କୁହାଯାଏ, ଜୋର ଯାର ମୂଲକ ତାର । ଆଉ ଯିଏ ହାରିଗଲା ସେ ମରିଗଲା । କିନ୍ତୁ ଏଠି ଆଜି ଆମେ ଜଣେ ଆଇଏଏସ୍‌ଙ୍କ ସଂଘର୍ଷ କାହାଣୀ କହୁଛୁ ଯିଏ ଦମ୍ଭର ସହ ଲଢିଛନ୍ତି । ଆଉ ଜିତିଛନ୍ତି । ଏମିତିବି ଦିନ ଥିଲା ସେ ଆତ୍ମହତ୍ୟା ଉଦ୍ୟମ କରିଥିଲେ । ପରେ ସେ ଜଣେ ଦକ୍ଷ ଅଫିସରର ପରିଚୟ ପାଇଛନ୍ତି । ହଁ ଆମେ କହୁଛୁ, ଆଇଏଏସ୍ ସବିତା ପ୍ରଧାନଙ୍କ କାହାଣୀ ।

ଆଇଏଏସ୍ ଅଧିକାରୀ ସବିତା ପ୍ରଧାନ ମଧ୍ୟପ୍ରଦେଶର ମଣ୍ଡି ଜିଲ୍ଲାର ବାସିନ୍ଦା। ଏକ ଆଦିବାସୀ ପରିବାରରେ ଜନ୍ମ ହୋଇଥିବା ସବିତାଙ୍କ ଘରର ଆର୍ଥିକ ଅବସ୍ଥା ଭଲ ନଥିଲା। ବହୁ କଷ୍ଟରେ ସେ ୧୦ମ ପରୀକ୍ଷା ପାସ୍ କରିଥିଲେ। ଦଶମ ପରେ ସେ ଅଧ୍ୟୟନ କରିବାକୁ ଚାହୁଁଥିଲେ, ହେଲେ ବିବାହ ପ୍ରସ୍ତାବ ଆସିଥିଲା। ସବିତାଙ୍କ ଶଶୁର କହିଥିଲେ ବିବାହ ପରେ ଝିଅକୁ ଆମେ ଡାକ୍ତର କରାଇବାକୁ। ଶଶୁରଙ୍କ କଥାରେ ଖୁସି ହୋଇ ୧୬ବର୍ଷ ବୟସରେ ସବିତା ବିବାହ କରିବାକୁ ରାଜି ହୋଇଥିଲେ। ହେଲେ ବିବାହ ପରେ ଶାଶୁଘର ଲୋକ ସବିତାଙ୍କୁ ପାଠ ପଢ଼ିବାକୁ ଅନୁମତି ଦେଇ ନଥିଲେ। ସ୍ୱାମୀ ମାଡ଼ ମାରିବା ସହ ତାଙ୍କୁ ଠିକ ଭାବରେ ଖାଇବାକୁ ଦିଆଯାଉ ନଥିଲା। ୨୧ବର୍ଷ ବୟସରେ ସବିତା ୨ଟି ସନ୍ତାନର ମା’ ହୋଇ ସାରିଥିଲେ ବି ଶାଶୁଘର ନିର୍ଯାତନା ଅସହ୍ୟ ହେଉଥିଲା । 

ଫଳରେ ଦିନେ ଆତ୍ମହତ୍ୟା ଭଳି ଚରମ ନିଷ୍ପତ୍ତି ନେଉଥିଲେ ସବିତା । ହେଲେ ଗୋଟିଏ ଘଟଣା ତାଙ୍କ ମନକୁ ବଦଳାଇଦେଇଥିଲା । ସେ ଜୀବନ ହାରିବା ପାଇଁ ବେକରେ ଓଢ଼ଣି ଗୁଡ଼ାଉଥିବା ବେଳେ ତାଙ୍କ ଶାଶୁ ତାଙ୍କୁ ଦେଖି ମଧ୍ୟ ଅଟକାଇ ନଥିଲେ। ଏଭଳି ହୃଦୟହୀନ ଲୋକଙ୍କ ପାଇଁ ଜୀବନ ହାରିବି ନାହିଁ ବୋଲି ମନସ୍ଥ କରିଥିଲେ ସବିତା। ୨ସନ୍ତାନଙ୍କୁ ଧରି ଶାଶୁଘର ଛାଡିଦେଲେ । ସେତେବେଳକୁ ବଡ ପୁଅକୁ ମାତ୍ର ଦେଢବର୍ଷ ହୋଇଥିବାବେଳେ ସାନ ପୁଅକୁ ମାତ୍ର ୪ ମାସ ହୋଇଥାଏ ।

ଗୋଟିଏ ପାର୍ଲରରେ କାମ କରିଥିଲେ । ସେତେବେଳକୁ ମାଇଗ୍ରେନ୍ ଯନ୍ତ୍ରଣାରୁ ମୁକ୍ତି ପାଇଁ ଲଗାତାର ପେନ୍ କିଲର ଖାଉଥିବାରୁ ତାଙ୍କ କିଡନୀ ଦୁଇଟିଯାକ ସଂକ୍ରମିତ ହୋଇଯାଇଥାଏ । ଏହି ସମୟ ଭିତରେ ତାଙ୍କ ନଜରରେ ପଡିଥିଲା ଲୋକସେବା ଆୟୋଗର ବିଜ୍ଞାପନ । ଅନେକ ଦିନ ଧରି ପଢାରୁ ଅଭ୍ୟାସ ଛାଡିଯାଇଥିଲେ ବି ୟୁପିଏସସି ପରୀକ୍ଷା ଦେବାକୁ ମନସ୍ଥ କରିଥିଲେ । ଦୃଢ ଇଚ୍ଛାଶକ୍ତି ଯୋଗୁଁ ୨୦୧୭ ମସିହାରେ ୟୁପିଏସସି ପରୀକ୍ଷାରେ ପ୍ରଥମ ଚେଷ୍ଟାରେ ଉତ୍ତୀର୍ଣ୍ଣ ହୋଇଥିଲେ ସବିତା । ପରେ ସେ ଡିଜିଟାଲ କ୍ରିଏଟର ହର୍ଷ ରାଏ ଗୌଡଙ୍କୁ ଦ୍ୱିତୀୟ ବିବାହ କରି ଖୁସିରେ ଅଛନ୍ତି ।

Powered by Froala Editor