା ଭୋଗର ବିଧି ରହିଛି  । ଏହି ଦିନ ସାଇପଡ଼ିଶା, ବନ୍ଧୁବାନ୍ଧବ ଓ ବ୍ରାହ୍ମଣମାନଙ୍କୁ ପଣା ଦିଆଯାଏ  । ତେଣୁ ଏହି ଦିନକୁ ପଣାସଂକ୍ରାନ୍ତି ବୋଲି ମଧ୍ୟ କୁହାଯାଏ  ।

Powered by Froala Editor