ରକ୍ତ ବିକି ସ୍ମାର୍ଟ ଫୋନ୍ କିଣିବାକୁ ଡାକ୍ତରଖାନାରେ ପହଞ୍ଚିଲେ ନାବାଳିକା, ତା’ ପରେ...
କୋଲକାତା: ସ୍ମାର୍ଟ ଫୋନ୍ ପ୍ରେମରେ ଯୁବପିଢ଼ି । ଟିକେ ହେତୁ ପାଇବା ପରେ ଏବେ ସବୁ ପୁଅଝିଅଙ୍କ ହାତରେ ରହୁଛି ସ୍କିନ୍ ଟଚ୍ ଫୋନ୍ । କିଏ ଏହାର ସଦୁପଯୋଗ କରୁଛି ତ ଆଉ କେହି ଫ୍ୟାନ୍ସ ଭଳି ବ୍ୟବହାର କରୁଛି । କିଛି ଜଣ ଖରାପ କାମରେ ମଧ୍ୟ ଲଗାଉଛନ୍ତି । ହେଲେ ମୋଟାମୋଟି ଭାବେ କହିବାକୁ ଗଲେ ଏବେ ଆଣ୍ଡ୍ରଏଡ୍ ଫୋନ୍ ସମସ୍ତଙ୍କୁ କିମିଆ କରିଛି । ମାତ୍ର ପଶ୍ଚିମବଙ୍ଗରୁ ଏଭଳି ଏକ ଖବର ସାମ୍ନାକୁ ଆସିଛି ଯାହା ଆପଣମାନଙ୍କୁ ନିଶ୍ଚିତ ଭାବେ ଆଶ୍ଚର୍ଯ୍ୟ କରିବ । ଶୁଣିଲେ ତାଜୁବ୍ ହୋଇଯିବେ । ପାଦ ତଳୁ ମାଟି ଖସିଯିବ । ତାହା ହେଲା ଜଣେ ନାବାଳିକା ରକ୍ତ ବିକ୍ରି କରି ସ୍ମାର୍ଟ ଫୋନ୍ କିଣିବାକୁ ଡାକ୍ତରଖାନାରେ ପହଂଚିଥିଲେ । ହେଲେ ଡାକ୍ତରଖାନା କର୍ତ୍ତୃପକ୍ଷଙ୍କ ସନ୍ଦେହ ହେବାରୁ ସେମାନେ ତୁରନ୍ତ ଚାଇଲ୍ଡଲାଇନ୍ ସହିତ ସମ୍ପର୍କ କରିଥିଲେ । ଆଉ କାଉନ୍ସେଲିଂ ପରେ ପୂରା ଘଟଣା ସାମ୍ନାକୁ ଆସିଥିଲା ।
ପଶ୍ଚିମବଙ୍ଗ ବାଲୁରଗଡ଼ ଜିଲ୍ଲାର ତପନ ଅଞ୍ଚଳରେ ରୁହନ୍ତି ରୀତା । ତାଙ୍କ ବୟସ ଏବେ ୧୬ ବର୍ଷ । ମଙ୍ଗଳବାର ରୀତା ବାଲୁରଗଡ଼ ଡାକ୍ତରଖାନାରେ ପହଞ୍ଚି ଥିଲେ । ଏହାପରେ ସିଧା ଯାଇଥିଲେ ରକ୍ତ ଭଣ୍ଡାରକୁ । ସେଠାରେ ଉପସ୍ଥିତ ଥିବା କର୍ମଚାରୀମାନେ ଭାବିଥିଲେ ସେ ରକ୍ତ ସଂଗ୍ରହ କରିବାକୁ ଆସିଛନ୍ତି । ହେଲେ ରୀତା କହିଥିଲେ, ମୁଁ ରକ୍ତ ବିକ୍ରି କରିବାକୁ ଚାହେଁ । ଏହା ଶୁଣିବା ପରେ ଡାକ୍ତରଖାନା କର୍ତ୍ତୃପକ୍ଷ ସନ୍ଦେହ କରିଥିଲେ । କାରଣ ପଚାରିବାରୁ ନାବାଳିକା କହିଥିଲେ ରକ୍ତ ବିକ୍ରି କରି ଟଙ୍କା