ଭୁବନେଶ୍ୱର: ଏକାମ୍ର କ୍ଷେତ୍ରର ସମୃଦ୍ଧ ସାଂସ୍କୃତିକ ଐତିହ୍ୟ ଓ ପରମ୍ପରା ପୁନରୁଦ୍ଧାର ତଥା ସଂରକ୍ଷଣ ନିମନ୍ତେ ରାଜ୍ୟ ସରକାରଙ୍କ ଉଦ୍ୟମରେ ଏକାମ୍ର ପ୍ରକଳ୍ପ (ଏକାମ୍ର କ୍ଷେତ୍ର ଆମିନିଟିଜ୍‌‌ ଆଣ୍ଡ ମନୁମେଣ୍ଟ ରିଭାଇଭାଲ୍‌‌ ଆକ୍ସନ୍‌‌) କାର୍ୟ୍ୟକ୍ଷମ ହେବାକୁ ଯାଉଛି। ଆଧ୍ୟାତ୍ମିକ ପରିବେଶ ମଧ୍ୟରେ ପାରମ୍ପରିକ ଯଜ୍ଞ ନୀତିରେ ଏକାମ୍ର ପ୍ରକଳ୍ପର ଶୁଭାରମ୍ଭ କରାଯିବ। ଏହି ପ୍ରକଳ୍ପର ତିନିଦିନିଆ ଭୂମିପୂଜନ ଉତ୍ସବ ଆସନ୍ତାକାଲିଠାରୁ ଆରମ୍ଭ ହୋଇ ୨୮ ତାରିଖ ପର୍ୟ୍ୟନ୍ତ ଚାଲୁ ରହିବାକୁ ଥିବା ବେଳେ ୨୮ ତାରିଖର ଭିତ୍ତିପ୍ରସ୍ତର ସ୍ଥାପନ ଉତ୍ସବରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯୋଗଦେବେ। ଏହି ମହୋତ୍ସବ ପାଇଁ ଲିଙ୍ଗରାଜ ମନ୍ଦିର, ଅନନ୍ତ ବାସୁଦେବ, ମୁକ୍ତେଶ୍ୱର ମନ୍ଦିର, ବିନ୍ଦୁସାଗର ପୁଷ୍କରିଣୀ ଓ ଅନ୍ୟାନ୍ୟ ଛୋଟ ଛୋଟ ମନ୍ଦିରଗୁଡ଼ିକୁ ଆଲୋକମାଳାରେ ସୁସଜ୍ଜିତ କରାଯାଉଛି।
ଜୁନ୍‌‌ ୨୭ ଓ ୨୮ ତାରିଖ ସନ୍ଧ୍ୟା ୫.୩୦ରୁ ରାତି ୧୦ଟା ପର୍ୟ୍ୟନ୍ତ ଭଜନ କାର୍ୟ୍ୟକ୍ରମ ଆୟୋଜନ କରାଯିବ। ଏଥିରେ ହରିହରନ୍‌‌, ଅନନ୍ତ ସୁବ୍ରମଣି, ଅଭିଲିପ୍‌‌ସା ପଣ୍ଡା, ଅନନ୍ୟା ନନ୍ଦ, ନୀଳାଦ୍ରି କୁମାର ଏବଂ ଅନ୍ୟ ସୁନାମଧନ୍ୟ କଳାକାରମାନଙ୍କ ମନଛୁଆଁ ସଙ୍ଗୀତ ପରିବେଷଣ କରିବେ। ଅନ୍ୟପକ୍ଷରେ ଏହି ମହୋତ୍ସବ ନିମନ୍ତେ ପ୍ରଶାସନ ପକ୍ଷରୁ କାର୍ୟ୍ୟସୂଚୀ ପ୍ରକାଶ ପାଇଛି। ୨୬ ତାରିଖରୁ ଭୂମିପୂଜନର ଅଙ୍କୁରୋପଣ ଆରମ୍ଭ କରାଯିବ। ଏହା ପରେ ଆସନ୍ତା ୨୭ ତାରିଖରେ ପ୍ରାତଃ କଳସ, ଗୁରୁ ପୂଜନ, ଦୀପ ସ୍ଥାପନ, ପଞ୍ଚକର୍ମ, ସୂର୍ୟ୍ୟପୂଜା ଓ ଗୋ ପୂଜା ଇତ୍ୟାଦି କରାଯାଇ ଅଗ୍ନି ସ୍ଥାପନ ଓ ଯଜ୍ଞ କର୍ମ ଇତ୍ୟାଦି କରାଯିବ।
ସେହିଭଳି ୨୮ ତାରିଖରେ ଶିଳାନ୍ୟାସ ହୋଇ ଶିଳାପ୍ରସ୍ତର ସ୍ଥାପନ ହେବା ସହ ଯଜ୍ଞର ପୂର୍ଣ୍ଣାହୂତି ହେବ। ପ୍ରକଳ୍ପର ପ୍ରଥମ ପର୍ୟ୍ୟାୟରେ କାର୍ୟ୍ୟ ମଧ୍ୟରେ ଏକାମ୍ର ନଗରୀର ପ୍ରମୁଖ ପ୍ରତ୍ନତାତ୍ତ୍ୱିକ ଐତିହ୍ୟର ପୁନରୁଦ୍ଧାର କାର୍ୟ୍ୟ ସାମିଲ ରହିଛି। ଏହା ସହ ଯାନବାହନ ଚଳାଚଳକୁ ସୁଗମ କରିବା ନିମନ୍ତେ ୧୨ରୁ ୧୮ ମିଟର ଚଉଡ଼ା ରାସ୍ତା, ପଥଚାରୀଙ୍କ ପାଇଁ ୪ରୁ ୧୦ ମିଟର ଚଉଡ଼ାର ଚଲାପଥ ଏବଂ ପାର୍କିଂ ବ୍ୟବସ୍ଥା କରାଯିବ। ଏଥି ସହ ଶ୍ରଦ୍ଧାଳୁମାନଙ୍କ ନିମନ୍ତେ ଆନ୍ତଃସଂଯୋଗ କରୁଥିବା ମୁକ୍ତସ୍ଥାନ, ୩୦୦ ବର୍ଗମିଟରର ଦର୍ଶନ ସୁବିଧା, ଜରୁରିକାଳୀନ ସେବା ନିମନ୍ତେ ୧୬୦୦ ବର୍ଗମିଟରର ସୂଚନା ଓ ନିୟନ୍ତ୍ରଣ କେନ୍ଦ୍ର, ବିନ୍ଦୁସାଗର ଚତୁଃପାର୍ଶ୍ବରେ ଉତ୍ସର୍ଗୀକୃତ ଚଲାପଥ ନିର୍ମାଣ କରାଯିବ।

Powered by Froala Editor