ମୁମ୍ବାଇ: ଏବେ ବି ସେ ଚଳଚଞ୍ଚଳ । ଚେହେରାରୁ ଯାଇନି ଚମକ । ପରଦା ଉପରେ ଯେମିତି ପଛରେ ବି ସେମିତି । ଡାଇଲଗ୍ ଶୁଣିବାକୁ ଚାତକ ଭଳି ଚାହିଁ ରହିଥାନ୍ତି ଦର୍ଶକ । ଟିକେ ଝଲକ୍ ଦେଖିବାକୁ ସମସ୍ତେ ପାଗଳ ପ୍ରାୟ । ପିଲାଠୁ ବୁଢ଼ା ସମସ୍ତେ ତାଙ୍କ ଫ୍ୟାନ୍ । ଅଭିନୟର ଯାଦୁରେ ବାନ୍ଧି ରହିଛନ୍ତି ୭ରୁ ୭୦ । ବଲିଉଡ୍‌ର ସେହି ବାଦ୍‌ଶାହ ହେଲେ ଅମିତାଭ ବଚ୍ଚନ । ବିଗ୍ ବି ଭାବେ ପରିଚିତ ଏହି ଟଲ୍ ମ୍ୟାନ୍‌ଙ୍କ ଆଜି ଜନ୍ମ ଦିନ । ୭୯ଟି ଫଗୁଣ ଅତିକ୍ରମ କରିବା ପରେ ଏବେ ସେ ୮୦ ବର୍ଷରେ ପାଦ ଥାପିଛନ୍ତି । ଏଥିପାଇଁ ଦେଶ, ବିଦେଶରୁ ତାଙ୍କ ନିକଟକୁ ଛୁଟୁଛି ଶୁଭେଚ୍ଛାର ସୁଅ । ବଲିଉଡ୍‌, ହଲିଉଡ୍‌, ଟଲିଉଡ୍ ଏବଂ ଓଲିଉଡ୍‌ର ଅନେକ କଳାକାର ତାଙ୍କ ଦୀର୍ଘାୟୁ କାମନା କରିଛନ୍ତି । ବହୁ ବିଶିଷ୍ଟ ବ୍ୟକ୍ତି, ଅନେକ ପ୍ରତିଷ୍ଠିତ ବ୍ୟବସାୟୀ ଓ ରାଜନେତା ତାଙ୍କୁ ଅଭିନନ୍ଦନ ଜଣାଇଛନ୍ତି । ଏମିତି ଗୋଟିଏ ପରେ ଗୋଟେ ହିଟ୍ ଫିଲ୍ମ ଦେଇ ଚାଲନ୍ତୁ ବୋଲି କିଛି ଫ୍ୟାନ୍ ସୋସିଆଲ୍ ମିଡିଆରେ ପୋଷ୍ଟ କରିଛନ୍ତି ।

ଅମିତାଭ ବଚ୍ଚନଙ୍କ ଜୀବନ ଯାତ୍ରା ଏତେ ସହଜ ନଥିଲା । ଏହି ସଫଳତା ପାଇବାକୁ ତାଙ୍କୁ ସାମ୍ନା କରିବାକୁ ପଡ଼ିଛି ବହୁ ଘାତ ପ୍ରତିଘାତ । ଆଉ ଏହା ହିଁ ତାଙ୍କୁ ଚଖେଇଛି ସଫଳତାର ସ୍ୱାଦ ।

