ରୋଗୀଙ୍କୁ ଶୋଷଣ ଅଭିଯୋଗ: ତେଲେଙ୍ଗାନାର ୨୨ ହସ୍ପିଟାଲ ବ୍ୟାନ୍, ଆନ୍ଧ୍ରର ୧୬ ହସ୍ପିଟାଲ ଉପରେ ଫାଇନ
![ରୋଗୀଙ୍କୁ ଶୋଷଣ ଅଭିଯୋଗ: ତେଲେଙ୍ଗାନାର ୨୨ ହସ୍ପିଟାଲ ବ୍ୟାନ୍, ଆନ୍ଧ୍ରର ୧୬ ହସ୍ପିଟାଲ ଉପରେ ଫାଇନ](https://odishanewslens.com/news_gallery/2448_1622752980.jpg)
ଦ୍ୱିତୀୟ ଲହରର ଫାଇଦା ଉଠାଇଛନ୍ତି ଘରୋଇ ହସ୍ପିଟାଲମାନେ । ବିଭିନ୍ନ ଆଳ ଦେଖାଇ ନିରିହ ଲୋକଙ୍କଠାରୁ ଅର୍ଥ ଶୋଷଣ କରିବାରେ ଲାଗିଛନ୍ତି । ଲୋକମାନେ ମଧ୍ୟ ସେମାନଙ୍କର ପରିବାରବର୍ଗ ତଥା ସଂପର୍କୀୟମାନଙ୍କ ଜୀବନ ରକ୍ଷା କରିବାକୁ ଯାଇ କିଛି ଉପାୟ ନପାଇ ସେମାନଙ୍କ କଥାରେ ରାଜି ହୋଇ ଶୋଷଣର ଶିକାର ହେଉଛନ୍ତି । କୋଭିଡ ରୋଗୀଙ୍କଠାରୁ ଇଚ୍ଛା ମୁତାବକ ଟଙ୍କା ଚାର୍ଜ କରୁଥିବାର ଶହେରୁ ଅଧିକ ଅଭିଯୋଗ ଆସିବା ପରେ ଆନ୍ଧ୍ର ଓ ତେଲେଙ୍ଗାନା ସରକାର ଘରୋଇ ହସ୍ପିଟାଲଗୁଡିକ ବିରୋଧରେ କଠୋର ପଦକ୍ଷେପ ଗ୍ରହଣ କରିଛନ୍ତି ।
ତେଲେଙ୍ଗାନା ସରକାର ୨୨ଟି ହସ୍ପିଟାଲ ପାଖରେ ଥିବା କୋଭିଡ ଚିକିତ୍ସା ଅଧିକାରକୁ ପ୍ରତ୍ୟାହାର କରି ନେଇଛନ୍ତି। ତେଲେଙ୍ଗାନା ସରକାର ବ୍ୟାନ କରିଥିବା ୨୨ଟି ଯାକ ହସ୍ପିଟାଲ ହାଇଦ୍ରାବାଦରେ ରହିଛି। ଏହା ମଧ୍ୟରେ କିମ୍ସର ସିକନ୍ଦରାବାଦ ବ୍ରାଞ୍ଚ, ଭିରିଞ୍ଚି, ବଞ୍ଜରା ହିଲ୍ସରେ ଥିବା ସେଞ୍ଚୁରୀ ହସ୍ପିଟାଲ ଓ କୁକାଟାପାଲ୍ଲୀରେ ଥିବା ମାକ୍ସ ହେଲ୍ଥ ଭଳି ଘରୋଇ ହସ୍ପିଟାଲ ରହିଛନ୍ତି।
ତେଲେଙ୍ଗାନାର ସ୍ୱାସ୍ଥ୍ୟ ନିର୍ଦ୍ଦେଶକ ଜି ଶ୍ରୀନିବାସ ରାଓ କହିଛନ୍ତି, ୧୧୩ଟି ହସ୍ପିଟାଲ ବିରୋଧରେ ୧୭୪ଟି ଅଭିଯୋଗ ଆସିଥିଲା। ଏମାନଙ୍କ ମଧ୍ୟରୁ ୧୦୫ଟି ହସ୍ପିଟାଲକୁ କାରଣ ଦର୍ଶାଅ ନୋଟିସ ପଠାଯାଇଛି। ହସ୍ପିଟାଲଗୁଡ଼ିକ କରୋନା ଚିକିତ୍ସା ନାଁରେ ରୋଗୀଙ୍କ ଠାରୁ ବିଭିନ୍ନ ଆଳ ଦେଖାଇ ଅଧିକ ଟଙ୍କା ଆଦାୟ କରିଥିବା ଅଭିଯୋଗ ହୋଇଛି।
ଆନ୍ଧ୍ର ସରକାର ମଧ୍ୟ ୧୬ଟି ହସ୍ପିଟାଲ ଉପରେ ଫାଇନ ଲାଗୁ କରିଥିବା ବେଳେ ଅନ୍ୟ ୪୬ଟି ହସ୍ପିଟାଲ ନାଁରେ ମାମଲା କରିଛନ୍ତି। ଏହି ହସ୍ପିଟାଲଗୁଡ଼ିକ କୋଭିଡ ରୋଗୀଙ୍କ ଠାରୁ ଇଚ୍ଛା ଅନୁସାରେ ଟଙ୍କା ଚାର୍ଜ କରୁଥିବାରୁ ସରକାର ଏପରି ପଦକ୍ଷେପ ନେଇଛନ୍ତି। ଆନ୍ଧ୍ରର ସ୍ୱାସ୍ଥ୍ୟ ସଚିବ ଏକେ ସିଙ୍ଘାଲ କହିଛନ୍ତି, ଅଧିକ ଚାର୍ଜ କରିଥିବା ହସ୍ପିଟାଲଗୁଡ଼ିକୁ ବିଲ୍ ଥିବା ଅର୍ଥର ୧୦ ଗୁଣା ଜୋରିମାନା କରାଯିବ। ବାରମ୍ବାର ରୋଗୀଙ୍କୁ ଶୋଷଣ କରୁଥିବା ହସ୍ପିଟାଲ ଓ ଏହାର କର୍ତ୍ତୃପକ୍ଷଙ୍କ ବିରୋଧରେ ଅପରାଧିକ ମାମଲା କରାଯିବ ବୋଲି ସେ କହିଛନ୍ତି।
Powered by Froala Editor