ଦେଢ ବର୍ଷ ପରେ ହତ୍ୟାକାଣ୍ଡର ପର୍ଦ୍ଦାଫାସ : ଡ୍ରମ୍ରୁ ମିଳିଲା ଯୁବତୀଙ୍କ ଖଣ୍ଡ ଖଣ୍ଡ ମୃତଦେହ
ଆନ୍ଧ୍ରପ୍ରଦେଶର ବିଶାଖାପାଟଣାରେ ଏକ ଲୋମହର୍ଷଣକାରୀ ହତ୍ୟାକାଣ୍ଡ ସାମନାକୁ ଆସିଛି । ପ୍ରାୟ ଦେଢ ବର୍ଷ ହେଲା ବନ୍ଦ ଥିବା ଏକ ଘରୁ ଜଣେ ଯୁବତୀଙ୍କ ଗଳିତ ମୃତଦେହ ଉଦ୍ଧାର ହୋଇଛି । ତାକୁ ହତ୍ୟା କରିବା ପରେ ଖଣ୍ଡ ଖଣ୍ଡ କରି ଏକ କମ୍ବଳରେ ଗୁଡ଼ାଇ ପ୍ଲାଷ୍ଟିକ୍ ଡ୍ରମ ଭିତରେ ରଖାଯାଇଥିଲା । ମୃତ ଯୁବତୀଙ୍କ ବୟସ ପ୍ରାୟ ୩୫ ବର୍ଷ ହେବ। ହତ୍ୟା ପରେ କଟା ଶରୀରକୁ ପ୍ଲାଷ୍ଟିକ ଡ୍ରମ୍ରେ ଭର୍ତ୍ତି କରି ବିଶାଖାପଟନମର ମଧୁରାୱାଡାର ବିକାଲାଙ୍ଗୁଲା କଲୋନୀରେ ଥିବା ଗୋଟିଏ ଘର ମଧ୍ୟରେ ରଖାଯାଇଥିଲା।
ପ୍ରାଥମକି ତଦନ୍ତରୁ ଜଣାପଡ଼ିଛି ଯେ ଏହି ନିର୍ମମ ହତ୍ୟାକାଣ୍ଡ ୨୦୨୧ ମସିହା ମେ’ ମାସରେ ଘଟିଥିଲା। ଘଟଣାର ପ୍ରାୟ ୧୮ ମାସ ପରେ ପୁଲିସ୍ ରବିବାର ଖଣ୍ଡବିଖଣ୍ଡିତ ମୃତଦେହକୁ ଜବତ କରିଛି।
ସଂପୃକ୍ତ ଯୁବକ ଏକ ଭଡ଼ା ଘରେ ନିଜ ପତ୍ନୀ ଓ ଶିଶୁ କନ୍ୟା ସହ ରହୁଥିଲା । ପତ୍ନୀ ନିଜ ବାପଘରକୁ ଯାଇଥିବାବେଳେ ସେ ଘରକୁ ଆଉ ଏକ ଯୁବତୀକୁ ଡକାଇଥିଲା । ଯୁବତୀଙ୍କ ସହ ତାର ବଚସା ପରେ ସେ ତାକୁ ହତ୍ୟା କରିଥିବା ସଂଦେହ କରାଯାଉଛି । ହତ୍ୟା କରି ଡ୍ରମରେ ମୃତଦେହକୁ ପୁରାଇବା ପରେ ସେ ଘରଛାଡ଼ି ଚାଲିଯାଇଥିଲା । ପ୍ରାୟ ଦେଢ ବର୍ଷ ଧରି ଘର ନଛାଡ଼ିବାରୁ ଘର ମାଲିକଙ୍କ ସଂଦେହ ହୋଇଥିଲା । ଏହା ପରେ ସେ ତାଲା ଭଙ୍ଗି ଘରକୁ ପଶିବା ପରେ ଡ୍ରମ ଭିତରେ ମୃତଦେହକୁ ଦେଖିଥିଲେ । ମୃତ ଯୁବତୀଙ୍କ ପରିଚୟ ଏପର୍ଯ୍ୟନ୍ତ ମିଳିପାରି ନାହିଁ ।
ଘଟଣା ସମ୍ପର୍କରେ ଜାଣି ସ୍ଥାନୀୟ ଲୋକମାନେ ପୂରା ସ୍ତବ୍ଧ ହୋଇଯାଇଛନ୍ତି। ପୁଲିସ୍ ଅନୁମାନ କରିଛି ଯେ ମୃତ ମହିଳାଙ୍କ ଉଚ୍ଚତା ୪.୫ ଫୁଟ ହେବ ଓ ସେ ଜଣେ ସେକ୍ସ ୱାର୍କର ଭାବେ କାମ କରୁଥିଲେ। ତେବେ ମହିଳାଙ୍କ ପରିଚୟ ଓ ତାଙ୍କ ହତ୍ୟା ପଛର କାରଣ ଏଯାଏ ଜଣାପଡ଼ିନି। ପୁଲିସ୍ ଗୋଟିଏ ମାମଲା ରୁଜୁ କରି ଘଟଣାର ଖୋଳତାଡ଼ ଆରମ୍ଭ କରିଛି।
Powered by Froala Editor
