ରାମଦେବଙ୍କୁ ଆଇଏମ୍ଏର ମାନହାନୀ ନୋଟିସ୍ : ୧୫ ଦିନରେ କ୍ଷମା ମାଗନ୍ତୁ, ନହେଲେ ଜରିମାନା ଦେବେ
ଏଲୋପାଥି ମେଡିସିନ ଓ ଡାକ୍ତରଙ୍କ ବିରୋଧରେ ବିବାଦୀୟ ମତ ଦେଇଥିଲେ ଯୋଗଗୁରୁ ରାମଦେବ ବାବା । ଏହି ବିବାଦ ଥମିନଥିବାବେଳେ ତାଙ୍କ ବିରୋଧରେ ମାନହାନୀ ନୋଟିସ୍ ପଠାଇଛି ଆଇଏମ୍ଏ । ବାବା ରାମଦେବ ଯଦି ୧୫ ଦିନ ମଧ୍ୟରେ ନିଜ ବୟାନ ପାଇଁ କ୍ଷମା ମାଗନ୍ତି ନାହିଁ ତେବେ ତାଙ୍କ ବିରୋଧରେ ଏକ ହଜାର କୋଟି ଟଙ୍କାର ମାନହାନୀ ମାମଲା ଦାଏର କରିବାକୁ ସଂଘ ଧମକ ଦେଇଛି ।
ନୋଟିସରେ କୁହାଯାଇଛି ଯେ, ବାବା ରାମଦେବଙ୍କ ବୟାନ କାରଣରୁ ଡାକ୍ତରଙ୍କ ପ୍ରତି ଲୋକଙ୍କ ମନରେ ସନ୍ଦେହ ସୃଷ୍ଟି ହୋଇଛି । ଏଥିପାଇଁ ସଜ୍ଜା ଓ ଜରିମାନା କଥା ଉଲ୍ଲେଖ କରାଯାଇଛି । ନୋଟିସରେ ଆଇଏମଏ ସ୍ପଷ୍ଟ ଶବ୍ଦରେ ବାବାଙ୍କୁ ତାଙ୍କ ବୟାନ ପାଇଁ ନୋଟିସ ପାଇବାର ୧୫ ଦିନ ମଧ୍ୟରେ କ୍ଷମା ମାଗିବାକୁ କୁହାଯାଇଛି । କ୍ଷମା ନମାଗିଲେ ସଂଘ ତାଙ୍କ ବିରୋଧରେ ଏକ ହଜାର କୋଟି ଟଙ୍କାର ମାନହାନୀ ମକଦ୍ଦମା କରିବ ବୋଲି କହିଛି । ଯେଉଁଭଳି ତାଙ୍କର ପ୍ରଥମ ବୟାନର ଭିଡିଓ ମିଡିଆ ଏବଂ ସୋସିଆଲ ମିଡିଆରେ ପ୍ରଚାର କରାଯାଇଥିଲା, ସେହିଭଳି ବାବା ରାମଦେବ ମଧ୍ୟ କ୍ଷମା ମାଗିବାର ଭିଡିଓ ପ୍ରଚାର କରିବା ଉଚିତ୍। ଲିଖିତ ଆକାରରେ କ୍ଷମା ମାଗନ୍ତୁ, ନଚେତ୍ ତାଙ୍କ ବିରୋଧରେ ହଜାରେ କୋଟି ଟଙ୍କା ଦାବି କରାଯିବ।
ଆଇଏମଏ ସ୍ୱାମୀ ରାମଦେବଙ୍କ ପତଞ୍ଜଳୀ କମ୍ପାନୀର ଶ୍ୱାସରି କରୋନିଲ କିଟକୁ ନେଇ ମଧ୍ୟ ଆପତ୍ତି କରିଛି । ସଂଗଠନ ରାମଦେବଙ୍କୁ କହିଛି ଯେ, ଏହି ସୂଚନା ମିଳିବାର ୭୬ ଘଣ୍ଟା ମଧ୍ୟରେ କୋରୋନିଲ୍ କିଟ୍ ସହିତ ଜଡିତ ସମସ୍ତ ବିଜ୍ଞାପନ ଫେରାଇ ନିଅନ୍ତୁ । କରୋନା ଟିକା ନେବା ପରେ ଉତ୍ପନ ପାର୍ଶ୍ୱପ୍ରତିକ୍ରିୟା ଦୂର କରିବାରେ ଏହି କିଟ୍ ସହାୟକ ବୋଲି ବିଜ୍ଞାପନରେ ଦାବି କରାଯାଉଛି । କୋରୋନିଲ କିଟକୁ ନେଇ ବାବା ରାମଦେବ ଓ ତାଙ୍କ କମ୍ପାନୀ ଭ୍ରମପୂର୍ଣ୍ଣ ପ୍ରଚାର କରୁଛନ୍ତି ବୋଲି ଆଇଏମଏ ଅଭିଯୋଗ କରିଛି ।
Powered by Froala Editor