ଉତ୍ତରପ୍ରଦେଶର ଆହ୍ଲାବାଦ ସହରରେ ୧୯୪୨, ଆକ୍ଟୋବର ୧୧ ତାରିଖରେ ଜନ୍ମଗ୍ରହଣ କରିଥିଲେ ଅମିତାଭ । ଜନ୍ମରୁ ବାପା, ମା' ତାଙ୍କ ନାଁ ରଖିଥିଲେ ଇନକଲାବ୍ । କାରଣ ସେତେବେଳେ ଦେଶରେ ସ୍ୱାଧିନତା ସଂଗ୍ରାମ ଯୋର ଧରିଥିବାବେଳେ ଇନକଲାବର ନାରା ଲାଗିଥିଲା । କିନ୍ତୁ ଆଗକୁ ଯାଇ ବାପା ହରିବଂଶ ବଚ୍ଚନଙ୍କ ଘନିଷ୍ଠ ବନ୍ଧୁ ସୁମିତ୍ରା ନନ୍ଦନ ପନ୍ତଙ୍କ କହିବାରେ ତାଙ୍କ ନାଁ ରଖାଯାଇଥିଲା ଅମିତାଭ, ଯାହାର ଅର୍ଥ ଏପରି ଏକ ଆଲୋକର ଝଟା ଯାହାର କେବେ ଅନ୍ତ ହୁଏନାହିଁ । ଆହ୍ଲାବାଦର ସେଣ୍ଟ ମ୍ୟାରୀ ସ୍କୁଲରୁ ପାଠପଢା ସରିବା ପରେ ନୈନିତାଲର ପ୍ରତିଷ୍ଠିତ ମହାବିଦ୍ୟାଳୟ ସେରଉଡ କଲେଜରେ ନାଁ ଲେଖାଇଲେ ଅମିତାଭ । ଏଠାରେ ସେ ପାଠପଢା ସହ ନାଟକରେ ମଧ୍ୟ ଭାଗ ନେଉଥିଲେ । ଏଠାରୁ ପଢା ଶେଷ ପରେ ସେ ଦିଲ୍ଲୀର କରୋଡିମଲ କଲେଜ ଆସିଲେ, ଯେଉଁଠାରୁ ସେ ଗ୍ରାଜୁଏସନ୍ ଶେଷ କଲେ । ଡିଗ୍ରୀ ପରେ ସେ ଦିଲ୍ଲୀରେ ଚାକିରି ଖୋଜିଲେ । ହେଲେ ସବୁଠାରୁ ତାଙ୍କୁ ବିଫଳ ହେବାକୁ ପଡିଲା । ଏହି ସମୟରେ ତାଙ୍କର ଜଣେ ବନ୍ଧୁ ତାଙ୍କୁ ଅଲ ଇଣ୍ଡିଆ ରେଡିଓରେ ଭଏସ୍ ନ୍ୟାରେସନ୍ ଭାବେ ଆବେଦନ କରିବାକୁ କହିଲେ । ଏଠାରେ ତାଙ୍କୁ ଅପମାନିତ ହେବାକୁ ପଡିଥିଲା । ତାଙ୍କୁ ସ୍ୱରକୁ ମୋଟା କର୍କଶ ବୋଲି ତାଙ୍କୁ ରିଜେକ୍ଟ କରି ଦିଆଗଲା ।

ଦିଲ୍ଲୀରେ ସବୁ ଦିଗରୁ ନିରାଶ ହେବା ପରେ ସାଙ୍ଗମାନଙ୍କ ସହ କୋଲକାତା ଚାଲିଗଲେ ଅମିତାଭ । ଏଠାରେ ସେ ୫ ବର୍ଷ ବିତାଇଲେ । ଏହି ସମୟ ମଧ୍ୟରେ ଅମିତାଭ ଏକାଧିକ ଘରୋଇ କମ୍ପାନୀରେ ଖୁବ୍ କମ୍ ପଇସାରେ ଚାକିରି କଲେ । ହେଲେ ତାଙ୍କ ମନରେ ଶାନ୍ତି ନଥିଲା । ତାଙ୍କ ଜୀବନ ଅଭିନୟ ପାଇଁ ଅନୁଭବ କରୁଥିଲେ । ସେଥିପାଇଁ ପୁଣି ୧୯୬୮ରେ ମାୟାନଗରୀ ମୁମ୍ବାଇ ଚାଲି ଆସିଲେ ।

