ଜଣେ ଡେଲିଭରି ବୟ ସାଧାରଣ ଚପଲ ପିନ୍ଧି ସମସ୍ତଙ୍କ ପାଖକୁ ସାମଗ୍ରୀ ପହଞ୍ଚାଉଥିବା ବେଳେ, ଜଣେ ଦୟାଳୁ ଗ୍ରାହକ ତାଙ୍କୁ ନିଜର ନୂତନ ଜୋତା ଉପହାର ଦେଇ ମନ ଜିତି ପାରିଛନ୍ତି । ସୋସିଆଲ ମିଡିଆରେ ଭାଇରାଲ ହେଉଥିବା ଏ ହୃଦୟସ୍ପର୍ଶୀ ଭିଡିଓ ଇଣ୍ଟରନେଟରେ ବଡ଼ ଉଦାହରଣ ସୃଷ୍ଟି କରିଛି । ଏହି ଘଟଣାଟି ଉତ୍ତରପ୍ରଦେଶର ବୋଲି ଜଣାପଡ଼ିଛି । 

ଭିଡିଓରେ ଦେଖିବାକୁ ମିଳିଛି ଯେ, ଜଣେ ଡେଲିଭରି ବୟ ସାଇକେଲ ଚଲାଇ କୌଣସି ଏକ ସାମଗ୍ରୀ ଦେବାକୁ ଆସିଛନ୍ତି । ତାଙ୍କ ପାଦରେ ଜୋତା ବଦଳରେ କେବଳ ଏକ ସାଧାରଣ ଚପଲ ଥିଲା । ଏହାକୁ ଦେଖି ଘରର ବାଲକୋନିରେ ଠିଆ ହୋଇଥିବା ଅମନ ନାମକ ଜଣେ ବ୍ୟକ୍ତି ସେହି ଡେଲିଭରି ବୟଙ୍କୁ ଡାକି ପଚାରିଥିଲେ ଯେ, "ଭାଇ, ଜୋତା ନେବ କି ? ଏହା ନୂଆ ଆଡିଡାସ୍ କମ୍ପାନୀର ।" ପ୍ରଥମେ ଡେଲିଭରି ବୟ ଜଣକ ସଙ୍କୋଚବଶତଃ ମନା କରିଦେଇଥିଲେ । କିନ୍ତୁ ଅମନ ଜିଦ୍ କରି ଘର ଭିତରୁ ନିଜର ସେହି ନୂତନ ଜୋତା ଆଣି ତାଙ୍କୁ ଦେଇଥିଲେ ।

ଭିଡିଓରେ ଦେଖାଯାଇଛି ଯେ, ଡେଲିଭରି ବୟ ଜଣକ ଜୋତା ପାଇବା ପରେ ସାଇକେଲରେ ଆଗକୁ ଯାଇ କିଛି ସମୟ ପାଇଁ ଅଟକି ଯାଉଛନ୍ତି ଏବଂ ସେହି ନୂତନ ଜୋତାକୁ ଦେଖୁଛନ୍ତି । ତାଙ୍କ ଚେହେରାରେ ଯେପରି ଏକ ଅଚାନକ ଖୁସି ଏବଂ କୃତଜ୍ଞତାର ଭାବ ସ୍ପଷ୍ଟ ଭାବରେ ବାରି ହୋଇପଡୁଛି। ଏହି ଭିଡିଓଟିକୁ ଦେଖିବା ପରେ ନେଟିଜେନ୍ସମାନେ ଅମନଙ୍କ ଏପରି ମହତ କାର୍ଯ୍ୟକୁ ପ୍ରଶଂସା କରିଛନ୍ତି। 

Powered by Froala Editor