ଭୁବନେଶ୍ୱର,ତା.୧୬/୧୦: ଓଡିଶା ରାଜ୍ୟର ସମୁଦାୟ ଜନସଂଖ୍ୟାର ୫୪ ପ୍ରତିଶତ ହେଉଛନ୍ତି ପଛୁଆ ତଥା ଓବିସି ବର୍ଗ । ମାତ୍ର ରାଜ୍ୟରେ ବିଜେଡି ସରକାର ଓବିସି ସମାଜ ସହ କ୍ରମାଗତ ଅନ୍ୟାୟ କରିଚାଲିଛନ୍ତି । ଏହି ବର୍ଗଙ୍କୁ ଶିକ୍ଷା, ନିଯୁକ୍ତି ଏବଂ ସାମ୍ବିଧାନ ପ୍ରଦତ ସଂରକ୍ଷଣରୁ ବଂଚିତ କରାଯାଉଛି । ନାମକୁ ମାତ୍ର ଓବିସି କମିଶନ ଗଠନ କରାଯାଇଛି କିନ୍ତୁ ତାଙ୍କୁ ସାମ୍ବିଧାନିକ ଦରଜା ଦିଆଯାଇନାହିଁ । ରାଜ୍ୟର କୋଟି କୋଟି ଓବିସି ବର୍ଗର ଭାଇଭଉଣୀମାନଙ୍କୁ ସମ୍ମାନ ଓ ଅଧିକାର ଦେବାରେ ବିଜେଡି ସରକାର ଧୋକା ଦେଇଛନ୍ତି । ଆଗକୁ ନିର୍ବାଚନ ଥିବା କାରଣରୁ ଓବିସି ସର୍ଭେ ଓ ଗଣନାର ମିଛ ବାହାନା କରୁଛନ୍ତି । କେନ୍ଦ୍ର ସରକାର ଡାକ୍ତରୀ, ଡେଂଟାଲ, ନବୋଦୟ, କେନ୍ଦ୍ରିୟ ବିଦ୍ୟାଳୟ ଓ ସୈନିକ ସ୍କୁଲରେ ସଂରକ୍ଷଣ ଦେଉଛନ୍ତି । ବିଜେପି ଶାସିତ ରାଜ୍ୟମାନଙ୍କରେ ଓବିସି ବର୍ଗଙ୍କ ପାଠପଢ଼ାରେ ନାମ ଲେଖା ପାଇଁ ୨୭ ପ୍ରତିଶତ ସଂରକ୍ଷଣ ବ୍ୟବସ୍ଥା ଥିବାବେଳେ ଓଡିଶାରେ କାହିଁକି ଏହି ବ୍ୟବସ୍ଥା କାର୍ଯ୍ୟକାରୀ କରାଯାଉନାହିଁ  ଏବଂ କେବେ ଏହା କାର୍ଯ୍ୟକାରୀ କରାଯିବ ବୋଲି ଓବିସି ମୋର୍ଚ୍ଚା ରାଷ୍ଟ୍ରୀୟ ସାଧାରଣ ସଂପାଦକ ତଥା ସାଂସଦ ଶ୍ରୀ ସଙ୍ଗମଲାଲ୍ ଗୁପ୍ତା ପ୍ରଶ୍ନ କରିଛନ୍ତି । 

କେନ୍ଦ୍ରରେ ମୋଦି ସରକାର ଓବିସି ବର୍ଗଙ୍କ ଅଧିକାର ଓ ସମ୍ମାନ ପାଇଁ ଚିନ୍ତିତ ଓ କାର୍ଯ୍ୟରତ । ରାଷ୍ଟ୍ରୀୟ ଓବିସି କମିଶନଙ୍କୁ ସାମ୍ବିଧାନିକ ମାନ୍ୟତା ମିଳିଛି । ଓଡିଶାରେ ବିଜେଡି ସରକାର ୫୪ପ୍ରତିଶତ ଓବିସି ବର୍ଗକୁ ଆଉ ଅଧିକ ଦିନ ଠକି ପାରିବେ ନାହିଁ । ଓବିସି ବିରୋଧୀ ବିଜେଡି ସରକାରକୁ ଓବିସି ବର୍ଗ ଉଚିତ ଜବାବ ଦେବେ । ଓଡିଶାରେ ଓବିସି ବର୍ଗଙ୍କ ସାମ୍ବିଧାନିକ ଅଧିକାର ପାଇଁ ଆଗାମୀ ଦିନରେ ବିଜେପି ତରଫରୁ ରାଜ୍ୟରେ ବଡ ଆନ୍ଦୋଳନ କରାଯିବ ବୋଲି ଶ୍ରୀ ଗୁପ୍ତା କହିଛନ୍ତି । କେନ୍ଦ୍ର ସରକାରଙ୍କ ଦ୍ୱାରା ପଛୁଆ ବର୍ଗ ଓ ଆର୍ôଥକ ଅନଗ୍ରସରମାନଙ୍କ ପାଇଁ ପ୍ରଦତ ବିଭିନ୍ନ ଜନକଲ୍ୟାଣକାରୀ ଯୋଜନାଗୁଡିକର କାର୍ଯ୍ୟାନ୍ୱୟନ ସମ୍ପର୍କରେ ଅନୁଧ୍ୟାନ କରିବା ପାଇଁ ଶ୍ରୀ ଗୁପ୍ତା ଦିନିକିଆ ଓଡ଼ିଶା ଗସ୍ତ ଅବସରରେ ଉକ୍ତ ମନ୍ତବ୍ୟ ଦେଇଛନ୍ତି ।  

Powered by Froala Editor