ଟିକସ ବାବଦରେ ଓଡ଼ିଶା ପାଇବ ୫୫ ହଜାର ୨୧୧ କୋଟି
ଭୁବନେଶ୍ୱର : କେନ୍ଦ୍ରୀୟ ଟିକସରେ ଭାଗ ବାବଦରେ ଓଡ଼ିଶା ୫୫ ହଜାର ୨୧୧ କୋଟି ଟଙ୍କା ପାଇବ । କେନ୍ଦ୍ରୀୟ ଅନୁଦାନରେ ପାଖାପାଖି ୩୫ ହଜାର କୋଟି ଟଙ୍କା ମିଳିପାରେ । ଚଳିତ ଆର୍ଥିକ ବର୍ଷ ତୁଳନାରେ ପାଖାପାଖି ୧୧ ହଜାର କୋଟି ଟଙ୍କା ଅଧିକ ମିଳିବ ଓଡ଼ିଶାକୁ ୨୦୨୪-୨୫ ଆର୍ଥିକ ବର୍ଷ ପାଇଁ । କେନ୍ଦ୍ର ବଜେଟ୍ ପ୍ରସ୍ତାବରୁ ଏଭଳି ସୂଚନା ମିଳିଛି।
ଟିକସ ଭାଗ ବାବଦରେ ରାଜ୍ୟଗୁଡ଼ିକୁ କେନ୍ଦ୍ର ସରକାର ମୋଟ ୧୨ ଲକ୍ଷ ୧୯ ହଜାର ୭୮୩ କୋଟି ଟଙ୍କା ଦେବେ । ପଞ୍ଚଦଶ ଅର୍ଥ କମିସନଙ୍କ ସୁପାରିଶ ଅନୁସାରେ ଓଡ଼ିଶା ଭାଗ ହେଉଛି ୪.୫୨୮ ପ୍ରତିଶତ । ଏହି ହାରରେ ଓଡ଼ିଶା ୫୫ ହଜାର ୨୩୧ କୋଟି ଟଙ୍କା ପାଇବ ୨୦୨୪-୨୫ରେ । ୨୦୨୩-୨୪ରେ ବଜେଟ ଅଟକଳରେ ଟିକସ ଭାଗ ଥିଲା ୪୬ ହଜାର ୨୫୧ କୋଟି ଟଙ୍କା । ଏବର୍ଷ ୮ ହଜାର ୯୮୦ କୋଟି ଟଙ୍କା ଅଧିକ ମିଳିବ ଏ ବାବଦରେ । କିନ୍ତୁ ବଜେଟ୍ ପ୍ରସ୍ତାବଠୁ ଅଧିକ ପାଇଛି ଓଡ଼ିଶା । କେନ୍ଦ୍ର ଟିକସ ଆୟ ଆକଳନଠୁ ଅଧିକ ହେବାରୁ ରାଜ୍ୟ ୫୦ ହଜାର ୧୧ କୋଟି ଟଙ୍କା ପାଇଥିଲା ବୋଲି ସଂଶୋଧିତ ବଜେଟ୍ ପ୍ରସ୍ତାବରୁ ସ୍ପଷ୍ଟ ହେଉଛି । କେନ୍ଦ୍ରୀୟ ପ୍ରବର୍ତ୍ତିତ ଯୋଜନା ଓ କେନ୍ଦ୍ରୀୟ ଯୋଜନାରେ ଅନୁଦାନ (ଗ୍ରାଣ୍ଟ୍ ଇନ୍ ଏଡ୍) ବାବଦରେ ଆଗାମୀ ଆର୍ଥିକ ବର୍ଷ ପାଖାପାଖି ୩୫ ହଜାର କୋଟି ମିଳିବାର ସମ୍ଭାବନା ରହିଛି ।
ତେବେ ଚଳିତ ଆର୍ଥିକ ବର୍ଷ (୨୦୨୩-୨୪) ଏ ବାବଦରେ ମୋଟ ୩୨ ହଜାର ୭୮୮ କୋଟି ଟଙ୍କା ମିଳିଛି । ଏ ବାବଦରେ ମୋଟ ଆବଣ୍ଟନ (ସମସ୍ତ ରାଜ୍ୟକୁ) ୬ ଲକ୍ଷ ୩୬ ହଜାର କୋଟିରୁ ୬ ଲକ୍ଷ ୮୧ ହଜାର ୪୦୦ କୋଟି ଟଙ୍କାକୁ ବୃଦ୍ଧି ପାଇଛି । ଅର୍ଥାତ୍ ପାଖାପାଖି ୭ ପ୍ରତିଶତ ବଢ଼ିଛି କେନ୍ଦ୍ରୀୟ ଅନୁଦାନ । ସମାନୁପାତିକ ଭାବେ ଓଡ଼ିଶା ପ୍ରାୟ ୨ ହଜାର କୋଟି ଅଧିକ ପାଇବ ବୋଲି ଅନୁମାନ କରାଯାଉଛି।
Powered by Froala Editor
