ସଫଦରଜଙ୍ଗରୁ ଶ୍ରୀଜଗନ୍ନାଥ ଯାତ୍ରା ଟ୍ରେନ୍ର ଶୁଭାରମ୍ଭ
ଦିଲ୍ଲୀ ସଫଦରଜଙ୍ଗ ଷ୍ଟେସନରୁ ଶ୍ରୀଜଗନ୍ନାଥ ଯାତ୍ରା ଟ୍ରେନ୍ର ଶୁଭାରମ୍ଭ ହୋଇଛି। ଏହି ଅବସରରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, କେନ୍ଦ୍ର ପର୍ଯ୍ୟଟନ ମନ୍ତ୍ରୀ ଜି କିଷାନ ରେଡ୍ଡି, ରେଳ ବୋର୍ଡ ଚେୟାରମ୍ୟାନ୍, କେନ୍ଦ୍ର ପର୍ଯ୍ୟଟନ ବିଭାଗ ସଚିବ, ରେଳ ବୋର୍ଡ ସଦସ୍ୟ ପ୍ରମୁଖ ଯୋଗ ଦେଇଥିଲେ। ଏହି ଟ୍ରେନ ୮ ଦିନିଆ ଯାତ୍ରାରେ ବାହାରିଛି। ଯାତ୍ରୀମାନେ ଏହା ଜରିଆରେ ଉତ୍ତରପ୍ରଦେଶ, ବିହାର, ଝାଡଖଣ୍ଡ ଏବଂ ଓଡିଶାର ପ୍ରସିଦ୍ଧ ତୀର୍ଥସ୍ଥାନ ଦେଇ ଯାତ୍ରା କରିବେ।
ଏହାର ପ୍ରଥମ ରହଣି ବାରାଣାସୀ ଠାରେ ହେବ । ପର୍ଯ୍ୟଟକମାନେ କାଶୀ ବିଶ୍ୱନାଥ ମନ୍ଦିର ଓ ଏଠାରେ ବିକାଶ ହୋଇଥିବା କରିଡର ପରିଦର୍ଶନ କରିବେ, ପରେ ଗଙ୍ଗା କୂଳରେ ଆରତୀ ଦେଖିବେ। ଏହାପରେ ଟ୍ରେନ୍ ଝାଡଖଣ୍ଡର ପ୍ରସିଦ୍ଧ ବୈଦ୍ୟନାଥ ଧାମ ମନ୍ଦିରରେ ପହଞ୍ଚିବ। ସେଠାରୁ ଏହା ପୁରୀ ଯାତ୍ରା କରିବ।
ପୁରୀରେ ଯାତ୍ରୀମାନେ ପର୍ଯ୍ୟଟକମାନେ ଜଗନ୍ନାଥ ମନ୍ଦିର ପରିଦର୍ଶନ କରିବେ। ପରେ ବସ୍ ଯୋଗେ କୋଣାର୍କରେ ଥିବା ସୂର୍ଯ୍ୟ ମନ୍ଦିର, ଭୁବନେଶ୍ୱରର ଲିଙ୍ଗରାଜ ମନ୍ଦିର, ପର୍ଶୁରାମ ଓ ରାମେଶ୍ୱର ମନ୍ଦିର ହୋଇ ଉଦୟଗିରି ଗୁମ୍ଫା ଯିବେ। ସେଠାରୁ ବାହାରି ପର୍ଯ୍ୟଟକମାନେ ବିହାରର ଗୟା ଟ୍ରେନ୍ ଯୋଗେ ଯିବେ। ଏହା ଯାତ୍ରୀଙ୍କ ପାଇଁ ଶେଷ ପର୍ଯ୍ୟଟନସ୍ଥଳୀ ଭ୍ରମଣ ହେବ। ଏଠାରେ ବିଷ୍ଣୁପଦ ମନ୍ଦିର ଦର୍ଶନ କରିବେ। ଭକ୍ତମାନେ ଯାତ୍ରାର ଅଷ୍ଟମ ଦିନ ଫେବ୍ରୁଆରି ପହିଲାରେ ଦିଲ୍ଲୀ ଫେରିଯିବେ।
ଶ୍ରୀଜଗନ୍ନାଥ ଯାତ୍ରା ଟ୍ରେନ୍ର ଶୁଭାରମ୍ଭ ଅବସରରେ ଶ୍ରୀ ବୈଷ୍ଣବ କହିଛନ୍ତି, ଓଡ଼ିଆ ଭାଷାକୁ ମହାପ୍ରଭୁ ଜଗନ୍ନାଥ ଗଢ଼ିଛନ୍ତି। କେବଳ ଓଡ଼ିଆକୁ ଛାଡ଼ି ବିଶ୍ବର ସବୁ ଭାଷା ମଣିଷ ତିଆରି କରିଛି। କିନ୍ତୁ ଓଡ଼ିଆ ଭାଷାକୁ ମହାପ୍ରଭୁ ଜଗନ୍ନାଥ ଗଢ଼ିଛନ୍ତି। ମହାପ୍ରଭୁ ତାଙ୍କ ପ୍ରସାଦ ଭାବେ ଓଡ଼ିଆ ଭାଷାକୁ ଦେଇଛନ୍ତି। ସେଥିପାଇଁ ଓଡ଼ିଆ ଭାଷା ଏତେ ମିଠା ବୋଲି ସେ କହିଛନ୍ତି।
Powered by Froala Editor