ନେଲେ ସ୍ମାର୍ଟ ଫୋନ୍ କିଣିବେ । ଏହା ଜାଣିବା ପରେ ଡାକ୍ତରଖାନା କର୍ତ୍ତୃପକ୍ଷ ୧୦୯୮ରେ ଚାଇଲ୍ଡ ଲାଇନ୍କୁ ଫୋନ୍ କରି ଘଟଣା ସମ୍ପର୍କରେ ଜଣାଇଥିଲେ । ଶିଶୁ କଲ୍ୟାଣ ସମିତି କର୍ମକର୍ତ୍ତା ତୁରନ୍ତ ଡାକ୍ତରଖାନାରେ ପହଞ୍ଚି ଝିଅଟିକୁ ଉଦ୍ଧାର କରିଥିଲେ । କାଉନ୍ସେଲିଂ ବେଳେ ରୀତା ପୂରା ଘଟଣା ବିଷୟରେ ବଖାଣିଥିଲେ । କହିଥିଲେ, ସେ ଅତ୍ୟନ୍ତ ଗରିବ ପରିବାରର । ହେଲେ ସ୍ମାର୍ଟ ଫୋନ୍ କିଣିବାକୁ ଇଛା ଥିଲା । ଏଥିପାଇଁ ଜଣେ ସମ୍ପର୍କୀୟଙ୍କ ଫୋନ୍ରୁ ଅନ୍ଲାଇନ୍ରୁ ଏକ ସ୍ମାର୍ଟ ଫୋନ୍ ଅର୍ଡର କରିଛନ୍ତି । ଏହାର ଦାମ୍ ୯ ହଜାର ରହିଛି । ଏହା କ୍ୟାସ୍ ଅନ୍ ଡେଲିଭରୀ ରହିଥିବା ବେଳେ ଗୁରୁବାର ପହଞ୍ଚିବ । ଏଥିପାଇଁ ଟଙ୍କା ଆବଶ୍ୟକ ଥିବାରୁ ସେ ରକ୍ତ ବିକ୍ରି କରିବାକୁ ଆସିଥିବା କାନ୍ଦି କାନ୍ଦି କହିଥିଲେ । ଏହାପରେ ନାବାଳିକାର ପରିବାର ଲୋକଙ୍କୁ ଖବର ଦିଆଯାଇଥିଲା । ତାଙ୍କ ବାପା-ମା’ ଡାକ୍ତରଖାନାରେ ପହଞ୍ଚି ଥିଲେ । ବାପା ଜଣେ ପରିବା ବ୍ୟବସାୟୀ ହୋଇଥିବା ବେଳେ ମା’ ଗୃହିଣୀ । ତେଣୁ ସେମାନେ ଏତେ ଟଙ୍କା ଯୋଗାଡ଼ କରିବାରେ ଅସମର୍ଥ ଥିଲେ ।
ନାବାଳିକାଙ୍କ ବାପା କହିଛନ୍ତି, ଝିଅ ଟ୍ୟୁସନ୍ ଯିବ ବୋଲି କହି ଘରୁ ସାଇକେଲ୍ ଧରି ବାହାରି ଥିଲା । ଏହାପରେ ବସ୍ଷ୍ଟାଣ୍ଡରେ ସାଇକେଲ୍ ରଖି ୩୦ କିଲୋମିଟର ଦୂର ଆସି ଡାକ୍ତରଖାନାରେ ପହଞ୍ଚି ଏହି କାରନାମା କରିଛି । ଏହାପରେ ଚାଇଲ୍ଡଲାଇନ୍ କର୍ତ୍ତୃପକ୍ଷ ବୁଝାସୁଝା କରିବା ସହିତ ନାବାଳିକାଙ୍କୁ ପରିବାର ଲୋକଙ୍କୁ ହସ୍ତାନ୍ତର କରିଥିଲେ । ଏହି ଖବର ପ୍ରସାରିତ ହେବା ପରେ ଏବେ ସବୁଆଡ଼େ ଚର୍ଚ୍ଚାର ବିଷୟ ପାଲଟିଛି ।
Powered by Froala Editor