ଓଡ଼ିଶାରେ ମହାବଳ ବାଘ ନାହାନ୍ତି ବୋଲି ପ୍ରଥମେ କୁହାଯାଉଥିଲା । କିନ୍ତୁ ସୁନାବେଡ଼ା ଓ କେନ୍ଦୁଝର ବନଖଣ୍ଡରେ ମହାବଳ ବାଘର ସ୍ଥିତି ଜଣାପଡିଛି । ଏହାପରେ ବନବିଭାଗ ସ୍ୱତନ୍ତ୍ର ଟିମ୍ ଦ୍ୱାରା ଯାଞ୍ଚ ଜାରି ରଖିଛି । ବାଘକୁ ଜଗିବାକୁ ବନବିଭାଗ ଯେତିକି ତତ୍ପର ଶିକାରୀ ମାନେ ମଧ୍ୟ ସେତିକି ଚାଲାକି ଦେଖାଉଛନ୍ତି । ଗତକାଲି କେନ୍ଦୁଝର ବନଖଣ୍ଡରୁ ୯ ଶିକାରୀ ଗିରଫ ହେବା ପରେ ଏକଥା ଚର୍ଚ୍ଚା ଚାଲିଛି । କିନ୍ତୁ ବନବିଭାଗ ଏମିତି ହେବାକୁ ଦେବନି ବୋଲି କହୁଛି । 

ସୂଚନା ଅନୁଯାୟୀ, ଓଡ଼ିଶାରେ ବାଘ ବଂଶ ବିଲୁପ୍ତପ୍ରାୟ । ଶିମିଳିପାଳରେ କିଛି ବାଘ ରହିଥିବା ବେଳେ ସାତକୋଶିଆ ବ୍ୟାଘ୍ରଶୂନ୍ୟ ହୋଇ ସାରିଛି। ୨୦୦୬ ମସିହାରେ ଶିମିଳିପାଳରେ ୯୯ ଟି ବାଘ ଥିଲେ କିନ୍ତୁ ଗତ ୧୨ ବର୍ଷ ମଧ୍ୟରେ ଏହି ସଂଖ୍ୟା ୧୮ କୁ ଖସି ଆସିଛି। ୨୦୦୭ରେ ସାତକୋଶିଆ ବ୍ୟାଘ୍ର ପ୍ରକଳ୍ପ ଆରମ୍ଭ ହୋଇଥିଲା। ସେତେବେଳେ ଏଠାରେ ପ୍ରାୟ ୮ ଟି ବାଘ ରହିଥିଲେ। ମାତ୍ର ବର୍ତ୍ତମାନ ଏଠାରେ ଗୋଟିଏ ମଧ୍ୟ ବାଘ ନାହାନ୍ତି। ସେହିପରି ବର୍ତ୍ତମାନ କେନ୍ଦୁଝର ଓ ସୁନାବେଡ଼ା ଜଙ୍ଗଲରେ ଦୁଇଟି ବାଘକୁ ସୁରକ୍ଷା ଦେବା ବନ ବିଭାଗ ପାଇଁ ବଡ଼ ଆହ୍ୱାନ ସୃଷ୍ଟି କରିଛି।

ତଥ୍ୟ ଅନୁସାରେ ୨୦୧୨-୧୩ରୁ ୨୦୨୧-୨୨ ଅର୍ଥାତ ଗତ ୧୦ ବର୍ଷ ମଧ୍ୟରେ ରାଜ୍ୟରେ ୬ ଟି ମହାବଳ ବାଘଙ୍କ ମୃତ୍ୟୁ ହୋଇଥିବା ବେଳେ ୪୯ ଟି କଲରାପତରିଆଙ୍କ ମୃତ୍ୟୁ ହୋଇଛି। ତେବେ ଏହି ମୃତ ବାଘଙ୍କ ମଧ୍ୟରେ ୩ ମହାବଳ ଶିକାରୀଙ୍କ ଫାଶରେ ପଡ଼ି ଜୀବନ ହାରିଛନ୍ତି। ସେହିପରି ପ୍ରାଣ ହରାଇଥିବା ୪୯ଟି କଲରପତରିଆଙ୍କ ମଧ୍ୟରୁ ଶିକାରୀଙ୍କ ଯୋଗୁଁ ୨୬ଟି କଲରାପତରିଆଙ୍କ ଜୀବନ ଯାଇଛି। ରାଜ୍ୟରେ ମୋଟ ବାଘ ମୃତ୍ୟୁର ଶତକଡ଼ା ୫୦ ଭାଗ ଶିକାର ଯୋଗୁଁ ପ୍ରାଣ ହରାଇଥିବାରୁ ବନ ବିଭାଗର କାର୍ଯ୍ୟଦକ୍ଷତା ଉପରେ ବଡ଼ ପ୍ରଶ୍ନ ସୃଷ୍ଟି ହୋଇଛି। 

ଅନ୍ୟପଟେ ସରକାରଙ୍କ ତଥ୍ୟଠାରୁ ବହୁ ସଂଖ୍ୟାରେ ଅଧିକ ବାଘ ମରିଥିବାର ଆଶଙ୍କା କରାଯାଉଛି। ୩ ବର୍ଷ ମଧ୍ୟରେ ରାଜ୍ୟ ସରକାରଙ୍କ ଦ୍ୱାରା ଗଠନ ହୋଇଥିବା ଏସ୍‌ଟିଏଫ୍‌ ୩୬ ଟି ବାଘ ଛାଲ ଜବତ କରିଛି। ୩ ବର୍ଷରେ ଏତେ ସଂଖ୍ୟାରେ ବାଘ ଛାଲ ଜବତ ହୋଇଥିବାରୁ ଓଡ଼ିଶା ଜଙ୍ଗଲରେ ଏବେ କେତେ ବାଘ ଅଛନ୍ତି ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।

Powered by Froala Editor