ଜାତୀୟ ରାଜନୀତିରେ ପ୍ରବେଶ କଲା ତେଲେଙ୍ଗାନା ମୁଖ୍ୟମନ୍ତ୍ରୀଙ୍କ ଏହି ଦଳ
![ଜାତୀୟ ରାଜନୀତିରେ ପ୍ରବେଶ କଲା ତେଲେଙ୍ଗାନା ମୁଖ୍ୟମନ୍ତ୍ରୀଙ୍କ ଏହି ଦଳ](https://odishanewslens.com/news_gallery/16707_1664960515.jpg)
ତେଲେଙ୍ଗାନା: ଜାତୀୟ ରାଜନୀତିରେ ପ୍ରବେଶ କଲା ତେଲେଙ୍ଗାନା ମୁଖ୍ୟମନ୍ତ୍ରୀଙ୍କ କେସିଆରଙ୍କ ଦଳ ଟିଆରଏସ । ଦଳମୁଖ୍ୟ କେସିଆର ନିଜ ଜାତୀୟ ଦଳ ପାଇଁ ନାମ ଚୂଡାନ୍ତ କରିଛନ୍ତି । ପବିତ୍ର ବିଜୟା ଦଶମୀ ଦିନ ସେ ଜାତୀୟ ଦଳର ନାମ ଘୋଷଣା କରିବା ନେଇ ସୂଚନା ଦେଇଥିଲେ । ତେଲେଙ୍ଗାନାରେ ଶାସନରେ ଥିବା ତାଙ୍କ ନେତୃତ୍ବାଧୀନ ତେଲେଙ୍ଗାନା ରାଷ୍ଟ୍ର ସମିତି (ଟିଆରଏସ) ଏବେ ଭାରତ ରାଷ୍ଟ୍ର ସମିତି ନାମରେ ପରିବର୍ତ୍ତିତ ହେବାକୁ ଯାଉଛି । ନାମ ଚୂଡାନ୍ତ ହୋଇଥିବା ନେଇ କେସିଆର ସୂଚନା ଦେଇ ସାରିଥିବା ବେଳେ ଅପରାହ୍ନରେ ଦଳୀୟ ବୈଠକ ପରେ ଆନୁଷ୍ଠାନିକ ଘୋଷଣା ମଧ୍ୟ କରିବେ ।
ଗତକାଲି ରାତିରେ ସେ ଦଳୀୟ କାର୍ୟ୍ୟକର୍ତ୍ତାଙ୍କ ସହ ଦୀର୍ଘ ସମୟ ଧରି ଆଲୋଚନା କରିଥିଲେ । ଏକାଧିକ ପ୍ରସ୍ତାବିତ ନାମ ଉପରେ ବିଚାର ବିମର୍ଶ ହେବା ପରେ ଭାରତ ରାଷ୍ଟ୍ର ସମିତି ନାମରେ ଜାତୀୟ ଦଳ ଲଞ୍ଚ ହେବା ନେଇ ନିଷ୍ପତ୍ତିରେ ପହଞ୍ଚିଥିଲା ଦଳ । ଜାତୀୟ ଦଳ ହେଉଥିବା କାରଣରୁ ସମସ୍ତ ଭାଷାଭାଷୀ ଲୋକଙ୍କୁ ବୁଝାପଡିବା ପରି ନାମକରଣ କରାଯିବା ନେଇ ଦଳ ପକ୍ଷରୁ ସୂଚନା ମିଳିଥିଲା । ଆଜି ଅପରାହ୍ନରେ ଦଳର ସାଧାରଣ ପରିଷଦ ବୈଠକରେ ଏନେଇ ଏକ ସଙ୍କଳ୍ପ ପାରିତ ହେବାକୁ ଯାଉଛି । କେସିଆରଙ୍କ ପ୍ରସ୍ତାବକୁ ୨୮୩ ସଦସ୍ୟ ଅନଔପଚାରିକ ଭାବେ ସମର୍ଥନ ଜଣାଇ ସାରିଛନ୍ତି । ଦଳୀୟ ବୈଠକରେ ସାର୍ବଜନୀନ ଭାବେ ଏହାକୁ ସଙ୍କଳ୍ପପତ୍ର ମାଧ୍ୟମରେ ଅନୁମୋଦିତ କରାଯାଇ ଔପଚାରିକତା ସମ୍ପୂର୍ଣ୍ଣ କରାଯିବ ।
Powered by Froala Editor