ଆନ୍ଧ୍ରପ୍ରଦେଶ ବିଶାଖାପାଟଣା ନିକଟ ମାଲକାପୁରମରେ ଥିବା ହିନ୍ଦୁସ୍ତାନ ପେଟ୍ରୋଲିୟମ କର୍ପୋରେସନ୍ ଲିମିଟେଡ୍ (ଏଚପିସିଏଲ୍) ର ଏକ ପ୍ଲାଣ୍ଟରେ ଅଗ୍ନିକାଣ୍ଡ ଘଟିଛି। ଅଗ୍ନିକାଣ୍ଡ ପରେ ପ୍ଲାଣ୍ଟଟି ହୁତୁହୁତ ହୋଇ ଜଳୁଥିବା ବେଳେ ଏହା ମଧ୍ୟରୁ ପ୍ରବଳ ଧୂଆଁ ବାହାରିଥିଲା। ପ୍ଲାଣ୍ଟରେ ଶତାଧିକ ଲୋକ କାମ କରୁଥିଲେ। ବିସ୍ଫୋରଣ ପରେ ସତର୍କ ଘଣ୍ଟି ବାଜିଥିଲା। ଫଳରେ କର୍ମଚାରୀମାନେ ପ୍ଲାଣ୍ଟ ମଧ୍ୟରେ ଅଘଟଣ ଘଟିଥିବା ଅନୁମାନ କରି ବାହାରକୁ ଦୌଡ଼ି ଥିଲେ। ଏହାର ଭିଜୁଆଲ ସାମ୍ନାକୁ ଆସିଛି। ନିଆଁ ଲିଭାଇବା ପାଇଁ ସ୍ଥାନୀୟ ପ୍ରଶାସନ ଜିଲ୍ଲାର ବିଭିନ୍ନ ଶିଳ୍ପ ୟୁନିଟରୁ ଅଗ୍ନିଶମ ବାହିନୀ ପହଞ୍ଚିଥିଲେ । ଭାରତୀୟ ନୌସେନାର ଏକ ବିଶେଷଜ୍ଞ ଦଳ ମଧ୍ୟ ଘଟଣାସ୍ଥଳରେ ପହଞ୍ଚି ପ୍ରଶାସନକୁ ସାହାଯ୍ୟ କରିଥିଲେ । ବର୍ତ୍ତମାନ ନିଆଁକୁ ଆୟତ୍ତ କରାଯାଇଥିବା ବେଳେ ଦୁର୍ଘଟଣା ସମୟରେ ପ୍ଲାଣ୍ଟ ଭିତରେ ଥିବା ୬ଜଣ କର୍ମଚାରୀଙ୍କ କୌଣସି ପତ୍ତା ମିଳିପାରି ନାହିଁ । ନିଆଁକୁ ଆୟତ୍ତ କରାଯିବା ପରେ ଏବେ ୬ଜଣଙ୍କୁ ଖୋଜିବା ଆରମ୍ଭ କରାଯାଇଛି ।

ଡିଭିଜନାଲ କମିଶନର ଅଫ ପୁଲିସ୍‌ ଐଶ୍ୱର୍ଯ୍ୟା ରସ୍ତୋଗୀ କହିଛନ୍ତି, “ଏଚପିସିଏଲର ୟୁନିଟ-୩ ପ୍ଲାଣ୍ଟରେ ପ୍ରଥମେ ବିସ୍ଫୋରଣ ହୋଇଥିଲା। ଏହାପରେ ଏହା ହୁତୁହୁତୁ ହୋଇ ଜଳିବା ଆରମ୍ଭ କରିଥିଲା। ପ୍ରାଥମିକ ଅବସ୍ଥାରେ ୫ଟି ଦମକଳ ବାହିନୀ ଘଟଣାସ୍ଥଳରେ ପହଞ୍ଚିଥିଲେ। କିନ୍ତୁ ସ୍ଥିତି ବେକାବୁ ହେବାରୁ ଆଉ କିଛି ଦମକଳ ବାହିନୀ ଘଟଣାସ୍ଥଳକୁ ଆସୁଛନ୍ତି। ଏଯାଏ ଅଗ୍ନିକାଣ୍ଡର କାରଣ ଜଣାପଡ଼ିନାହିଁ। ସେହିପରି କୌଣସି ମୃତାହତର ଖବର ମିଳିନାହିଁ।”

Powered by Froala Editor