୧୯୬୯ ମୃଣାଳ ସେନ୍‌ଙ୍କ ବଙ୍ଗଳା ଫିଲ୍ମ 'ଭୁବନ ସୋମ'ରେ ଭଏସ୍ ଓଭର୍ ଦେଇଥିଲେ ଅମିତାଭ । ଏହାପରେ ସେହିବର୍ଷ ସାଥ୍ ହିନ୍ଦୁସ୍ତାନିରେ ଅଭିନୟ କରିଥିଲେ । ହେଲେ ଦୁର୍ଭାଗ୍ୟକୁ ଏହି ଫିଲ୍ମ ବକ୍ସ ଅଫିସରେ ଜମି ପାରିଲାନି । ନିଜକୁ ଚେଷ୍ଟାକୁ ଜାରି ରଖିବା କ୍ରମରେ ୧୯୭୦ରେ ତାଙ୍କୁ ବମ୍ବେ ଟକି ଓ ୧୯୭୧ରେ ପରୱାନ ମୁଭିରେ କାମ ମିଳିଲା । ଏ ଦୁଇଟି ଫିଲ୍ମ ମଧ୍ୟ ଫ୍ଲପ ହେଲା । ବିଗ୍ ଫ୍ଲପ ପରେ ବି ସାହାସ ହାରି ନଥିଲେ ଅମିତାଭ୍ । ୧୯୭୧ରେ ତାଙ୍କୁ ରାଜେଶ ଖାନ୍ନାଙ୍କ ଅଭିନୀତ 'ଆନନ୍ଦ' ଫିଲ୍ମରେ ସୁଯୋଗ ମିଳିଲା । ୧୯୭୩ର ଫିଲ୍ମ ଜଞ୍ଜିର ତାଙ୍କୁ ଚଖାଇଥିଲା ସଫଳତାର ସ୍ୱାଦ । ଏହାପରେ କାଳିଆ, ଅମର ଅକବ୍ବର ଆନ୍‌ଥୋନୀ, ସତେ ପେ ସତା, ଦିଓ୍ବାର, ଡନ୍, ସୋଲେ ଭଳି ଏକାଧିକ ହିଟ୍ ଫିଲ୍ମ ତାଙ୍କୁ ଭାରତର ବଡ଼ ଷ୍ଟାର ଭାବେ ଦେଇଥିଲା ପରିଚୟ ।

୧୯୮୩ର କୁଲି ଫିଲ୍ମର ଫାଇଟ୍ ସିନ୍ ସୁଟି ବେଳେ ଗୁରୁତର ଭାବେ ଆହତ ହୋଇଥିଲେ ଅମିତାଭ । କୁହାଯାଏ, ଫ୍ୟାନ୍‌ଙ୍କ ଅଶୁମାରୀ ଭଲ ପାଇବା ତାଙ୍କୁ ଦେଇଥିଲା ପୁନଃଜନ୍ମ । ଅମିତାଭ ଦୁଇ ହାତରେ ଲେଖିପାରନ୍ତି, ଆଉ ଏକାସଙ୍ଗେ ଦୁଇଟି ଘଣ୍ଟା ପିନ୍ଧନ୍ତି । ପରଦାରେ ଯେତେ ହିଟ୍ ଅମିତାଭ ସେତେ ଫିଟ୍ ମଧ୍ୟ । ୨୦୦୭ ସୁଟ୍ ବଉଟ୍ ଆଟ୍ ଲୋଖଣ୍ଡଓ୍ବାଲାର ସୁଟିଂ ବେଳେ ସେ ଏକାଥରେ ୫ ଘଣ୍ଟାରେ ୨୩ଟି ସିନ୍ ସାରିଥିଲେ । ଅମିତାଭଙ୍କ ଏଭଳି ଗୋଟିଏ ପରେ ଗୋଟେ ସିନେମା ଆସୁଥାଉ । ଏତିକି ହିଁ ଜନ୍ମ ଦିନରେ କାମନା ।