ଉତ୍ତର ସିକିମ୍‌ର ଲୋନାକ ଲେକ୍‌ ଅଞ୍ଚଳରେ ହୋଇଥିବା ବାଦଲଫଟା ବର୍ଷା ପରେ ତିସ୍ତା ନଦୀ ଅବବାହିକାରେ ଆସିଥିବା ବନ୍ୟାରେ ଭାସିଯାଇ ନିଖୋଜ ହୋଇଯାଇଥିବା ଓଡ଼ିଆ ଯବାନ ସରୋଜ କୁମାର ଦାସ (୨୯) ଶହୀଦ ହୋଇଯାଇଛନ୍ତି। ଗୁରୁବାର ସେନା ପକ୍ଷରୁ ଏ ନେଇ ତାଙ୍କ ପରିବାରକୁ ଖବର ଦିଆଯିବା ପରେ ଢେଙ୍କାନାଳ ଜିଲା ଭୁବନ ବ୍ଲକ ଓ କାମାକ୍ଷାନଗର ଥାନା ଅଞ୍ଚଳରେ ଶୋକର ଛାୟା ଖେଳିଯାଇଛି।

ଢେଙ୍କାନାଳ ଜିଲ୍ଲା କାମାକ୍ଷାନଗର ଥାନା ଦିଘି ପଞ୍ଚାୟତ କେନ୍ଦୁଢ଼ିପ ଗାଁରେ ଜନ୍ମଗ୍ରହଣ କରିଥିଲେ ସରୋଜ କୁମାର ଦାସ। ୨୦୧୨ ମସିହାରେ ଭାରତୀୟ ସେନାରେ ଯୋଗ ଦେଇଥିଲେ। ଚଳିତ ବର୍ଷ ଫେବ୍ରୁଆରୀ ୧୧ ତାରିଖରେ ଲୋପାମୁଦ୍ରାଙ୍କୁ ସେ ବୈଦିକ ରୀତିନୀତିରେ ବିବାହ କରିଥିଲେ। ବାହାଘର ପରେ ଚାକିରିକୁ ପଳାଇ ଯାଇଥିଲେ। ରାକ୍ଷୀପୂର୍ଣ୍ଣିମାରେ ଘରକୁ ଆସିଥିଲେ ସରୋଜ।

ସେପ୍ଟେମ୍ବର ୪ ତାରିଖରେ କର୍ମ କ୍ଷେତ୍ରକୁ ଫେରିଯାଇଥିଲେ। ପ୍ରମୋସନ୍‌ ପାଇଥିବାରୁ ସିକ୍କିମ୍‌ରେ ତାଲିମ୍‌ ନେଉଥିଲେ। ୧୫ ଦିନ ତଳେ ତାଙ୍କର ଟ୍ରେନିଂ ସରିଥିଲା।

ମଙ୍ଗଳବାର ସେ ନିଜ ୟୁନିଟ୍‌ର ଅନ୍ୟ ଯବାନଙ୍କ ସହ କାର୍ଯ୍ୟକ୍ଷେତ୍ରକୁ ଯାଇ ଫେରୁଥିବା ବେଳେ ବାଦଲ ଫଟା ବର୍ଷା ଯୋଗୁ ରାସ୍ତାରେ ଅଟକି ରହିଥିଲେ। ଗାଡ଼ି ଭିତରେ ବସିଥିବା ସମୟରେ ସେ ଫୋନ କରି ପରିବାର ଲୋକଙ୍କ ସହ କଥା ହୋଇଥିଲେ। ସେମାନଙ୍କ ଗାଡ଼ି ଆଗକୁ ବଢ଼ିପାରୁ ନ ଥିବା କହିଥିଲେ।

ହେଲେ ବୁଧବାର ସକାଳୁ ତାଙ୍କ ସହ ଆଉ ପରିବାରର ଯୋଗାଯୋଗ ହୋଇପାରି ନ ଥିଲା। ଫୋନ ବନ୍ଦ ଥିଲା। ସେନାର ୨୩ ଯବାନ ନିଖୋଜ ହୋଇଯାଇଥିବା ଟିଭିରୁ ଜଣାପଡ଼ିବା ପରେ ପରିବାର ଲୋକେ ବ୍ୟସ୍ତ ହୋଇ ୟୁନିଟ୍‌ର ଅନ୍ୟ ଯବାନଙ୍କୁ ଫୋନ କରିଥିଲେ। ସେମାନଙ୍କଠାରୁ ସରୋଜଙ୍କ ନିଖୋଜ ସମ୍ପର୍କରେ ଜାଣିବା କ୍ଷଣି ପରିବାର ଉପରେ ଦୁଃଖର ପାହାଡ଼ ଭାଙ୍ଗିପଡିଥିଲା । ଯବାନ ସହିଦ ହୋଇଥିବ ଖବର ପାଇବା ପରେ ପରିବାର ପୂରା ଭାଙ୍ଗି ପଡିଛନ୍ତି । ୭ ମାସ ତଳେ ବିବାହ କରିଥିବା ପତ୍ନୀଙ୍କ ଆଖିରୁ ଲୁହ ଶୁଖୁନି । 

Powered by Froala Editor