ଭୁବନେଶ୍ୱର : କିନ୍ନର ଅବା ତୃତୀୟ ଲିଙ୍ଗୀଙ୍କ ସ୍ୱାସ୍ଥ୍ୟଗତ ସମସ୍ୟାର ସମାଧାନ ପାଇଁ ପ୍ରତି ଜିଲ୍ଲାରେ ମେଡିକାଲ ବୋର୍ଡ ପ୍ରତିଷ୍ଠା କରାଯିବ। ତୃତୀୟ ଲିଙ୍ଗୀଙ୍କ କଲ୍ୟାଣ ଦିଗରେ ଏହି ମେଡିକାଲ ବୋର୍ଡ କାର୍ୟ୍ୟ କରିବ। ମେଡିକାଲ ବୋର୍ଡ ଗଠନ ନିମନ୍ତେ ବିହିତ ପଦକ୍ଷେପ ନେବା ପାଇଁ ସ୍ୱାସ୍ଥ୍ୟ ଓ ପରିବାର କଲ୍ୟାଣ ସଚିବ ଶାଲିନୀ ପଣ୍ଡିତ ସମସ୍ତ ସିଡିଏମ୍‌‌ଓ/ପିଏଚ୍‌‌ଓଙ୍କୁ ପତ୍ର ଲେଖି ନିର୍ଦ୍ଦେଶ ଦେଇଛନ୍ତି। ବିଭାଗ ପକ୍ଷରୁ କୁହାଯାଇଛି ଯେ ଏହି ମେଡିକାଲ ବୋର୍ଡ ସିଡିଏମ୍‌‌/ପିଏଚ୍‌‌ଓଙ୍କ ନେତୃତ୍ୱରେ କାର୍ୟ୍ୟ କରିବ। ଏଥିରେ ଡିଏମ୍‌‌ଓ (ଏମ୍‌‌ଏସ୍‌‌) ଆବାହକ ରହିଥିବା ବେଳେ ସର୍ଜରୀ ବିଶେଷଜ୍ଞ, ସ୍ତ୍ରୀ ଓ ପ୍ରସୂତି ବିଶେଷଜ୍ଞ, ମାନସିକ ରୋଗ ବିଶେଷଜ୍ଞ ଓ କ୍ଲିନିକାଲ ସାଇକୋଲୋଜିଷ୍ଟ ସଦସ୍ୟ ରହିଛନ୍ତି।

ତୃତୀୟ ଲିଙ୍ଗୀ କୌଣସି ଅନୁରୋଧ କଲେ, ତାହା ଉପରେ କମିଟି ବୈଠକ ଆୟୋଜନ କରି ନିଷ୍ପତ୍ତି ଗ୍ରହଣ କରିବ। ଜିଲ୍ଲାସ୍ତରରେ ମେଡିକାଲ ବୋର୍ଡ ଗଠନ କରିବା ଲାଗି ଜାତୀୟ ମାନବାଧିକାର କମିଶନ୍‌ (ଏନ୍‌‌ଏଚ୍‌‌ଆରସି) ଉଭୟ ରାଜ୍ୟ ଏବଂ କେନ୍ଦ୍ର ସରକାରମାନଙ୍କୁ ନିର୍ଦ୍ଦେଶ ଦେଇଥିଲେ। ଏହି ନିର୍ଦ୍ଦେଶ ଅନୁସାରେ ମେଡିକାଲ ବୋର୍ଡ ଗଠନ ପାଇଁ ପଦକ୍ଷେପ ନିଆଯାଇଛି।
ଏହି କମିଟି ମୁଖ୍ୟତଃ କିନ୍ନର ଅବା ତୃତୀୟ ଲିଙ୍ଗୀଙ୍କର କୌଣସି ସ୍ୱାସ୍ଥ୍ୟଗତ ସମସ୍ୟା ଏବଂ ଲିଙ୍ଗ ପରିବର୍ତ୍ତନ ଅସ୍ତ୍ରୋପଚାର ସମ୍ପର୍କିତ ମାମଲା ଉପରେ ନିଷ୍ପତ୍ତି ଗ୍ରହଣ କରିବା ସହ ହିତାଧିକାରୀଙ୍କୁ ସେବା ସୁନିଶ୍ଚିତ କରିବେ। ସେମାନଙ୍କ ଚିକିତ୍ସା, ପରାମର୍ଶ ଏବଂ କାଉନସେଲିଂ ଦିଗରେ କମିଟି ପଦକ୍ଷେପ ନେବ। ଏନ୍‌‌ଏଚ୍‌‌ଆରସିଙ୍କ ନିର୍ଦ୍ଦେଶ ଅନୁସାରେ ତୃତୀୟ ଲିଙ୍ଗୀ ନାଗରିକଙ୍କ ପାଇଁ ବୃଦ୍ଧାଶ୍ରମ ନିର୍ମାଣ, ସର୍ବସାଧାରଣ ସ୍ଥାନରେ ଅଲଗା ଶୌଚାଳୟ ବ୍ୟବସ୍ଥା ଏବଂ କଳାନୈପୁଣ୍ୟ ପ୍ରଦର୍ଶନ ପାଇଁ ସାଂସ୍କୃତିକ କାର୍ୟ୍ୟକ୍ରମ ପରିବେଷଣ ନିମନ୍ତେ ସ୍ୱତନ୍ତ୍ର ବ୍ୟବସ୍ଥା କରିବା ଲାଗି ରାଜ୍ୟ ସରକାର ପଦକ୍ଷେପ ନେବେ। ଏପରିକି ସରକାରୀ ଡାକ୍ତରଖାନାରେ ଲିଙ୍ଗ ପରିବର୍ତ୍ତନ ଅସ୍ତ୍ରୋପଚାର କଲେ, ହିତାଧିକାରୀଙ୍କୁ ଆର୍ଥିକ ସହାୟତା ଦେବା ଲାଗି କମିଶନ୍‌‌ ନିର୍ଦ୍ଦେଶ ଦେଇଛନ୍ତି।

Powered by Froala Editor