ଦିଲ୍ଲୀର ପୋଷ୍ଟିଂ ଓ ବଦଳି ଅଧିକାର ଉପ ରାଜ୍ୟପାଳଙ୍କୁ ଦେବା ପାଇଁ କେନ୍ଦ୍ର ସରକାର ଆଣିଥିବା ଅଧ୍ୟାଦେଶ ବିରୋଧରେ ଜଣଙ୍କ ପରେ ଜଣେ ବିରୋଧୀ ଏକାଠି ହେବାରେ ଲାଗିଛନ୍ତି। ନୀତିଶ ଓ ମମତାଙ୍କ ପରେ କେଜ୍ରିଓ୍ବାଲଙ୍କୁ ସମର୍ଥନ ଜଣାଇଛନ୍ତି ଶିବସେନା ଉଦ୍ଧବ ଗୋଷ୍ଠୀ ନେତା ଉଦ୍ଧବ ଠାକରେ । 

ଦିଲ୍ଲୀରେ କେନ୍ଦ୍ର ସରକାର ଆଣିଥିବା ସ୍ବତନ୍ତ୍ର ଅଧ୍ୟାଦେଶକୁ ରାଜ୍ୟସଭାରେ ପାସ୍ କରାଇ ନଦେବାକୁ ତମାମ ବିରୋଧୀ ଦଳଗୁଡ଼ିକର ସମର୍ଥନ ଯୋଗାଡ଼ କରୁଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ । ଆଜି ମୁମ୍ବାଇରେ ଉଦ୍ଧବ ଠାକରେଙ୍କୁ ଭେଟିଛନ୍ତି କେଜ୍ରିଓ୍ବାଲ । ସନ୍ଧ୍ୟାରେ ଏନସିପି ପ୍ରମୁଖ ଶରଦ ପାଓ୍ବାରଙ୍କୁ ଭେଟିବା କାର୍ଯ୍ୟକ୍ରମ ରହିଛି । ପୂର୍ବରୁ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର, ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଓ କଂଗ୍ରେସ କେଜ୍ରିଓ୍ବାଲଙ୍କୁ ସମର୍ଥନ ଦେଇଛି ।

କେଜ୍ରିୱାଲ କହିଛନ୍ତି, “ଉଦ୍ଧବ ଠାକରେ ଆମକୁ ସଂସଦରେ ସମର୍ଥନ କରିବେ ବୋଲି ପ୍ରତିଶ୍ରୁତି ଦେଇଛନ୍ତି। ଯଦି ଏହି ବିଲ୍‌(ଅଧ୍ୟାଦେଶ) ସଂସଦରେ ପାରିତ ନ ହୁଏ, ତା’ହେଲେ ୨୦୨୪ରେ ମୋଦି ସରକାର ଆଉ କ୍ଷମତାକୁ ଆସିପାରିବେ ନାହିଁ।”

ଉଦ୍ଧବ ଠାକରେ କହିଛନ୍ତି, “ଦେଶ ଓ ଗଣତନ୍ତ୍ରର ସୁରକ୍ଷା ପାଇଁ ଆମେ ସମସ୍ତେ ଏକାଠି ହୋଇଛୁ। ମୁଁ ଭାବୁଛି ଆମକୁ ବିରୋଧୀ ଦଳା କହିବା କଥା ନୁହେଁ, ବରଂ କେନ୍ଦ୍ରକୁ ବିରୋଧୀ କହିବା ଦରକାର। କାରଣ ସେମାନେ ଗଣତନ୍ତ୍ର ଓ ସମ୍ବିଧାନକୁ ବିରୋଧ କରୁଛନ୍ତି।”

Powered by Froala Editor